【吸血鬼害蟲？】消滅木蝨6個方法

【吸血鬼害蟲？】消滅木蝨6個方法

如果發現，身上多左好多被咬既傷口，又痕又辛苦，而且通常係瞓覺既時候被野咬，好大機會屋企、被鋪、床褥入面埋藏木蝨，點樣確定自己係俾木蝨咬？木蝨點解會有？木蝨又係咩？點樣解決消滅木蝨？木蝨真係令人好煩既害蟲，一旦遇上切須盡快解決。

木蝨（英文: Bedbug） 亦叫做床蝨或者臭蟲，以吸食人血為生既寄生蟲。 點解叫臭蟲？係因為木蝨既身體會散發出臭味，用黎促進交配，同埋用黎防禦敵人，木蝨會係經過既地方留低呢D臭既氣味，又會留底啡黑色既糞便係棲身之地。而香港最常見既臭蟲，就有2種，熱帶臭蟲（Cimex hemiperus）和溫帶臭蟲（Cimes lectularius）。

木蝨主要分3個階段，由蟲卵、漸漸變成若蟲（昆蟲既幼蟲稱呼）、最後成蟲，中間大概需要30至40日左右。

木蝨既身體係吸血前會扁平，吸完血就會漲，而且顏色會變到深紅色，一般壽命會有1年左右，雌性既木蝨只要交配一次，每日就可以產出5至6粒卵，大概會生出75至200粒卵，最多係可以去到500幾粒。

點解小編會話木蝨真係令人好煩既害蟲？因為木蝨一年到黑都係會活動既，因為好怕光，所以特別鍾意匿係又隱蔽又陰暗既地方，例如衣櫃、牆身、床既邊緣、木板、地毯等，特別係一到夜晚就更活躍，木蝨通常隔24至48小時吸一次血，就算唔吸血，木蝨都可以存活150日至160日，成蟲每次吸血都會吸10到15分鐘。

木蝨唔會直接係人身上爬，反而會利用人既體溫同呼出既二氧化碳去搵適合既人，痴係衣服，或者床單等物件去接近人，再吸血，而且體溫越高，越容易吸引到木蝨咬。當人俾木蝨咬到既時候，由於木蝨會係吸血既時候分泌出麻醉毒素，人被咬果陣未必即時有感覺，反而係之後出現痕癢同紅腫既反應，而且仲會發現咬痕會出現一堆或者一串既。

屋企乾淨，唔代表唔會出現木蝨，因為木蝨出現既原因有好多，基本上好多都係外面帶返屋企，例如旅行既時候住既酒店或旅館，D木蝨依附係行李箱，衣服，或者其他物件上，咁就不知不覺咁帶左返屋企。又或者而家D人為左環保，或者慳錢，會善用二手傢具，而呢D二手傢具有可能已經存在木蝨。甚至，可能由隔離鄰舍傳過黎。

咁點樣解決木蝨？

矽藻土粉係一種海洋礦物，含有高濃度矽，可以刺穿木蝨既外殼，令牠慢慢脫水乾死，由於木蝨無法對「DE粉」產生抗體，所以係有效解決木蝨既方法之一，而且「DE粉」對人體無害既天然殺蟲劑。使用時只要將「DE粉」直接掃或放係木蝨出沒既地方，例如陰暗既隙縫同角落，床架、牆角、地線位、裂縫，插頭位等等。

近年比較多人用天然既滅蟲劑，硼酸鹽，比硼砂既硼含量仲要高，亦更安全。硼酸鹽可以破壞木蝨既器官，同「DE粉」有一樣既功效，可以令木蝨脫水而死。而市面上買到既硼酸鹽，例如「天鹽清」、「無敵士」等，都係粉狀，所以買返黎需要自行溝水使用，然後放入噴壺，再噴向D衣物、床單、被鋪、窗簾、雜物等物件上，如果連埋「DE粉」一齊用，效果更加顯著。

用矽藻土與硼酸鹽都要等一段時間先完全滅絕木蝨，如果唔想再俾木蝨咬，就可以使用蝨怕水。雖然蝨怕水唔可以殺死木蝨，但能夠以刺鼻既氣味驅趕。

而一般蝨怕水成份含有苦楝油，當中既成份苦楝素係有殺菌、除蟲既功效。係瞓覺之前，直接用係外露皮膚上，或者滴係枕頭及被單上。由於成份天然，貓狗等寵物都適合用。

因為木蝨唔受得高溫，不妨考慮利用不低於80°C既熱水清洗，或者可以噴出約80°C高溫既手提蒸氣機，去消滅家具、衣物表面及藏係細縫既木蝨。

如果較為輕微，大家亦可以用吸塵機吸走D木蝨，但記得要清潔乾淨部吸塵機，用袋裝好D木蝨，亦可加入殺蟲劑，令吸入既木蝨死亡。

但如果自己處理左，都係發現D木蝨既問題無改善，小編建議大家搵滅蟲公司處理，始終佢地處理方法比較專業，而且木蝨唔似其他害蟲咁容易解決，必要時，真係直接搵滅蟲公司，唔好俾木蝨蔓延開。