落機去到酒店放低行李之後，第一時間去松花江邊既冰雪大世界（指哈爾濱冰雪大世界，英：Ice and Snow World），呢個冰雪王國係松北區太陽島西區，每年12月23號到次年2月28號開放，上午11點到夜晚10點營業，門票68蚊起。行入園區，百米高既冰雪城堡係燈光映照下，就好似童話入面既場景，仲有150米長既超級冰滑梯，從12米高空蜿蜒落黎，風馳電掣既快感，凍到你鼻水直流。如果時間許可，大家可以睇埋夜晚9點既煙花Show，將整個園區變成魔幻世界，冰雕、燈光同煙花交相輝映，浪漫到極致。

哈爾濱冰雪大世界

地址

松北區松北大道西側

交通

可搭乘地鐵2號線至「冰雪大世界站」下車

遊完冰雪大世界，行去隔離既中央大街。呢條百年老街係道里區中央大街1號，屬於中國最著名既步行街之一，亦係哈爾濱既標誌性景點，免費開放，方石路面鋪滿白雪，兩旁既馬迭爾賓館、防洪紀念塔等歐式建築，充滿異域風情。路邊既紅腸鋪香氣撲鼻，買一根現烤紅腸，再試下百年歷史既馬迭爾冰棍，零下二十度既街頭咬緊冰凍既冰棍，呢種「冰與火」既滋味，先至係哈爾濱既正確打開方式。當晚住係中央大街附近既酒店，出行方便，為第二日既行程儲足精神。

中央大街

地址

道里區中央大街

交通

可搭乘地鐵2號線至「中央大街站」下車

第一站去聖索菲亞大教堂（現為哈爾濱市建築藝術館），呢座拜占庭式建築位於道里區透籠街88號，占地721平方米，目前中國保存較為完整既拜占庭式建築，1997年將教堂改作哈爾濱市建築藝術館之用。上午8點半到下午5點開放，門票先至20蚊。白雪壓住既綠色洋蔥頭穹頂，搭配廣場上既白鴿同復古路燈，影相超靚。行入教堂裏面，斑駁既壁畫同古老既管風琴，講緊百年前既故事，陽光透過彩色玻璃灑入嚟，暖粒粒既。

哈爾濱市建築藝術館

地址

道里區透籠街88號

交通

可搭乘多路公交車（如1、5、20路等）至「兆麟街站」下車

去完教堂之後，大家可以轉戰松花江冰雪嘉年華，2026年已經係屬於第八屆舉行，呢個全球最大既戶外冰上樂園，獲過吉尼斯認證，嘉年華位於防洪紀念塔旁邊既松花江江面，免費開放到2月下旬，每日上午9點半到夜晚9點營業。園區入面60幾項冰雪項目任你玩，包括刺激挑戰區既雪地摩托，可以係專用雪道上飛馳，全程仲有教練睇住，安全又過癮，另外，親子互動區既冰雪DIY工坊，小朋友仲可以免費雕小冰雕，打卡區既雪人先生，個個都幾米高，影相超有氛圍。建議從松花江鐵路橋入口入園，避開主入口既人潮，按照「刺激項目區→親子區→冰雪城堡→雪人先生」既路線玩，4-5個鐘就可以玩盡核心景點。

松花江冰雪嘉年華

地址

道里區斯大林街20號

交通

靠近中央大街，方便步行或乘車前往

玩完松花江冰雪嘉年華之後，可以考慮再去哈爾濱極地公園，位於松北區太陽大道3號，係中國最大既天然滑雪場，上午9點半到下午4點半開放，園區包含極地館、海洋館、淘學企鵝館、北極熊體驗館、異寵館五大場地，打造白鯨秀、海豚秀、冰川極光秀、海象脫口秀、企鵝表演、水舞、魟魚表演七大主題表演，非常適合小朋友玩。

哈爾濱極地公園

地址

道里區斯大林街20號

交通

靠近中央大街，方便步行或乘車前往

傍晚返去市區，食返餐地道東北菜，例如鍋包肉，外酥裏嫩、酸甜適口，酸菜白肉鍋又暖粒粒，驅散一日既寒意。

食完早餐，坐車去亞布力滑雪旅遊度假區，車程大概2至3個鐘頭。作為國家運動員訓練基地，新亞布力滑雪場既雪質非常好，位置於尚志市金牌大道88號，占地面積66公頃，而度假區加上滑雪訓練中心總占面積約255公頃，每年12月15號到次年3月1號開放，上午8點到下午5點營業，滑雪場有好多唔同難度既滑道，新手可以揀初級道，請個專業教練，可以1對1教學，學識基本動作，係林海雪原中感受飛馳既樂趣。老手就可以挑戰中高級道，白茫茫既樹林之間穿梭，超級過癮。

除咗滑雪，園區入面既世界第一滑道千祈唔好錯過，呢條入咗吉尼斯紀錄既滑道，全長2680米，沿住山體蜿蜒落嚟，上午8點到下午4點開放，速度仲可以自己控制，一路衝落嚟，兩旁既林海雪原風光盡收眼底，刺激又好玩。

當晚住係度假區既火炕民宿，盤腿坐係暖粒粒既火炕上，卸下一日既疲憊。晚餐食東北特色鐵鍋燉大鵝，鐵鍋慢燉既鵝肉軟爛入味，配菜玉米餅、粉條吸滿湯汁。一班人圍住鐵鍋傾偈笑話，體驗最地道既東北生活。

亞布力滑雪旅遊度假區

地址

尚志市金牌大道亞布力滑雪旅遊度假區

交通

乘坐火車至「亞布力站」（西站／南站）後，轉乘公交車或的士前往

清晨從亞布力出發，坐車3個鐘就可以到牡丹江鏡泊湖景區。呢個自然奇觀係位於寧安市鏡泊湖鎮，係中國最大既火山堰塞湖，主要景區包括鏡泊湖主景區，入面有吊水樓瀑布、百里長湖，同埋火山口森林等，冬季上午8點到下午4點半開放。冬季既鏡泊湖會變成咗冰雪秘境，吊水樓瀑布凝結成巨大既冰瀑，幾十米高既冰柱晶瑩剔透，就好似天然既冰雕藝術品。每日固定時間，當地村民會係冰瀑前表演懸崖跳水，縱身躍入冰凍既湖水，場面驚險刺激。

湖邊既渤海國上京龍泉府遺址免費開放，有時間既話可以順路去睇下。作為唐代渤海國既都城，遺址入面既宮殿基座、城牆殘垣依稀可見，講緊千年前既繁華與滄桑。

當晚住係景區附近既民宿，晚餐食新鮮既鏡泊湖魚。湖水養大既魚，肉質鮮嫩，無論係紅燒定清燉，都保留住原汁原味既鮮美，搭配當地既山野菜，營養又好食。

牡丹江鏡泊湖景區

地址

寧安市鏡泊湖鎮 （接近寧安市火山口旅遊公路或鏡泊小鎮）

交通

牡丹江火車站有大巴直達景區，或先到東京城鎮再轉車

食完早餐出發去長白山池北區（另稱二道白河鎮），位於吉林省長白山保護開發區，沿途既風光超靚，白茫茫既林海無邊無際，偶爾有幾間紅瓦屋企點綴其間，就好似一幅水墨畫。

抵達二道白河鎮，呢度係去長白山北景區既必經之路，住宿選擇好多。放低行李，先去美人松苑。呢個公園係池北區二道白河大街，全日免費開放，係長白山特有既美人松集中生長地。高高大大既美人松，樹枝舒展，覆住一層白雪，行入林間棧道上，呼吸住清新既森林空氣，個心都曬鬆曬。之後可以去參觀長白山自然博物館，上午8點半到下午4點開放，館入面通過標本、模型同多媒體展示，詳細介紹咗長白山既地質地貌、動植物資源，等你係登山前對天池既形成有初步認識，為Day 6既行程做足功課。

晚餐揀朝鮮族烤肉，肥瘦相間既五花肉係烤盤上滋滋作響，包埋生菜、蒜片同辣醬，一口落去，香到飛起。當地既米酒酸甜可口，酒精度數唔高，適合搭配烤肉食，感受朝鮮族既飲食文化。

長白山池北區

地址

吉林省長白山保護開發區管委會池北區

交通

可搭乘高鐵至「白河站」，再前往池北區同景區都好方便

長白山北景區係睇天池既最佳地點之一，天池屬於火山口湖，係中國最深湖泊，天池係松花江、圖們江、鴨綠江三江之源，有「三江之源」美譽。冬季既天池會於上午8點半到下午3點半開放，冬季既長白山，氣溫比市區低5至8℃，一定要著最厚既防寒裝備，防滑鞋仔係最重要，因為景區入面有好多路段結冰濕滑。

大家可以坐車沿住盤山公路向上行，兩旁既樹林會被白雪覆蓋，就好似進入咗童話世界。到達天池之後會見到呢個巨大既火山口湖，冬季少咗雲霧遮擋，能見度超高，碧藍既湖水同雪白，湖面平靜如鏡，可以倒映出天空同山影既景觀，會令大家忘記所有寒冷同疲憊嫁。

除咗天池之外，綠淵潭同長白瀑布都值得去睇。綠淵潭既瀑布結成咗冰，冰柱同周圍既霧凇互相映襯，潭水清澈見底。長白瀑布既水流冬季唔會完全凍結，水霧蒸騰，低溫之下形成壯觀既霧凇，就好似仙境一樣。當晚返去二道白河鎮住宿，緩解登山既勞累。

天池

交通

可搭乘高鐵至「長白山站」，再轉車至二道白河鎮（景區入口）

清晨從長白山出發，坐車3個鐘左右會到琿春市。呢座邊境小城處於中、俄、朝三國交界，有獨特既地緣風情。出名既防川國家風景區（又叫：防川島或防川村）位於琿春市敬信鎮，開放時間上午8點半到下午4點。登上景區入面既龍虎閣頂層，就可以實現「一眼望三國」，俄羅斯既哈桑鎮、朝鮮既豆滿江市，同埋中國既防川村，三國唔同既建築風格同自然風光，一覽無餘，超級震撼。

景區入面既土字碑，係中俄邊界既界碑，見證住邊境地區既歷史變遷。張鼓峰事件紀念館，通過文物同史料，詳細介紹咗近代邊境地區既重要歷史事件，可以俾大家了解歷史。遊完景區，返去琿春市區食晚餐，當晚住係琿春市區酒店，可以體驗邊境小城既寧靜與惬意。

防川國家風景區

地址

吉林省延邊朝鮮族自治州琿春市敬信鎮

交通

可搭乘前往防川景區專線巴士，車程約2至2.5小時

食完早餐，坐車5個鐘左右去到長春。抵達之後，第一時間去偽滿皇宮博物院。呢座建築群係寬城區光復北路5號，係清朝末代皇帝溥儀既宮殿，上午8點半到下午6點開放，下午4點40分停止售票。建築融合咗中式、日式同歐式風格，宮入面既同德殿、緝熙樓保存完好，文物同史料詳細展示咗偽滿洲國既歷史，從溥儀既生活場景到當時既政治格局，全方位呈現咗近代東北既特殊歷史時期，係了解東北近代史既重要窗口。

偽滿皇宮博物院

地址

吉林省長春市寬城區光復北路5號

交通

可搭乘長春軌道交通3號線或4號線至「偽滿皇宮站」

下午去淨月潭國家森林公園，正門同西門每日早上6點到夜晚7點開放。冬季既淨月潭銀裝素裹，被譽為「亞洲第一大人工林海」，景區入面仲有雪地摩托、越野滑雪等項目，鍾意刺激既朋友可以玩下；如果鍾意寧靜，就坐觀光車環湖遊覽，感受冬日既靜謐與壯闊。

當晚住係長春市區重慶路或者人民廣場附近既酒店，周圍餐飲、購物都好方便。晚餐食東北鐵鍋燉，可以搭配當地既玉米酒，大家就可以暖粒粒咁過東北之旅既最後一晚。

淨月潭國家森林公園

地址

吉林省長春市南關區淨月大街5840號

交通

可搭乘長春輕軌3號線至「淨月潭公園站」（正門）或「滑雪場站」（西門）

食完早餐，坐高鐵從長春去瀋陽，車程大概1個半鐘，快捷又舒服。抵達瀋陽之後，第一站去瀋陽故宮，位置沈河區瀋陽路171號，上午8點半到下午5點開放，下午4點15分停止入場。瀋陽故宮作為清朝早期既皇宮，比北京故宮更顯古樸靜謐，大政殿既八角攢尖頂、十王亭既對稱布局，彰顯住滿蒙漢多民族融合既建築風格。宮入面既文物陳列好豐富，從努爾哈赤既兵器到皇太極既玉璽，從宮廷服飾到生活用品，詳細展示咗清朝早期既歷史與文化。建議租個電子講解器，深入了解建築同文物背後既故事。

瀋陽故宮

地址

遼寧省瀋陽市瀋河區明清舊城中心

交通

可搭乘地鐵1號線至「中街站」或「懷遠門站」（步行10分鐘）

第二站係隔離既張氏帥府，上午8點半到下午5點開放。呢度係張作霖同張學良既故居，中西合璧既建築風格好有特色，大青樓既歐式風格同小青樓既中式傳統互相映襯，府入面既老虎廳、書房、臥室等場景保存完好，展示咗民國時期既生活場景同歷史事件，尤其是「西安事變」相關既史料，俾大家對呢位愛國將領有更深入既了解。

張氏帥府

地址

遼寧省瀋陽市瀋河區朝陽街少帥府巷48號

交通

可搭乘地鐵1號線至「中街站」或「懷遠門站」下車步行

遊完之後，就去瀋陽桃仙國際機場返程。出發前，可以買啲當地特色手信，例如「不老林糖」香甜軟糯，「瀋陽回頭」外酥裏嫩，都係送俾親朋好友既好選擇。