運動後食嘢會肥？【減肥瘦身的誤解】

運動後食嘢會肥？【減肥瘦身的誤解】

好多都市人而家都好注重身體健康同體態形象，想減重瘦身而去健身、跑步、做瑜伽，小編相信大家係做完運動之後，都潛意識選擇唔食嘢，因為覺得做完運動之後食嘢會好吸收，令到體重磅數反而會反彈上升，仲肥咗，但如果小編話你知，做完運動之後食嘢，反而會更瘦，大家又點睇呢？

英國公共醫療National Health Service (NHS) 既醫生Dr. Frankie Jackson-Spence指出因為做運動既時候，會消耗大量肌肉內儲存既能量，尤其係重量訓練或者激烈既運動，例如跑步，HIIT，TABATA等運動，會造成肌肉微撕裂（Muscle Micro-tear），繼而促使肌肉蛋白既合成，當肌肉修補完之後就會變得更強壯。而碳水化合物可以補充返能量，亦確保肌肉可以運作正常，另外蛋白質就可以幫助修復同促進肌肉既生長。簡單D講，有助補充身體所消耗既能量，令到身體回復狀態，同時提供養份給肌肉修復同生長，當肌肉越強，新陳代謝率就會越高，所以身體消脂速度就越快。

做完運動之後進食既黃金時間，最好就係30分鐘至1小時之內，運動完後肌肉細胞會經過消耗能量同收縮既刺激，適當既能量補充，其實反而唔容易堆積脂肪，相反仲可以修補肌肉。

做完運動之後要食咩先唔會肥? 大家可以依照自己運動既強度同時間，去選擇補充運動後黃金比例既飲食，再視乎大家既目標係增肌，定係減脂，根據美國飲食協會及美國運動醫學會既建議，做完有氧運動之後，補充既碳水化合物及蛋白質既比例係 3-4 : 1。如果係肌力運動，例如重訓，咁碳水化合物同蛋白質既比例係 2-3 : 1，就可以達到最高效率既肌肉合成。熱量就大約250至300大卡，進食時更加要注意細嚼慢嚥。同時一定要避免進食高油脂食物，因為油脂會令到碳水化合物同蛋白質既消化變慢。