寵物善終流程2023【讓寵兒順利送到彩虹橋】

寵物善終流程2023【讓寵兒順利送到彩虹橋】

香港政府統計處最近係2018年做左一次貓狗寵物普查，結果顯示全港有超過24萬個住戶有飼養貓或狗，佔左所有住戶9%左右，寵物貓大概有10萬隻，而寵物狗就有大概14-15萬隻，係疫情呢幾年時間，唔知數字有無向上升呢？基本上香港人都當寵物係屋企人，無子女嘅更視寵物係親身骨肉，所以當寵物離開既時候，大家都會好傷心，亦唔知點處理佢地既後事流程？會唔會同人既身後事處理方法一樣？

政府其實係1999年關閉左位於堅尼地城既寵物焚化爐後，香港就再無政府寵物焚化場去處理動物遺體啦。由於《公眾潔淨及防止妨擾規例》既關係，任何人係唔可以隨便處理動物屍體嫁。食環署有指引，如果有需要，可以將寵物遺體包裹好，必須清楚註明係「動物屍體」，再送去食環署指定地方回收，之後佢地就會將收返黎既動物屍體運送到堆填區。如果唔想將自己既寵物當成廢料送去堆填區，亦可以考慮搵市面上私營寵物善終服務公司幫手處理寵物身後事嘅流程。

*註:《公眾潔淨及防止妨擾規例》 (第132BK 章)第10 條規定，任何人如無合法權限或合理辯解，不得將任何屍體或屠體，放置在或安排其被放置在任何街道或公眾地方、任何建築物的公用部分、任何水道、溪澗、渠道、溝渠、水塘或香港水域、任何政府財產，但如獲得公職人員同意，則不在此限。

當寵物過身之後嘅一般流程，需要聯絡寵物善終服務公司到屋企或指定地方接收寵物遺體，然後進行遺體清潔同美容，再放入冷凍設備保存好遺體，再選擇日子進行火化，或可以即日處理，如果有需要，亦可以按照中式或西式儀式幫離逝既寵物舉行悼念會，等道別完之後，就進行火化。市面上，除左火化之後，亦有水化，或者整做標本，但由於香港地方細，而且標本費用貴，所以比較少人會選擇將寵物整做標本。當火化或水化完之後，可以將寵物既骨灰選擇撒土、撒海、撒樹，或存放福位，甚至有寵物善終服務公司會提供不同方法俾主人，例如利用寵物骨灰混入泥土，再種植盆栽來去紀念佢地，象徵新生命既開始，同時又係另一種形式既陪伴。又或者會提供記念品俾主人去記念離逝既寵物，例如，利用寵物既毛髮或骨灰製成既掛飾，或者腳印打模既產品等。

火化我地接觸得多，聽得多，傳統既火化主要利用石油氣進行，溫度大概為攝氏800至1000度，過程大約2至4小時處理，而骨灰數量通常保留到50-60%。而水化就係利用水進行，需時24小時，可能保留到85-90%左右既骨灰。水化另外被稱為環保水化或鹼性水解，模仿人體係泥土中自然分解既方法，並唔似火化既燃燒分解。水化過程中，根據寵物既體重、性別及防腐狀態，再控制水既溫度同鹼度，令寵物遺體進行自然分解。另外，兩者都可以選擇以集體或獨立方式處理寵物遺體。而水化同火化既價錢通常都差唔多，因為主要係以寵物既重量去計算價錢，視乎主人希望以邊種方法去處理。

主人可以準備一啲寵物生前鍾意食既食物或零食，玩具，衣服等放係身旁，亦可以帶花出席寵物悼念會，亦可以考慮寵物善終服務公司提供既紙製品，作火化時既物品。切記唔好有塑膠或者金屬成份既物品，因為唔適合火化嫁。

小編上面都有提及到有幾種方法處理寵物既骨灰，撒土、撒海、撒樹、種植植物，或安放係福位或屋企等。而大部份寵物善終服務公司會提供埋靈位俾大家安置寵物既骨灰，所以大家係選擇服務公司既時候，可以多留意有無呢啲靈位俾自己既寵物。寵物善終既過程比人類既簡單好多，手續亦唔會太繁複，如果想了解多啲，不妨向寵物善終服務公司查詢詳情。