辦公室政治生存法則2023【職場只有Yes Man？】

辦公室政治生存法則2023【職場只有Yes Man？】

辦公室政治可以話係易學難精，精髓在於響有限嘅資源下，以利己為前提透過手段、人際關係提高自身喺職場競爭力，有人認為任勞任怨、有求必應，做埋人地果份就係辦公室政治下嘅生存條件，但最後只會被搶去功勞，成為公司其他同事嘅奴隸，Yes Man極其量只係唔會被討厭，但上司睇唔到你表現，同事當你工具人，當有鍋要揹嘅時候，往往首當其衝成為犧牲品，所謂人善被人欺，我哋唔需要諗辦法損人利己，但要係職涯識得保護自己，尤其是職場新人，參考以下5條辦公室政治生存法則，盡量保護自己，但最重要都係臨場應變，即係執生。

要響波譎雲詭嘅辦公室政治下生存，要學識少說話多做事，而少說話比多做事更重要，少說話唔代表唔講嘢，而係唔好懶醒，講個例子，職場初哥一般都有舊同事帶你做嘢，可能對同一個工作你有更快捷嘅方法，但係千祈唔好懶醒提出改善，你可以私底下用你嘅方法，直到同事發現你效率比佢哋高，向你請教時，第一唔好認你做得快，否則你會多左好多野做，第二將光環放喺教你做嘢果位同事身上，因為佢教得好，好有耐性，所以你做嘢先冇咁多甩漏。講說話三思而行，一個新人太想表現自己會另其他人產生危機感而產生敵意，而教你果位同事亦會多左句口頭禪，「你咁叻！唔駛問我啦！」

辦公室政治中最常見，亦好難處理得好嘅就係埋堆，所謂埋堆即係進入某個小圈子與他人混熟，大型企業更加有多個小圈子，而小圈子與小圈子之間暗底裏存在敵對關係，筆者認為埋堆係剛入職場嘅生存之道，學校係社會嘅縮影，唔埋堆嘅人通常被杯葛、甚至被欺凌，因為出事嘅時候冇人幫忙，職場都一樣，冇人有義務幫你，除非大家同一條腸、同聲同氣，埋堆唔係壞事，有人會認為如果自己埋錯堆，會俾人針對，所以唔埋堆但又兩頭唔到岸，其實到你果堆勢力沒落，你亦已經有咁上下經驗，轉工又得、自行建堆又得，如果連開始都過唔到，注定冇一份工你做得長。

遠離是非不等於遠離是非圈，遠離是非係選擇，留在是非圈係職涯生存技巧，如何遠離是非首要第一件事係唔好主動講其他人事非，切忌講是非當人情，次要係避免回應任何事非，以傻笑或點頭附和應對，必要時以可圈可點嘅答案迴避，例如同堆內有人講A君是非，又問你睇法，你可以講同A君比較少接觸，下次有機會留意下，要識得避重就輕，否則你作為一個新人講其他前輩壞話嘅消息好快全公司都知道，你就更加難做人。

好多人收工就即刻返屋企，避免出席同事間嘅聚會，例如Happy Hour，覺得浪費自己私人時間去同同事打交道，辦公室政治生存法則中人際關係因素佔咗好大比例， 正所謂識人好過識字，而人際關係必須時間建立，如果約親都唔去，慢慢會被同事孤立，其實可以選擇性參與，參與者愈多愈應該要去，因為你作為新人應該多啲認識及掌握公司勢力分布，邊個係方丈咁小氣、邊個係皇親國戚，呢啲情報好緊要，但都係果句，用心聆聽，避免發言。

每個人都鐘意聽好說話無可厚非，但新人擦鞋出哂面又缺乏技巧容易令人尷尬，有實力嘅同事睇你唔起，金牌擦鞋仔唔妥你，到時你就淪為同事笑柄，要記住辦公室政治先求生存再求上位，唔好急功近利，而職場生存法則係中庸之道，新人太標青，公司對你會期望會提高，出錯就好覺眼，失望感加劇，但不宜過份低調，否則做幾多都冇人見到，仲會愈來愈多嘢做。