搞活動最怕遇上的11種人

 

那些年…搞活動遇上的人

 

搞Party活動?搞朋友聚會?小編對於上一次聚會嘅時間同地點都已經模糊不清,唔知大家又記唔記得上一次嘅同學/朋友聚會係幾時呢?人越大越無朋友,除左因為工作、家庭等等嘅原因而無辦法去聚會之外,仲有好多不同嘅因素影響住。通常係活動最開心嘅就係麻煩型朋友,因為大家都會就住佢地唔同嘅「需要」去滿足佢地,而最痛苦嘅往往就係搞活動果位喇,無糧出都不單止,仲要無止境去滿足大家嘅要求,就時間、就地點、就食物…..有時呢d人真係仲難服侍過老闆。今日就為大家盤點11個活動搞手最怕遇到嘅人!

 

 

 

1. 機師型選手
 

搞手最怕遇上的人-機師型選手

 

實牙實齒話今次Party一定會蒲頭出現,明明約好左臨時又放飛機,場地又book左訂金又比左,通常一個唔來引發嘅係一個接住一個唔來,因為有人開左個頭放飛機,機師接二連三出現,事不關己,難為了搞活動果位,就甘又一次聚會就取消~😵

 

 

 

2. 被召喚型選手
 

搞手最怕遇上的人-被召喚型選手

 

Party聚會時總有幾個人坐低無耐就要不停接電話,一係就個客打黎、一係就bb叫你宜家走;接過電話後三魂唔見七魄,有仔嘅女同學會因為個有仔而被召喚,有女嘅男同學會因為有女而被召喚,但通常男同學被召喚都係小事,好多都要接受另一半嘅怒火轟炸😏😏

 

 

 

3. 新仇舊恨
 

搞手最怕遇上的人-新仇舊恨

 

相信就算大家同學、同事以前都難免會有唔同人之間有摩擦或者矛盾。特別近期熱門嘅政見話題:「哦,佢去,甘我唔去啦!😤」, 通常呢D情況都係兩者揀其一,今次叫佢下次再叫佢,一人一次最公平。宜家睇來Party搞手除左要熟悉地理環境仲要清楚了解大家人物關係圖😆

 

 

 

4. 總統型選手

 

搞手最怕遇上的人-總統型選手

 

何謂總統型呢?就係個行程仲多過特朗普嘅大忙人,聽日陪愛人去行山、夜晚就同家人食飯、後日又要陪家姐去試婚紗、夜晚又要參加婚宴,大後日陪二叔去醫院覆診,夜晚又要參加公司慶功宴Party等等。搞活動嘅你永遠都約唔到嘅人😴😴😴😴😴

 
 
 

 

5. 消失型選手

 

搞手最怕遇上的人-消失型選手

 

一眾同學、朋友仔入邊總有幾個經常性唔覆電話,唔睇whattsapp或已讀不回嘅人,好似人間蒸發咁;有D就隔幾日先覆你一次,有D就直情唔覆添!大佬呀你唔講我以為你係MI6做緊特工唔得閒,但神奇嘅係佢地間唔中又會繼續po IG喔。搞Party活動要同呢種人夾真係賣佢怕!

 

 

 

6. 工作型選手

 

搞手最怕遇上的人-工作型選手

 

翻工唔得閒、做野好忙、日日要OT、得閒死唔得閒病!呢個係最入門嘅拒絕理由。香港人平均工時係世界級水平,工時長呢個係通病,所以往往呢個理由都係出現次數最多而最難處理嘅問題。呢班人能夠出現係Party聚會往往係「不速之客」!

 

 

 

7. 天氣問題
 

搞手最怕遇上的人-天氣問題

 

可能未來一個禮拜天雨,就會有人唔出來,因為唔想天雨出街整濕自己。唔緊要甘咪等天晴咯,但唔係,天晴都會有人唔想出來,因為天氣熱唔想出街整到周身汗,通常呢D係肥仔嘅心聲😝。甘咪等天氣凍咯,又唔係,因為天氣凍容易感冒受寒,通常體質較差嘅同學仔都會選擇少出門;硬要找個藉口推搪你只好賴天氣吧!

 

 

 

8. Party時間唔夾問題
 

搞手最怕遇上的人-時間唔夾問題

 

因為人人工作唔同所以導致收工、放假時間都唔一樣,星期一唔得、放假又話陪情人、收工又話好累,要約到呢班人比輪候公屋仲要長;每每聽到呢D聲音我相信活動搞手們都心態爆炸😱🤨。

 

 

 

9. 地點問題
 

搞手最怕遇上的人-地點問題

 

呢個絕對係搞Party活動聚會典型問題,我住新界,佢住港島,仲有一個住九龍。個個都想就腳,所以搞手唔單止係要情商高,仲要對香港嘅地理環境相當熟悉,需要搵出一個方便每個人出行同翻去嘅地點🤣🤣

 

 

 

10. 遲到型選手
 

搞手最怕遇上的人-遲到型選手

 

呢種人就最厲害,每次Party聚會都搵到層出不窮嘅藉口遲到,睇錯鐘、記錯時間、隻狗唔俾我出門口、塞車……相信總有一個理由中。明明約6點,最終竟然9點先到,最尷尬係來到就已經完場,個場又計人數book,都唔知收唔收佢人頭錢好🤯

 

 

 

11. 口味問題

 

搞手最怕遇上的人-口味問題

 

食辣唔食辣、重口味同淡口味、素食肉食日餐同西餐、韓式同中式、BBQ話怕熱、自助餐話食唔到咁多野、海鮮敏感同花生敏感等等因素,要揀一間岩大家食嘅到會餐廳仲難過考博士!

 

 

雖然搞Party活動嘅難度越來越高,但希望各位搞手們都唔好放棄,因為連你都放棄就更加無人搞了😂😂,最後大家就會漸行漸遠😿。

 
 
 
 
 

*未經許可,以上文章不得轉載或引用*