【惡頂上司5宗罪 你上司中左幾多條？】

搵到一間實力雄厚嘅公司，一個啱心水嘅職位，但遇著一個惡頂上司，都好難有運行，好嘅上司為提攜你，嚴格教育；惡頂上司為㩒低你，嚴格侮辱，呢度講嘅上司除左你阿頭之外，亦包括啲職場老屎忽，嚴格嚟講係可以點你做嘢嘅同事，辦公室入面，人事關係複雜本身分黨分派，已經要小心處理以免犯眾憎，再加個惡頂上司基本上你都應該做唔長，有人會為左份工係自己鍾意嘅，人工又合適，就死頂希望惡頂上司會早過自己離職，結果佢上司依然生龍活虎，穩坐不起，猶如改編自小說嘅電影《穿Prada的惡魔》，自己就鬱到生不如死，倒地不起，應該逆來順受待百忍成金？定東家唔打打西家？本文綜合惡頂上司5宗罪，你睇下你上司中幾多，如果咁不幸中哂，你快啲走，佢好危險。

通常一個新人剛步入職場，最緊張係自己嘅工作流程係咪配合到公司要求，邊個可以幫到你？就係你上司，但好多惡頂上司忌才，怕你青出於藍，所以好多時教一半唔教不一半，教一半係因為你出事被老細照肺果時用嚟自保，唔教你果半方便推你出嚟孭鑊，「咪教左你囉，人頭豬腦累我俾人鬧」，無恥之餘略顯無辜，人面獸心死有餘辜，通常呢種上司鍾意蠢人，愈蠢愈好，因為你夠聰明你就會知道，忌才嘅人你愈叻愈醒，佢愈唔會俾你表現，隨時試用期都過唔到，仲要受氣，你做埋我果份啦！

有啲上司恃住年資長，做野唔見多，口水特別多，口頭禪係「有咩問我我咩都遇過」，當你有事請教佢，最後做錯嘢你話佢教嘅，佢表情一定非常驚訝，為保面子飾演一個被誤會嘅同事，佢唔再係老屎忽佢係老戲骨，佢更加會話你知，嘩你攪到咁大獲我都救你唔到，呢句係佢一生中最謙虛嘅說話，你受完耙佢就會滿腹經綸，勉勵你下次小心啲，橫練演技令人動容。

惡頂上司領功速度極快，團隊有幾勁，全靠我帶領，常見於銷售團隊，口頭禪係「你做得好好，老闆都讚你，好快升職加人工」，其實你老闆連你係邊個都唔知，有時辛辛苦苦跟個大客，惡頂上司因為想幫你，會同你一齊見，傾得成係因為佢，傾唔成係因為你，可能你呼吸太大聲、或者講嘢無抑揚頓挫，總之衰咗唔關我事，卸膊速度同樣快如閃電，簡直就係職場經典畫面！

公司資源好多時由管理層分配，有人會透過呢個權力，壓榨下屬索取回扣、利益、甚至破壞道德，遇上潛規則上司應該立即舉報，同流合污雖然坐擁較豐富嘅資源，但有如毒品上癮一樣受人控制，你有把柄響佢度，無論工作上定個人仕途上，都逃唔出佢手掌心。

惡頂上司講嘢水份極高，信佢一成雙目失明，信佢十足萬事皆空，冇一樣嘢佢講唔出口，亦冇一樣嘢佢做得出手，所以承諾都係拖住拖住，從未實現，但你就為左一個疑幻疑真嘅夢，接受一切公平或不公平嘅對待，當然，亦唔排除佢係講真，但如果一直只聞樓梯響，都係盡快接受現實，搵過一份有發展前景嘅工作，呢類型嘅惡頂上司一般好親切，好識氹人，係名副其實嘅笑面虎，分分鐘害左你你都唔知咩事，屬於玩弄職場高手級別！