8個接新娘遊戲推介【斯文玩仲高興】

8個接新娘遊戲推介【斯文玩仲高興】

婚姻係一生大事，好多傳統習俗戲碼，當中接新娘遊戲係大家最期待嘅環節之一，早於唐代已經有呢個習俗，果時叫下胥，傳統新郎接新娘時每經一個地方，會設有考驗難關，可能要交詩、答問題甚至即場詩詞Freestyle，考驗新郎才華，排除萬難先可以接到新娘入門，慢慢演變成今日嘅接新娘遊戲，或者叫玩新郎，由於場地通常係響女家進行，有長輩在場唔建議玩得太踩界，以免嚇親長輩，本文推介8個斯文嘅接新娘遊戲，咁就玩得安心、長輩放心。

開門利是一定係接新娘遊戲中嘅首關，姊妹團為考驗新郎嘅誠意，會向新郎索取開門利是，否則連門口都入唔到，開門利是一般都係意頭數字，豐儉由人，通常有8有9，寓意雙雙對對、長長久久，避免1（孤單）、4（諧音唔吉利）、7（淒涼）等數字，一般$888、$999等都過關，不過姊妹團人數多可以就要再大封啲，一般姊妹團每個人平均$500-$1,000都收貨，萬一姊妹團坐地起價，你可以講財政大權由老婆掌握，要同老婆商量，突顯你尊重老婆嘅程度，切忌話窮、無錢，大吉之日小心言行，姊妹們亦要留意見好就收，切勿因貪玩延誤左吉時。

準備紅繩連結唔同嘅嘢，新郎要逐條逐條選擇，紅繩可以連結水杯、電視、衣櫃、甚至姊妹，如新郎揀錯一次，就要對住該物件或人物展現對新娘嘅愛意。

例子：例如揀中嘅紅繩連結其中一個姊妹，新郎可以講：「對住你，我咩都睇唔到，因為我眼中除左老婆睇唔到其他女人。」以意創造，考驗急才。

遊戲開始可以兄弟團一邊做掌上壓，估錯就加一個兄弟一齊做，直到最後你會發現，冇一條紅繩連結新娘，所以第一位做掌上壓嘅兄弟需要有相當嘅體能，因為佢將會由遊戲開始一直做掌上壓做到遊戲結束，其實一對新人嘅紅繩早就連結左，所以眼前呢堆紅繩連結唔到新娘係好正常，接新娘遊戲最緊要係氣氛，遊戲結果唔重要。

新郎必須唱出帶有「愛」字嘅歌曲，若然唱錯歌詞或者唱得唔好聽，就要換過另外一首，而每一首歌必須有至少一位兄弟伴舞，全程拍攝的話放喺夜晚婚宴上播出，將會氣氛大熱，尤其五音不全嘅就更加要唱，場面一定非常攪笑。

新郎為接新娘可以去到幾盡？直接考驗新郎以心理克服生理恐懼，假設新郎最怕食榴蓮，可準備與榴蓮相關食品，新郎每食完一樣可以得到一個字，然後需要透過所得嘅字猜出指定語句，例如「我會愛xxx一生一世」，遊戲中唔需要透露指定語句嘅字數，新郎可以單憑兩三個字去估，但估錯的話所有兄弟必須要飲一杯特製嘅果汁，當然要難飲，新郎亦可以故意陷害兄弟增加遊戲效果，前提必須顧及新郎嘅宗教信仰。

接新娘遊戲又點少得玩同一對新人嘅愛情史有關嘅遊戲？遊戲中先預備紙碟，然後以食物覆蓋，例如飯、意粉、或者其他小食，新郎同兄弟們必須食哂碟上面嘅食物先至會睇到隻碟寫嘅字係咩字，例如係地方名，新郎必須講出呢個地方同新娘有咩回憶，例如初吻、表白嘅地方，玩法如下：

準備10個紙碟，意味十全十美，結果依據兄弟團嘅人數作出調整，如果該地方名有3個字，將呢3個字分別寫喺其中三個碟上面，7個碟入留空，又可以10個碟入面有7隻碟係寫埋啲同該地方名無關嘅字，而為咗增加難度更加可以以其他調味料例如醋、辣椒醬、鹽、糖增加進食難度，同樣食材選擇上要注意新郎及兄弟團嘅宗教信仰及小心進食時整污糟身上嘅衣服。

新郎響接新娘遊戲當然要表達一下對新娘嘅愛意啦！我愛你三個字，唔同國家有唔同語言表達，遊戲前先準備8個國家對我愛你嘅讀法，為增加難道可以撇除日文、韓文、普通話、英文，八個語言先喺新郎同兄弟團面前播放一次，全部人可以幫手記讀音，然後又主持人隨機抽問，至少要連續答啱五個先可以過關，一旦答錯一個就要重新開始，假如新郎唔記得讀音想求助於兄弟，必須先做20下掌上壓，兄弟嘅提示亦只能以嘴型表達，假設提示之後新郎依然答錯或發音唔准確，新郎及該提示兄弟必須各罰10下掌上壓先可以聽多次，遊戲將重新開始。

接新娘遊戲中當然要包括基本傳統遊戲，你愛我什麼主要由新郎講出愛新娘嘅10個原因，簡單講即係講出新娘10個優點， 3秒鐘要答一個，答唔出或者太慢的話，新郎連同兄弟團必須做10下掌上壓以示懲戒，如果新郎嘅答案太行貨或者主持人唔滿意，可以要求新郎在懲罰候補答，例如靚係唔足夠，要具體講佢有幾靚。

愛情宣言通常會響接新娘遊戲嘅最後環節，因為已經差唔多臨近出門吉時，一般新郎都會喺新娘房門外宣讀結婚宣言，一般出面文具店都有得賣或者可以由新郎提早準備，主要功用係新郎必須喺所有親朋戚友嘅見證之下宣讀婚後會遵守嘅規矩，例如啲錢俾晒老婆管、食完飯會洗埋碗、任勞任怨唔使本等，順利通過接新娘遊戲就可以抱得美人歸啦！