護士轉行可以做咩？5大發展出路助你轉換「士」途

正係做緊護士或修讀護士課程嘅你有冇諗過轉行？護士係一份專業，真係發覺唔適合自己嘅時候，會唔會因為太專業而導致轉行出路狹窄呢？香港嘅護士一般分為兩個類別，註冊護士及登記護士，工作職能大同小異，最大嘅分別係註冊護士可以獨立工作，登記護士有某些工作需要有註冊護士監督下進行，兩者並無高下之分，但登記護士無明確嘅晉升階梯，可以十年後仍然是登記護士，所以註冊護士轉行可能因為辛苦或唔適合自己，而登記護士轉行的話，仕途發展好可能係原因之一，有人話專業人士難轉行，本文會同大家分享護士呢份專業轉行嘅5大方向，有咩出路擺喺眼前呢？

無論你係註冊護士定登記護士，入職前都需要修讀相關課程，註冊護士一般要修讀為期四年嘅課程，登記護士亦要修讀為期兩年嘅課程，或者由私家醫院舉辦護士課程，所以兩者對醫療常識有一定了解，只是註冊護士無論喺課程上或實質工作上，會有更深入嘅了解。

護士嘅工作都逃不過要捱更抵夜，香港醫院尤其公立醫院面對人手不足嘅問題，好多醫生護士都因為要照顧太多患者疲於奔命，所以如果想繼續用到護士專業知識，可以試下應聘私家看護，通常只係一對一照顧，招聘嘅多數係有錢人，主要提供日常護理及檢查身體指數，遇到緊急情況送院前可能需要一些急救技能。私家看護或私人護士待遇不比醫院差，但工作量一定差好遠，當然，競爭亦非常劇烈，一般有經驗，應變能力及溝通能力高佔優。

陪月員在香港一直供不應求，雖然香港面對生育低嘅問題，但香港父母對陪月員嘅要求甚高，相對俾得起費用嘅家庭亦大有人在，陪月員唔單止要照顧初生嬰兒，亦要照顧媽媽，如果陪月員有護士嘅工作經驗，亦有修讀過陪月員嘅相關課程，將大受父母歡迎，坊間好多陪月員都係靠經驗嘅「大媽」，而擁有護理經驗、專業知識嘅陪月員，競爭力高而且絕對有價有市。

香港無論公立定私家醫院，對於醫療器材或日常消耗品（如針筒、棉花、手套等）都有龐大需求，作為曾經於醫院工作嘅一員亦係用家，對於現時醫療器材或用品嘅不足之處會有更具體感受，轉行做醫療機構銷售員除咗提供更好嘅用品俾醫院外，亦唔會浪費之前響醫院工作嘅人脈，做銷售梗係識人好過識字，仲要以前可能係好好感情嘅同事，就更加容易開口，仲可能會幫你宣傳埋，所以工作時間比較自由嘅銷售員係一個轉行嘅好選擇。

經驗豐富嘅護士從業員如果想返工時間穩定啲，又唔想捱夜的話，可以考慮成為護士嘅老師甚至乎大學嘅客席講師，利用自己工作經驗同專業知識，培育一班有熱誠及專業嘅新護士，作為護士嘅老師可以於大學、IVE或者醫院嘅護士學校任教，雖然不用捱夜，但工作量亦不容小覷，當然待遇唔會差，經驗豐富的話隨時收緊比做護士更高嘅報酬。

護士轉職做保險代理嘅例子比比皆是，透過本身嘅經驗及經歷可以更具體與分享保險嘅重要性，而喺醫院嘅工作經驗亦會經常接觸保險事務，轉行做保險代理當然更加如魚得水，另外，保險公司每日面對海量嘅保險索償，當中需要專業人士去釐定該索償嘅合理性，如果往往由醫生判斷的話，對保險公司嘅成本比較大，護士擁有嘅醫療知識亦可以應付一般保險理賠申請，同樣唔會浪費自己嘅優勢及知識。