培養孩子閱讀【5種方法提高小朋友閱讀興趣】

培養孩子閱讀【5種方法提高小朋友閱讀興趣】

所謂書中自有黃金屋，如果冇好好培養孩子閱讀嘅習慣，即係有金都唔識執，執金不成仲可能要執輸，大部分富人都有睇書嘅習慣，小朋友三歲開始踏入知識吸收期，除左響閱讀過程中汲取知識外，更加可以激發佢地嘅求知慾、好奇心、創意等，對於佢地嘅智力發展有好大幫助，從小發展培養孩子閱讀習慣，亦可鍛鍊小朋友嘅專注力及耐性，睇書係一種靜態活動，小朋友唔鍾意睇書，家長好容易就放棄，因為覺得小朋友天性就係好動，叫佢坐低睇書，氹過鬧過就係唔肯靜靜地坐低睇書冇辦法，但家長冇留意嘅係，點解佢可以坐定定睇卡通片呢？如果因為好動，睇卡通片又唔好動？原因係因為家長冇好好諗過點營造一個有閱讀氛圍嘅環境，導致小朋友怕悶唔想停留，你俾個超人公仔佢玩，佢拎住飛嚟飛去可以玩足半個鐘，因為佢陶醉響自己嘅世界，閱讀係必須家長參與，透過親子閱讀加強溝通，開啟另一個令孩子陶醉嘅世界。

既然小朋友可以坐定定玩玩具、睇電視YouTube、玩手機，都一樣可以坐定定睇書，形形式式嘅玩具、聲畫俱備嘅卡通片，孩子會因為好奇心加上天馬行空嘅幻想深陷其中，每日一小時嘅卡通時間比一小時嘅閱讀時間，吸引力差天共地，小朋友睇書睇唔明，好快就失去閱讀嘅興趣，張書枱擺幾好嘅文昌位都冇用，咁點樣先可以養成小朋友對睇書嘅興趣呢？

1. 一齊度過閱讀嘅時光

要培養孩子閱讀習慣，家長參與係最首當其衝，參與度越高，效果愈強，所謂參與並唔係你一邊玩住手機，一邊坐喺小朋友身邊，久唔久Hea應一兩句，睇書嘅過程中每一頁、每一行、每一個字、每一幅圖都要同小朋友一齊睇，睡前故事相信好多家長都講過，但要培養孩子閱讀習慣，係同佢一齊睇書一邊講故事，唔係你有你講，佢有佢聽，睇書過程要多向孩子發問，確保孩子心神集中喺故事書內容上，為佢建立幻想空間，只要小朋友習慣睇書或聽故事時間發問，無論問題同故事有冇相關性都好，父母都應該將問題帶返去書本當中，久而久之，閱讀代表親子時光，小朋友就唔好對睇書反感。

2. 營造開心嘅閱讀氣氛

同小朋友睇書唔好帶有目的性，有家長們認為橫掂都要花時間睇書，不如提高教育意味，唔好攪錯重點，培養閱讀興趣並唔係學術交流，雖然閱讀時我地適時問小朋友書中內容有助佢地專注閱讀，但你問埋啲學術性問題有機會會打擊孩子自信心，弄巧反拙。曾經有一個家長心得分享，同小朋友講三隻小豬嘅故事，果時小朋友剛剛識數一到十，佢講講下故事問小朋友如果豬媽媽生多左一隻豬仔，咁有幾多隻小豬？小朋友答唔出，即時由閱讀變數學交流，睇本書都有壓力，咁點會有興趣？要響閱讀時激發孩子想像，問嘅問題應該冇既定答案，例如問點解會有狼呢？相信你可以聽到好多有趣嘅答案，令閱讀氣氛變得愉快、輕鬆而養成為良好習慣，星爺嘅電影之所以受歡迎，因為輕鬆冇壓力，一套可以重複睇十幾次，唔通你又要拘泥於交通警員編號167點解可以響路邊燒雞翼咩？

3. 培養固定嘅閱讀習慣

設定固定嘅閱讀時間係一個好好嘅培養方法，例如睡覺前半個鐘至一個鐘，全家人開個輕音樂，手機、玩具、必須絕跡眼前，以防小朋友分心，既然係培養閱讀習慣，就必須持之以行，美國心理學家指出，養成一個新習慣需要至少要21日，所謂日子有功，只要有良好嘅閱讀氛圍，直到有一日你想偷懶，小朋友都會主動提醒你夠鐘睇書喇！

4. 打造一個書架

為孩子設立專屬書架，用於建立孩子閱讀後嘅成就感，書架只放睇完嘅書，每睇完一本就放上去，放滿一行可以買小禮物作為鼓勵，養成閱讀習慣不單止滿足自己想像空間，更會帶嚟實質驚喜，當佢擺滿左一行書架，果份滿足感再驅使佢繼續擺滿下一行，所謂「勉強冇幸福，強嚟盞氣谷」，只要你小朋友心甘情願閱讀，先稱得上係佢嘅閱讀習慣，而唔係作為家長嘅你一廂情願！

5. 了解小孩嘅閱讀喜好

讓孩子選擇自己喜歡嘅書睇，呢個用嚟鞏固孩子閱讀習慣有很大作用，無論作係被封面、插畫、書本外型吸引都好，我地都可以了解原因，從此了解小朋友閱讀喜好，同埋既然係自己鍾意嘅書，一定迫不及待想打開睇，入腦好多，唔好俾任何意見話呢本得圖畫，果本冇教育意義之類，就算係卡通畫集，你都必需為畫集創造故事，陪小朋友睇哂佢，享受每刻親子時光。

相信睇到呢度，你一定有個幻想，培養孩子閱讀習慣，將來讀書肯定叻啲，唔駛FF啦，閱讀同讀書唔係同一樣野，睇書係一種興趣，讀書係一種責任；閱讀係汲取課本以外嘅知識，擴大想像空間，提高創造力，鍛鍊專注同耐性，讀書係汲取課本上嘅知識，應付升學考試，有濃厚目的性及一定嘅壓力，當然，專注力同耐性提高，對讀書有一定幫助，但有閱讀習慣同學業成績絕對不掛鉤，但養成閱讀習慣對小孩成長絕對有莫大裨益！