法國鬥牛犬【養法鬥6大要點新手秘笈】

法國鬥牛犬屬小型犬，由英國鬥牛犬（即所謂老虎狗）、八哥及梗犬混種嘅寵物犬，英國鬥牛犬屬中型犬，戰鬥力強，自從1835年英國廢除鬥牛後，英國鬥牛犬就變成觀賞犬，而法國鬥牛犬並非嚟自法國，因為當年混種後好多工人帶住狗狗移民法國，而法鬥外表意外受到法國人喜愛，所以於法國走紅，再紅至歐美，所以叫法國鬥牛犬，時至今日，法鬥經已紅遍全球，唔少香港人都對佢好有興趣，可愛得嚟又夠霸氣！

⬆️  左：法國鬥牛犬｜中：老虎狗｜右：八哥犬  ⬆️

法國鬥牛犬外表與老虎狗及八哥相似，好多人都唔識分，法鬥嘅耳仔最具識別性，老虎狗耳仔通常向下垂，末端呈圓，法國鬥牛犬耳仔末端較尖，通常向上豎立；第二點法鬥額頭冇八哥嘅標誌皺紋；第三老虎狗同八哥尾巴較長，法國鬥牛犬尾巴好短，甚至根本冇尾，總括嚟講，法國鬥牛犬擁有英國鬥牛犬嘅犬名、八哥嘅外表、梗犬嘅耳朵，法鬥雖然外表吸引，但作為新手主人或者準主人，養之前最好了解一下養法鬥要留意嘅事項，睇下適唔適合自己，都係果句，養就養一世，切勿棄養任何寵物。

法國鬥牛犬不屬於高智商犬種，唔好諗住訓練佢表演，就連大小二便都要多次反覆訓練及調校，有可能初期飼養屋企會遍地黃金，甚至法鬥會以食糞便嘅方式，掩蓋隨地便溺嘅責罰，主人唔應該以打罵嘅形式訓練，以法國鬥牛犬嘅智商未必知你做緊咩，應該循循善誘俾多點愛心同鼓勵佢，以獎勵代替責罰，所以訓練法鬥要較大嘅耐心。

法國鬥牛犬皮膚係最明顯嘅先天性問題，雖然屬於短毛犬，但掉毛情況非常普遍，而且皮膚先天性較敏感，容易罹患毛囊炎等皮膚問題，所以生活環境、日常飲食非常重要，法鬥用嘅坐墊、狗袋、床鋪必須要勤洗勤消毒，一旦法鬥患上皮膚病，好難斷尾根治，平時飲食方面，選用低敏狗糧，配合魚肝油增強免疫力及抗體，減低皮膚過敏，貴係貴啲，但比唔上醫皮膚病嘅醫療開支，狗狗又可以減低受折磨嘅機會，另外蛋白質高嘅食物如蛋、乳製品、肉類，就唔好俾法鬥食咁多，大家要注意喇。

法國鬥牛犬出名玻璃胃、蝴蝶脊，簡單講即係一個字「脆」，法鬥之所以外型得意討人歡喜，因為容易向橫發展，形成圓碌碌嘅身形，法鬥脊骨較短而且如蝴蝶一般，即係比較脆弱嘅身軀，體型過重容易造成四肢、脊骨過度受壓，嚴重會導致癱瘓，而法鬥腸胃同樣天生唔好，每餐必須定時定量，否則容易引發腸胃炎，發到腸胃問題基本上舉世知名，所以坊間有專為法鬥腸胃問題而設計嘅狗糧，盡量避免乜嘢都俾佢食，佢龍體受唔起，仲要定時帶去獸醫度做身體檢查避免體重失控。

法鬥體能差，仲要容易肥胖，所以定時運動絕不能缺席，但因為體能差，所以每次運動都相當寶貴，法國鬥牛犬一日一次散步就足夠，大約半個鐘左右，但要留意法國鬥牛犬其天生骨骼構形唔正常，運動太劇烈容易氣喘、呼吸困難、甚至嘔吐，所以要留意如果發現法鬥呼吸聲變大轉急，要慢慢Cool Down佢，亦唔好怕麻煩剝奪佢寶貴嘅運動時間，均衡飲食同運動量人同狗都一樣咁重要架。

法國鬥牛犬皮膚比較柔軟，身上會出現如老虎狗一般嘅皮膚皺褶，所以做主人嘅你必須勤加清潔，好多人養過法鬥嘅朋友會話佢哋嘅體味大，其實就係因為皮膚奏摺入面嘅污垢難以清除，臭都算啦，奏摺入面嘅污垢亦容易令法鬥皮膚敏感，引致皮膚炎症，主人應視梳毛、抹身、抹手腳成為日常作業，好好護理佢矜貴嘅皮膚，如果你懶得攪咁多嘢，請你唔好養。

法國鬥牛犬本身狗價高昂，養飼費亦高，就算冇病冇痛，亦要經常帶去獸醫做身體檢查，由於先天性毛病只能控制，無法根治，所以養法鬥係一場昂貴且提心吊膽嘅旅程，筆者非常不恥棄養行為，醜話講左先，唔好因為佢得意你就話養，法國鬥牛犬非常多當紅歌手明星飼養，如果你喜愛嘅明星有養你又走去養，不過缺乏充足嘅時間、耐性、金錢嘅話，就非常不負責任，所以打算飼養法鬥前務必諗清諗楚。