有效解酒【5個快速解酒方法推薦】

有效解酒【5個快速解酒方法推薦】

派對總係離唔開酒水，當然飲酒可免則免，但良朋聚會，有時亦避無可避，快速解酒方法唔係應用喺你飲酒果時，係應用喺飲酒之後嘅不適，因為就算係當日冇飲醉，過左一晚你仍然會出現宿醉不適，包括想嘔、頭痛、疲倦乏力、口乾淡茂茂等，要有效解酒當然要先了解成因，對症下藥先有用啦。大家都知道，酒能利尿，飲唔飲得個個人唔一樣，但飲得多大家身體都係會缺水，如果冇適時補水，身體器官會向大腦索取水份，導致腦部組織收縮，令人出現頭痛嘅症狀，加上如果你飲醉，喺訓覺過程身體水份亦會流失，但飲酒已經飲到一肚水，正常人都飲唔落，所以有效嘅解酒方法飲酒人士絕對要知，但都奉勸各位飲酒易過量，酒後千萬不可駕駛！

坊間有好多所謂解酒藥、解酒丸等，但其實解酒作用唔大，酒精過量肝臟排唔切，除非你多一個肝，否則無助解酒，反而會弄巧成拙，藥物影響減慢對酒精嘅吸收速度，冇咁快醉，你就以為自己係酒仙，飲幾多都唔會醉，最後你好可能要走先，拜拜都講唔到一句，亦因為飲酒過量，宿醉情況會更加嚴重。

有效解酒 – 5個快速解酒方法

1. 飲蜂蜜水

根據美國研究指出，蜂蜜嘅果糖同葡萄糖有助身體分解酒精，最好係搽麵包當早餐，或者沖杯蜂蜜水，但濃度一定要高，酒精喺身體入面係唔會自己消失，一定要靠分解，蜂蜜亦有安神功效，頭痛情況減弱後，再嘗試瞓一覺，充足睡眠對解酒有正面幫助，瞓之前可以的話，飲多啲水先瞓。

2. 飲醋或果醋飲品

醋含有機酸，當遇上乙醇會產生化學反應，能有效降低酒精濃度，緩減縮醉反應，而飲醋亦有助血液循環加快新陳代謝，令你可以盡快將殘留嘅酒精排出﹐加速解酒速度！

3. 食香蕉或飲電解質飲品

飲酒後水份容易流失，人體中嘅鉀質亦會隨之流失，身體會隨住鉀質嘅流失量出現唔同程度嘅肌肉鬆弛、乏力、甚至酸痛，疲倦乏力亦係典型嘅宿醉症狀，嚴重更會誘發抽筋或休克，飲電解質飲可以有效舒緩因鹽份及水份流失引起嘅肌肉不適，如果飲唔落嘢，食物之中揀香蕉都可以，香蕉含大量鉀質，食用後亦有同樣嘅解酒功效！

4. 攝取維生素B

宿醉嘅不適除左由缺水引起外，亦因為酒精殘留，維生素B係酒精代謝嘅主要原素，可以食高維生素B含量嘅食物，例如雞蛋、芹菜、蕃茄等，雖然話動物內臟含有極豐富嘅維生素B，但亦伴隨高膽固醇，所以解酒都係用水果或蔬菜比較健康。

5. 如果咩都冇飲水足矣

當你了解左宿醉原因係因為缺水，咁最簡單就係補水，如果上述嘅嘢你都冇，或宿醉嚴重搵唔到，最簡單又快速補水方法就係狂飲水，上述嘅方法亦冇話邊個特別好，所以飲大量嘅水係解酒嘅最簡單有效嘅方法！

解酒方法迷思

有人提過有效解酒應該用茶或者奶，但其實佢地喺應用上概念正確，但實際上啱啱相反，用茶解酒因為茶利尿，希望靠佢將酒精排走﹐但宿醉除左酒精影響之外，就係缺水，缺水仲飲茶利尿，缺上加缺，隨時嚴重過唔飲。奶就因為飲完會響胃度形成黏膜層，減慢酒精吸收減低傷害，但宿醉嘅時候你都飲完啦，亡羊補牢意思唔大，反而飲酒前飲就有用喇，但原理同解酒藥差唔多，所以都係參考返上個5個有效解酒嘅方法啦！