辦公室風水禁忌中的7個不該【提升事業運錦囊】

辦公室風水禁忌中的7個不該【提升事業運錦囊】

事業未有躍升？想提職場運程？對於辦公室風水堪輿學，信則有，不信則無，覺得自己事業運唔夠好影響前程、小人太多、是非太多？可能響工作環境中不經意觸及辦公室風水禁忌，當然，事業發展同本身工作能力、背景、際遇都有好大關係，但所謂三分天注定，七分靠打拼，堪輿之說如果無傷大雅，亦能力所及，不妨一試，運氣嘅嘢，話嚟就嚟。本文助你一臂之力 ，讓你事業運程一帆風順！

唔好以為辦公室風水一定要大費周章，其實風水禁忌好多時同個人習慣有關，第一個辦公室風水禁忌，唔需要錢去堆砌，亦唔需要專業知識，一張雜亂無章嘅辦公枱已經係最常見嘅辦公室風水禁忌，工作環境氣場紊亂，影響思考判斷、或做錯決定，加上你老闆見你張枱亂過五胡亂華，對你嘅印象分都唔會好啦，唔敢施以重任，咁你事業運又點會好呢？井井有條嘅工作環境可以提升個人精神同思考能力，下下要某一樣野都大海撈針，影響工作效率之餘更加影響工作情緒。

好多人會靠綠化工作環境提升事業運，於辦公枱上放置植物或盆栽，吸收陽光、淨化空氣、更可紓緩疲倦，辦公室風水禁忌中工作環境嘅好壞係一大重點，好嘅工作環境提升氣場之外，亦提升工作效能，效能提高自然有助提升事業運程，但有兩大禁忌一定要注意，第一，植物屬陰，為植物或盆栽綁上紅絲帶方可轉陰為陽；第二，植物體積切勿過大，容易功高蓋主，影響仕途。

所謂人搖福薄，樹搖葉落，辦公室風水禁忌中辦公枱或辦公椅如果因為老化，導致出現搖晃，絕對會影響事業運，正所謂四平八穩，搖搖欲墜容易跌倒，職位升上神枱都冇用，地位搖搖欲墜，應以安全理由向公司提出加固辦公枱或辦公椅，如太舊應立即更換，而因桌椅搖晃而發出嘅聲音，屬於噪音，容易干擾工作，影響表現之如，亦可能引黎小人陷害。

人嘅命運可以睇面相，工作運勢就可以睇桌面擺設格局，大家成日聽到嘅左青龍、右白虎原來都可套用於辦公室風水禁忌，青龍代表東方，白虎代表西方，即係東西座標，「龍忌靜、虎忌鬧」所以會發出聲響嘅嘢例如喇叭、手機、影印機等電子物品忌擺放辦公枱嘅右邊，文件、擺設等死物忌放左邊，有助提升事業運。唔信大家可以睇下你老細或者上司，大部分辦公桌左面都係置放動態物品，右邊就擺靜態嘅野！

座位附近亦切忌放置垃圾桶，垃圾是穢氣之源，長期放響自己附近會影響自己嘅職運氣場，如果必須要放置垃圾桶，最好用有蓋嘅垃圾桶，亦避免唔好咩垃圾都掉入去，尤其係零食包裝、外賣盒、紙巾等，容易招惹蚊蟲烏蠅滋生細菌，蚊蟲屬陰性，會破壞仕途運程，垃圾桶入面嘅垃圾最好係得文件或者棄置嘅文具，如果垃圾桶入面無可避免出現其他垃圾，最好每日清理，避免穢氣累積。

對一個人嘅仕途運勢，靠山亦非常緊要，不過呢樣可遇不可求，但好多公司都設立於城市當中，邊度搵座山出嚟背靠？辦公室嘅山即係牆，如果辦公椅背靠牆壁，有利工作者嘅事業運程，有利穩固地位，有效提防小人是非，但如果分配嘅辦公椅無可背靠嘅牆壁或只有玻璃，屬辦公室風水一大禁忌，對公司地位容易產生動搖，建議搵張高背座椅，即係椅背高於坐低左嘅你，都能收靠山之效。

最後，好多女士都會觸及嘅辦公室風水禁忌，就係響辦公枱上放置鏡子，女仔貪靚以鏡子經常整理儀容無可厚非，但鏡會將陽氣反射，成日照會影響情緒波動，加上鏡子屬陰，一旦鏡面誤對公司大門、廁所更會形成鏡煞，唔好話事業運，隨時健康都會受到影響，如果非要放置鏡子，建議用有蓋嘅鏡，唔用果時閂埋佢，可以減輕鏡對事業運程嘅影響。