【三元九運係咩】香港2024年八運轉九運邊個行業有運行？

【三元九運係咩】香港2024年八運轉九運邊個行業有運行？

中國術數風水所謂嘅三元九運係乜？先拆開理解，風水學上每一元有三運，一運20年，所以一元係60年，三元入面再分上元、中元、下元，60年為一甲子，而九運由一運排列至九運，每一運由九星輪替主事，一主20年，九星亦即係我地好熟嘅九宮飛星，一貪狼、二巨門、三祿存、四文曲、五廉貞、六武曲、七破軍、八左輔、九右弼星，香港下年踏入下元九運新格局，2024年正式踏入九運，由九紫加弼星主事，咁九運預言香港打工仔入邊個行業會有運行呢？

香港由1984年開始進入下元地運，每一個地運都對某啲行業特別有利，1984-2003年屬七運，由七赤星主事，七赤為兌卦屬金，有利金融行業發展，七運期間香港經濟歌舞昇平、中小企業百業興旺，直至踏入接近七運尾1997年先遇上亞洲金融風暴及2003年嘅沙士打擊、遠方「911」事件，每逢風水轉地運期間一般比較反覆，經濟下滑亦係七運即將終結嘅現象。風水嘅野信不信由你！

2004-2023年香港由七運轉入八運，由八白星主事，艮卦屬土，大利地產及建築業，期間雖然有2009年金融危機發生，但中國經濟及樓市急速發展、亦順帶令香港樓價屢創新高，地產商豬籠入水，納米樓起到成行成市，及後covid新冠疫情2019年出現，缺乏內地及外資投入，西方俄烏戰爭以及美國進入加息週期，喺港元同美金掛鈎之下，香港樓市交投大受打擊，導致樓價下滑、百業蕭條，此動盪情況同樣出現在香港地運尾段部分，下年地運即將轉入九運，對香港人又有咩啟示呢？

九運屬九紫离卦，五行屬火，後天方位為南方，香港位屬南方，以土為本，以水為財，香港由八運轉入九運有利於屬火嘅行業，正所謂曰「女就怕嫁錯郎，男就怕入錯行」，想食盡九紫運勢迎接香港九運，係下一個20年順風順水，就要留意以下行業：

香港九運當中最有利打工仔嘅係資訊科技行業，香港踏入九運後20年由九紫右弼星主事，配合未來發展科技掛帥，新科技技術融入日常生活、衣食住行，尤其最旺人工智能行業，火主文明思想，對資訊科技行業有重大裨益，於八運尾段，科技業發展如日中天可能係對大家嘅啟示，VR及AR技術發展、3D投影技術、虛擬貨幣、晶片行業、NFT等都成為新興投資熱點，而最近由OpenAi發佈大受注目嘅ChatGPT，踏入九運將引領世界開發更卓越嘅人工智能系統，便捷人文世界。

九運投資部署方面，下元三運甲辰癸亥年，配合九紫，大家可以因應五行火屬，直屬火系包括太陽能量或能源系股票板塊有機會跑出，如石油、太陽能行業，不過科技行業波幅較大，大家投資前宜量力而為。

香港人想安居樂業，就要順勢而行， 宏觀睇香港地運亦隨三元九運格局嘅轉變而改變，通常地運一轉，香港樓市同經濟都會向下，但所謂有危就有機，2024年前轉地運有機會締造置業良機，直至2023年第一季，樓市普遍呎價都調整咗一至兩成，選址方面最好北面見水（旺財）、南面見山（旺丁），想旺財又旺丁可能要買夠兩間屋喇，香港踏入九運樓市旺港島區北面包括中環、灣仔、銅鑼灣等；新界可選元朗、上水、馬鞍山、白石角、東涌等，有置業買樓計劃朋友就可以留意呢啲地方。