英雄飯 vs 解穢酒【了解喪禮後既飯宴】

「纓紅意思」

其實英雄宴，正確寫法係纓紅宴，本身同英雄無任何關係既，只係好多時寫成同音字為「英雄」，或「應紅」，而「纓紅」係指纒繞紅事，神主牌已經可以綁上紅帶，「簪花掛紅」有脫白既意思，按照廣東人傳統既習俗，辦完喪事後 ，即係先人上山後入土為安啦，亦唔會再進行法事啦。由於係香港可以土葬既地方唔多，所以通常係火葬場完成左火葬儀式之後，親朋戚友就會即時除左孝服，即係脫孝，咁等於孝期完結左，當日家屬會安排酒菜招待親朋戚友，代表食完之後可以有纒繞不盡既紅事會來臨，喻意為好意頭。

「纓紅菜式」

纓紅宴(英雄宴)通常係8個菜式，1道甜品，雖然纓紅宴唔算係白事既一部分，但始終都係處理完喪禮，心情都仲係處於難過階段，家屬安排大家食餐纓紅飯，而且都會安排食得豐富D，同埋會先由糖水開始食起，意思係希望將先人既福蔭留返俾子孫，並且事情已完滿結束，喜事成雙。菜式方面，通常會有雞，燒肉，魚，生菜，鮑魚等，但切忌要留意，要避免有「瓜」字既菜同生果，糖水方面亦要避免蓮子糖水，因為意頭唔好，肉類就避免食牛或馬肉，因為據說牛頭馬面係先人既新朋友。

「纓紅利是」

另外，當食完纓紅宴之後，家屬通常會派「纓紅利是」俾有出席既親朋戚友，入面會有扁柏、紅繩、紅綠線、針同埋雙數金額既錢，不過而家就比較少放針入去，因為安全問題。如果只係出席完火葬儀式，而無去纓紅宴既人，亦可以由自己屋企人代收，然後再交返俾當事人。要留意返一點，纓紅利是同吉儀係唔同嫁，纓紅利是係可以拎返屋企。