【貓主子奇怪行為】3個喵星人意想不到的舉動

第一次成為貓奴才既你，係咪成日都百思不解自己既貓主子點解會有好多奇怪行為？ 貓星人怪異舉動令人類又愛又恨，特別係第一次養貓嘅你肯定滿腦子疑惑，今次小編就同大家講解3樣貓主子常見既奇怪行為，各位貓奴一定見過無數次自己主子做過呢3樣行為！

貓主子經常走埋嚟要求你拍屁股扭計要按摩，拍得主子開心，佢仲要唔俾你停手，到你拍到攰想休息，佢即刻俾反應你，喵過唔停，直到你再拍佢個屁股。點解會咁？唔係主子想俾你打，而係因為貓既屁股有個叫『百會穴』既穴位，對主子嚟講按摩呢個穴位會好舒服，還可以促進主子身體健康同放鬆情緒，而且，主子尾巴附近神經分佈密集，對貓奴既觸碰比較敏感，所以適當既力度，係會令到主子特別舒服。另外，主子係幼貓成長階段，母貓會幫忙舔拭小貓既屁股來幫助排便，所以成年後既主子被貓奴撫摸或拍打屁股時，會將貓奴聯想成母貓，表達親密、視貓奴係家人既表現。

不過，並唔係所有主子都鍾意拍打屁股嫁，如果發現主子反感，就好停手啦，激嬲主子，相信大家都知道會有咩後果。可以留意下主子唔想再被摸或拍打既反應，例如主子開始大力甩尾巴、肌肉緊繃、瞳孔放大，耳朵變平，或者開始突然想咬人，奴才們就好停手喇！

相信好多貓奴都經歷過，買左好多超正既貓跳台、貓窩、玩具等去粉飾屋企，點知自己既主子眼尾望都唔望一眼，搞到屋企放滿晒，都吸引唔到主子，但結果喵星人鍾情於紙箱、紙盒、膠袋同紙袋，總之任何主子鑽得入去既空間，都會有想要挑戰自己身體極限將自己塞入去，會玩到興高采烈，真係令到貓奴諗唔通，兼心灰意冷！

其實因為貓主子覺得紙箱，紙盒既能保暖又可以釋放壓力，主子又能藏身、放鬆心情、瞓覺休息。而且，主子天生就有狩獵既本性，匿藏係盒入面，等待補捉獵物既習慣，同時又會有安全感同舒適感，可以保護自己，避免天敵與其他攻擊者既威脅。另外，貓主子既嗅覺本來就好靈敏，箱和袋都有唔同既外界既氣味，令到主子感受到興奮，加上膠袋係主子玩既時候，發出聲音，令到主子覺得聲音特別似枯葉既沙沙聲音，就好似野外補捉獵物時既情景。

但各貓奴要留意自己主子，唔好俾主子食膠袋，因為誤食塑膠物質，有機會令到主子腸胃消化分解唔到，輕則好容易引起主子嘔吐，嚴重既因為排唔出而引起腸梗阻，更可能會未及時發現，而引致喪命。

有時候會見到主子坐姿會出現折折手動作，感覺特別可愛，一幅賣萌放電既樣子，其實有原因嫁。因為主子身上汗腺唔發達，肉墊平時用作散熱同排汗，咁為咗避免熱量散失過多，就將爪收係自己身下面保暖同取暖啦。另外，主子對陌生環境好敏感，而折手坐姿會唔方便逃脫，但見到主子做呢個動作，代表身處呢個環境感到熟悉安心，同埋呢個動作令到主子舒服，甚至代表主子極度信任貓奴，無發生危險情況。

但有時候，主子會因為覺得貓奴好煩，所以唔想俾貓奴現爪，就會收埋，最多時會想避免俾貓奴剪指甲，故意收埋。