【貓瘟知多點】4大貓瘟常見問題

相信大家都有聽過貓瘟，但咩係貓瘟？會有咩症狀？如果自己既寵物出現貓瘟，應該點樣做？貓病左，除左貓會難受之外，貓主子一定又心痛，又難過，所以大家預早了解多D貓疾病特徵，正所謂預防勝於治療，一旦不幸染上，特別係幼貓BB，亦可及早治療解決，以免狀況加劇嚴重！

⬆️ 初生幼貓好容易感染到貓小病毒 ⬆️

貓瘟，另稱貓小病毒性腸胃炎或貓泛白血球減少症或貓傳染性腸炎，係由貓小病毒 (Feline Parvovirus) 感染所引起既病毒性傳染病，會抑制骨髓既造血細胞。貓小病毒特別鍾意係分裂旺盛既細胞中繁殖，特別係6個月以下既初生幼貓，同埋未接種過疫苗，或未接種所有疫苗既貓，初生幼貓既死亡率超過90%。而且貓小病毒適應力強，傳播率高。

⬆️ 貓砂盆係病毒傳染既高危地方 ⬆️

貓瘟會透過直接或間接接觸到已感染左貓瘟既糞便、嘔吐物、口水等，或被沾染過既物品，例如貓砂盆。或者無接種過疫苗既貓媽媽都會垂直感染給俾幼貓。就算康復之後，一年內仲可能持續經由糞便排毒，而有可能出現二度感染，形成左惡性循環，所以記得要經常清毒貓既所有用具。

貓瘟平均潛服期大概要4至7日，比較明顯既症狀包括，發高燒（會超過40度）、厭食、嘔吐、脫水、肚瀉（糞便仲會帶血或者帶腥臭），甚至出現精神沉鬱，嚴重既話，仲會因為免疫力下降，白血球急速減少，令到其他病菌有機可乘，例如引發起繼發性肺炎。如果懷孕既媽媽亦會有機會出現早產或流產既情況。

貓瘟暫時係未有有效既藥物治癒，但通常獸醫都會先用貓瘟快篩試驗來確診，但如果係潛伏期內，快篩試驗就未必完全100%準確。一旦確定中左貓瘟，咁一定要將屋企所有貓隔離，以免傳染俾其他貓。

獸醫為左防止貓出現嚴重脫水情況，會利用輸液治療。同時，會開抗生素俾貓食，減少二次性細菌感染或敗血症或其他併發症既情況，再配合干擾素，抑制病毒。當然，預防勝於治療，最好係幼貓8-12星期大既時間內安排接種疫苗，尤其當幼貓唔食或無得食貓媽媽既奶之後，幼貓既移行抗體量會開始下降。所以一定要打預防針。

市面上有幾款疫苗可以幫貓預防唔同既疾病，大家不防考慮一下，詳情可以向獸醫查詢同了解。