養柴犬【柴犬7件要事養前必讀須知】

【柴犬7件要事養柴犬前必讀須知】

日本犬係其中最多人養嘅莫過於柴犬，英文名叫Shiba Inu，響日本被養嘅品種超過80%係柴犬，主要原因係響六種日本犬之中，只有柴犬係屬於中小型犬，平均身高只係得40厘米左右，就算屋企面積唔大都適合飼養，柴犬唔止外型的骰，顏值亦相當可愛，所以響香港呢個寸金尺土嘅地方，養柴犬亦係頭號選擇，但唔好俾柴犬可愛嘅外表蒙蔽而掉以輕心，免得後悔莫及。柴犬屬於難訓練、服從性唔高、性格固執，有外國研究指出，柴犬基因響85種犬種中最接近狼，所謂細時唔教，大左你會訓唔著覺，如果你諗住養柴犬，或者你嘅柴犬毛孩只有幾個月大，呢篇文章絕對幫到你，養柴犬7大要領，知己知彼，係各位主人或準主人嘅責任。

1. 柴犬服從性低，應把握訓練黃金期

養柴犬嘅訓練黃金期係半歲之前，柴犬狼性高，響佢仲未懂事前，訓練有助提高柴犬建立階級觀念，認識邊個係主人，學識尊重主人命令，但前提係要佢認主亦有難度，建議搵專業人士俾意見再獻出愛與誠感化，柴犬亦因為狼性高，護食情況嚴重，唔好以為佢細細隻，咬你當𢯎痕，狼性驅使下柴犬攻擊力強，曾經作為獵犬咬合力唔係講玩，一個唔留神諗住幫佢執返地下啲狗糧隨時狗咬呂洞賓，所以柴犬半歲前BB期嘅訓練係非常重要。

2. 柴犬甩毛情況令人崩潰

雖然每個狗種嘅毛孩都會甩毛，但柴犬甩毛嘅情況相當嚴重，清理都令你心情灰過灰熊，柴犬踏入生育期、成長期、老年期、營養唔均衡、曬唔夠太陽、心情唔靚都會大量甩毛，建議從三方面著手。

飲食方面：食物中加入卵磷脂，可以提高狗狗毛髮健康，緩和大量甩毛嘅情況，避免毛孩攝取過量鹽分。

清潔方面：有啲主人好好，用自己嘅名牌洗頭水幫毛孩沖涼，好心做壞事，人用嘅洗頭水係針對人嘅毛髮設計，柴犬本身毛髮難打理，當然要用狗狗專用嘅沖涼液啦，同人肚餓唔會開狗罐頭食一樣道理，仲要定時為狗狗滅蟲，確保甩毛唔係因為皮膚病。

生活習慣：多啲出去曬下太陽，陽光中含柴外線有助殺菌，促進毛髮健康生長，要保持每日梳毛，防止毛髮打結。

3. 性格外向，渾身是電

柴犬性格外向唔係指佢鐘意交友，佢係精力旺盛需要放電，可以的話一日三次，每次半粒鐘，柴犬散步有助發洩過剩精力，你唔帶出街困佢響屋企，心情唔靚日日同你屋企大裝修你都幾頭痛，所以唔好懶，自己要返工最好搵屋企人帶去散步，否則容易出現行為問題，到時要撥亂反正就更加困難，後悔莫及。

4. 捕獵天性，交友困難

柴犬並唔係交友高手，其他毛孩主動示好隨時見紅，出門最好戴口罩、狗帶，主人應該主動帶領毛孩習慣同其他狗和平共處，捕獵天性令佢地見到行動快捷嘅野會相當興奮，尤其係貓，冇狗繩又服從性低，一時衝動連今晚返唔返嚟食飯都冇交帶就已經光速消失，叫都叫唔住，所以狗帶係出門必備，直到柴犬服從性提高先好慢慢俾佢自由奔跑。

5. 愛挑食，易肥

柴犬挑食情況不容忽視，佢唔鍾意食，佢就一啖都唔食，有好多主人會覺得佢肚餓到頂唔順就會食，最後往往係你頂唔順，柴犬長期食同一隻糧會導致挑食，建議半年至九個月換口味，盡量都係餵狗糧，亦唔好因為想佢可愛啲谷肥佢咩都俾佢食，柴犬骨骼有缺陷，體重過重會加劇柴犬骨骼問題，柴犬屬中小型狗種，腳嘅長度同支撐力不足以支持超重，唔好因為自己私心，害狗一生。

6. 性格高傲，獨立

柴犬性格高傲但絕對唔宅心仁厚，脾氣話嚟就嚟，平時唔鍾意俾人摸，柴柴唔屬於好黏人嘅狗狗，如果主人以外嘅人想摸就摸，隨時受傷，就算係主人都要留意柴犬嘅反應，如果狗狗明顯表達唔鍾意，就唔好再摸嚟摸去，柴犬思想獨立，咬傷主人嘅報導不絕於耳，當然訓練好緊要，但主人同狗狗之間嘅互相尊重就更加唔少得。

7. 天性頑劣，愛攪對抗

柴犬並唔係因為蠢而難教，反而學野好快，但天生比較曳，鍾意唱反調，你話去東佢就去西，考驗主人耐性，有時佢地明明聽到指令，但係會扮懵扮傻扮聽唔到，挑戰你獲取成就感，當佢唔聽指令嘅時候，唔好即時處罰，狗狗唔係你扯線公仔，多忍讓、多包容先係養柴犬最好嘅相處之道。

養寵物同小朋友BB仔一樣，最重要係有耐性，尤其係柴犬BB呢個比較難教嘅狗種，冇耐性又教唔好盞自己激氣，當然唔係每隻柴犬都難教，係咪乖柴柴取決主人風格，柴犬平時可愛有加，惡起嚟堪比阿媽，養前諗清楚，養咗先後悔就唔好啦，柴犬雖然適合大細家居環境，但唔係咁啱新手，要養你預左精神、時間、愛心、耐性決一不可。

🔼 新手可以養柴犬嗎？ 🔼

　新推出　

訂購到會服務熱門問題【不斷更新】

【10件養松鼠狗你要知道的事】

狗狗生日Party點慶祝？【3個寵物派對場地推介】

【狗仔寵物美容服務】奴才新手必讀 護理點止扮靚咁簡單？

【8件養哥基狗你要知道的事】

【養金毛尋回犬的8大黃金須知】

登入

註冊

【狗仔寵物美容服務】奴才新手必讀護理點止扮靚咁簡單？