【貓中暑】如何夏天避免中暑？

【貓中暑】如何夏天避免中暑？

夏天到左，屋企有貓主子既話，就要留意一下貓主子身體狀況，因為寵物都會出現中暑症狀，而且家貓比較矜貴，寵物中暑會有幾種症狀既，又如何係炎炎夏日避免寵物中暑，大家做奴才一定要留意一下，因為中暑嚴重既話係有機會令到寵物死亡嫁，發現得太遲就返魂乏術。

如果發現貓主子有奇怪行為，大家可以留意一下係咪太熱，例如精神萎靡，呼吸沉重，心跳又快又急速，對平時食開既食物同零食完全無興趣，或者完全無心機玩，而且可能一直昏睡，不過亦有機會係完全唔休息，要視乎情況。但當貓主子體溫去到40℃以上，就已經代表中暑啦。

甚至，當貓主子出現眼瞼邊緣同口腔黏膜充血既時候，奴才就要留神喇，唔好等到主子昏迷先處理啦，應該要盡快帶主子去睇獸醫。

如何預防貓主子中暑？

小編知道有D貓主子勁唔鍾意飲水，但各位貓奴都要注意喇，因為飲水都會係降溫既方法，建議貓主子每日飲水量為50cc X 每公斤體重，平時為左避免貓主子腎病，所以飲水非常重要的，可以餵食罐頭、濕食，屋企多放水盤，飲水機，多加換水， 最好每日幫佢做埋統計攝水量。

避免貓主子毛過度厚同太長，形成死結積聚，所以勤力D幫忙梳毛護理，令到貓主子體溫可以容易散熱。但千萬唔好幫貓主子剃光D毛，因為會影響到貓主子失去阻擋紫外線既功能，令貓主子皮膚更容易受到傷害。

如果屋企空氣唔流通，特別日頭未必有人喺屋企，可以利用風扇或者涼墊俾貓主子嘆下，貓窩都需要準備個通風透氣俾貓主子休息。

因為露台通常直接曝曬既機會大，而且溫度又高，如果將貓主子放係露台，大大增加左中暑機會，日光浴唔係隨便玩架。

發現貓主子中暑，需要即刻將貓主子放到空氣流通同陰涼既地方，然後打開風扇或冷氣，令到環境既溫度降低。然後可以用濕毛巾幫貓主子抹身，同埋要餵貓主子飲水，可以考慮用針筒餵就更快捷，但如果貓主子唔願意就唔好勉強。如果嚴重，必須要將貓主子送院由獸醫處理。