【旅行免檢疫隔離國家】6大地區入境懶人包（持續更新）

【旅行免檢疫隔離國家】6大地區入境懶人包（持續更新）

新一年開始，鄰近國家地區已經陸續將入境既限制放寬，大家就快成4年無去旅行外遊，困左咁耐無飛大家一定蠢蠢欲動，係時候準備計畫出國旅行啦，除左搜攞平價機票之外，每個地方都有唔同入境政策，今日總結左香港人熱門鄉下日本﹑韓國﹑台灣﹑星加坡﹑馬來西亞﹑同泰國，6個旅遊地點既入境最新資訊俾大家。

日本首相岸田文雄係9月22號晚宣佈係10月11號會正式恢復免簽證自由行，亦會取消入境人數上限等限制。入境日本既認可疫苗，係10月11號開始，更改為而家WHO（世界衞生組織）緊急許可既疫苗，即係科興疫苗有機會係新措施下日本會承認既疫苗。入境前，大家可以透過日本政府MySOS網站或者手機應用程式，預先提交自己疫苗接種證明書或72小時內PRC陰性檢測證明，唔使隔離入境日本就可以自由行。

【2023年2月16日更新】遊客需透過Visit Japan Web入境，日本政府同時放寬對香港的航班限制，由2023年1月8號起，香港前往日本機場航班可使用成田、羽田、關西、名古屋中部、新千歲、福岡和那霸以外既機場；又容許航空公司恢復增加由香港前往日本機場既航班。

韓國宣佈左由10月1號起，免入境所有防疫措施，免簽證﹑唔使隔離﹑亦唔使做任何PCR檢測，不過依然需要申請K-ETA（韓國電子旅行許可）同埋係Q-CODE申報健康狀況。無論有無完成新冠疫苗接種，大家都豁免左隔離7日既要求。

【2023年2月16日更新】2023年1月10號起至2月底，所有由香港同澳門前往韓國航班，必須係仁川國際機場降落，代表香港至釜山、香港至濟州直航航線都受到影響。

【2023年2月16日更新】自從上年11月7號開始，港澳人士去台灣只可以用旅行團方式前往台灣旅遊，而每團人數為5至40人，逗留時間為15日。等左3個月，終於係2月14日情人節帶來好消息啦，由2月20日開始，香港人去台灣可以自由行，仲要無任何限制要求，而且入台簽證既程序，同樣會係20日上午9點正式開放俾大家申請啦。大家係咪期待已久呢?

星加坡係4月1號起，都開放自由行，只要入境時出示疫苗接種證明，最少完成2劑WHO（世界衞生組織）緊急許可既疫苗，唔需要申請「航空通行證」（Air Travel Pass, ATP）或者入境許可證明，落機即可以免檢測同免隔離，就可以自由行啦。8月29號起，未接種疫苗既人，只需要係出發前2日，完成PRC陰性檢測證明，亦可以落入境唔使做隔離。大家可以先登機前72小時內申請新加坡電子入境卡（SG Arrival Card），將疫苗證明上載到新加坡TraceTogether。

【2023年2月16日更新】當地政府宣布由2023年2月13號起，將會取消所有新冠肺炎防疫措施。未接種疫苗既入境人士，將無須係出發前往新加坡前接受新冠病毒檢測同取得陰性結果，亦無須係入境新加坡後進行7日隔離。 而新加坡亦宣布全面放寬社交距離措施，包括取消室內佩戴口罩要求，遊客於公共交通工具、醫院、護老院同救護車等地方，將無須再佩戴口罩。

馬來西亞其實係4月1號起，已經開始通關，只要係有打齊世界衛生組織（WHO）認可既疫苗，包括BNT﹑科興，入境就可以唔使隔離。但需要透過係MySafeTravel程式填寫資料後，獲得藍色Traveller Card，原則上係可以免除登機前之既RT-PCR 檢測及入境時既RTK-Ag檢測。

【2023年2月16日更新】遊客唔需要提供任何疫苗證明，民眾係開放式場所同戶外可以唔戴口罩，但仍須保持社交距離，而係室內或者封閉場所（像是教室、大眾交通工具等）仍須配戴口罩。

【2023年2月16日更新】泰國已經係7月時放寬左入境限制，去到10月1號改為入境唔使出示任何疫苗同PCR證明，完全恢復返以前正常入境既狀態。而且仲將旅客逗留係泰國既日數增長，免簽證國家及地區由30日增至45日，要落地簽證（VOA）既國家及地區就由15日增至30日。