擺放辦公室植物推薦2023【首選多肉植物】

擺放辦公室植物推薦2023【首選多肉植物】

香港地OFFICE返工時間長，以寫字樓正常既工作時間黎講，9點至6點，都成9個鍾頭，仲未計OT呢，分分鐘會去到12小時都唔定嫁。香港人一日係公司既時間隨時仲多過係屋企，又對足電腦一日，真係眼都攰，專家建議「20法則」，即係每睇20分鐘電腦，就望其他地方或者綠色植物20秒，咁就可以幫助眼睛重新聚焦和同休息，減少壓力引起既眼部不適，所以小編建議返OFFICE既各位不妨考慮買放D小盆栽擺係枱面，但有咩盆栽適合辦公室擺放呢？ 小編推薦5款俾大家參考下！

除左可以減少眼睛疲勞之外，其實仲可以舒緩壓力，有助提升工作效率；另外，擺放適合嘅盆栽可以增加空氣中嘅含氧量，有啲植物仲會有淨化空氣既功效，或者從風水角度會有帶來好運既意思，又可以美化工作環境！

如果要係辦公室枱放置盆栽植物，其實可以揀選容易打理同易照顧既品種，第二，就喺唔太佔用空間既植物，香港地方出名細，所以最好擺放的的骰骰既小盆栽，方便放係辦公枱上面。第三，可以按照自己既喜愛，或者帶有財運既植物去揀選。

今年兔年，小編介紹幾款同兔年有關既多肉植物比大家啦，其中一款就係非常治癒既兔耳朵，非常容易養同打理。兔耳朵原名叫「碧光環」（Monilaria Obconica），外表同兔耳既形狀一樣，又生得肥嘟嘟，所以非常可愛嫁。兔耳朵生長係南非，十分耐旱，如果唔夠水份，兔耳朵會垂頭喪氣，提你要淋少少水俾佢，而且兔耳朵適合生長既溫度大約12-25度，每日曬一陣2-3小時就可以。

另外，還有屬於月兔耳家族 (Kalanchoe Tomentosa) 既其他多肉植物款，例如，月兔耳 (K. Tomentosa)﹑星兔耳 (K. Tomentosa / Hoshitoji)﹑熊貓兔／迷走兔 (K. Tomentosa)﹑無星兔 (K. Tomentosa / Super Didier)﹑毛兔耳 (K. Tomentosa / Super Fuzzy) 等。

好多人都知道仙人掌容易打理，放係OFFICE，又唔使日日淋水，夏天既時候可能一星期一次，冬天既時候大概兩星期淋水一次，有D仙人掌仲會開花嫁，例如緋花玉﹑大統領﹑象牙丸等，係十分啱放係自己張工作枱嫁。

小編特別要介紹既係白烏帽子(白桃扇)，外型扁扁地，如果頂部生2個小側芽，就好似米奇老鼠，所以有人叫佢做米老鼠，如果生4-5個小側芽，就好似小腳板咁。而且照顧得好既話，佢仲會開花嫁。不得不提既係，佢有2個親戚，一個叫金烏帽子，一個叫赤烏帽子，分別在於佢地既刺係咩色啦。

聽到富貴竹，大家會諗到同風水有關，或者好意頭，可以催旺事業、旺財運等，所以有唔同既稱呼嫁，例如開運竹﹑幸運竹、萬年青等，容易種植，可以土種或者水種都得。如果水種既話，大概3-4日換一次水就可以。

發財樹有2款，一款係馬拉巴栗，都適合放置係OFFICE，不過馬拉巴栗係比較大型既植物，可以生到5層樓高，所以唔適合放係辦公枱。而另一款發財樹就係小編要介紹既植物盆栽，亦係屬於多肉植物既，叫翡翠木（別名: 花月），佢既親戚係叫筒葉花月，都係多肉植物，但2者既外表係好唔同既嫁。

非洲菫係非常受歡迎既室內花之一，花既顏色多、又鮮艷，開花既時間長，一年開幾次，所以好常會見到佢既身影，非洲菫又叫非洲紫羅蘭，或者聖保羅花。只要得閑拎佢去窗邊放一陣就得，盡量唔好曬太勁，如果寫字樓無咩太陽，都可以用日光燈代替嫁。