夏蕙姨既意思係西多士，點解西多士叫夏蕙姨？西多士傳統食法係淋上糖或者糖膠，簡稱「淋膠」，而夏蕙姨曾經同粵劇演員林蛟拍拖，所以後來「夏惠姨」就成為左西多士代語。

汪阿姐既意思係熱啡，源自汪阿姐既首本名曲「熱咖啡」。

肥妹既意思係朱古力，因為朱古力高熱量，飲過量隨時會導致肥胖問題。

敗家仔既意思係阿華田，茶餐廳賣「阿華田」俾客人，都係賣田既一種，古時最典型既敗家仔當然是係將屋企既田賣左俾人既不孝兒女，所以阿華田就叫敗家仔啦。

由於「靚仔」都係指青靚白淨既男仔，所以就用來代表白飯嘅代號。

有靚仔又點少得靚女，「靚女」生得又白又滑，當然用來代表綿綿幼滑既白粥。

「下火」指皮蛋瘦肉粥，因為皮蛋瘦肉粥可以下火，同時又叫「有味粥」。

鴛鴦係奶茶溝咖啡既飲品，但點解要拆散？ 「鴛鴦拆散」其實即係客人分開左叫一杯奶茶同一杯咖啡。

「印度老舉」係指我地叉雞（叉燒加雞肉），舊時香港人將印度籍貫既警察稱為「阿差」，諧音為「阿叉」，而「老舉」係指雞。茶餐廳就將「印度老舉」變成叉燒加雞肉既代號啦。

「燒衣」係指乾燒伊麵，係諧音「燒伊」既寫法。

「制水」係指乾炒牛河，當「河」流「乾」左水，咪就要節制用水囉。

「咪嘔住」係指鹹牛肉三文治，因為廣東話既「牛」 同「嘔」發音相似，而「治」又同「住」發音相似，於是「咪嘔住」就變成鹹牛肉三文治既代號啦。

「飛沙走奶」當中個「沙」係砂糖，「奶」就指牛奶或煉奶，如果一杯咖啡要「飛沙走奶」，咁就指齋啡啦。

「戴帽」係指加一只煎蛋。

「細路仔鴛鴦」係指好立克加阿華田溝埋。

「凍大個仔」係指凍咖啡。

「凍大個女」係指凍奶茶，另外凍奶茶仲有另一個叫法「涼茶」。

「女人」係指藍妹啤酒，因為「女人」2字既筆劃較少，落單既時候可以寫快D，加上「藍妹」又係女人，所以有呢個名啦。

「和尚跳海」代表「滾水蛋」，即係加入生雞蛋同砂糖既熱水。雞蛋蛋黃似光頭和尚，蛋白落入熱水中就似飄落既袈裟，所以就將「滾水蛋」叫做「和尚跳海」。
如果係用煉乳代替砂糖，就變另一款飲品「奶水蛋」。

打爛即係代表炒飯，係炒飯既時候需要加入雞蛋，而加入前要「打爛」雞蛋，
演變成「打爛」兩字就係炒飯既代表名稱。