【電車派對全景遊2021】流動Party Room 懷舊叮叮感受香港特色

除左船P、唱k、Party Room外，開派對搞Function仲有咩特別選擇呢？甚有香港特色嘅電車派對會係一個唔錯嘅選擇，電車派對全景遊有如流動派對房間，一邊感受派對氣氛，一邊觀賞香港優美景色，一舉兩得，香港首部電車於1904年正式投入服務，迄今超過100年，咁有歷史價值嘅交通工具遙身一變，成為派對場地，已經非常吸引，加上電車行駛速度慢，飽覽街景、建築物未至於走馬看花，唔好諗住電車車身窄，開電車派對只係噱頭，車內除左有主題房間外，冷氣、燈光、音響、甚至洗手間都有。飲食方面，香港電車亦有同唔同嘅到會承辦商合作，提供多人套餐或單點美食到會，更加有酒水供應，體驗唔會差得過傳統Party Room，但要特別注意，參與電車派對嘅參與者，必須已接種第一劑新冠疫苗！

電車派對全景遊路線圖

派對電車起點及終點

🔽 西環屈地街電車廠 🔽

要預約電車派對，可以響香港電車網站提早7日預約，中途可以加上客及落客點，但要香港電車同意允許，電車派對最短行程為2小時，最長則3.5小時。

電車派對2小時派對電車路線

屈地街電車廠 ▶️ 銅鑼灣 ▶️ 跑馬地 ▶️ 屈地街

電車派對2.5小時派對電車路線

屈地街電車廠 ▶️ 北角 ▶️ 屈地街

電車派對3小時派對電車路線

屈地街電車廠 ▶️ 北角 ▶️ 跑馬地 ▶️ 銅鑼灣 ▶️ 屈地街

電車派對3.5小時派對電車路線

屈地街電車廠 ▶️ 筲箕灣 ▶️ 銅鑼灣 ▶️ 屈地街

派對電車的選擇

電車派對一共提供5款派對電車作預約，各有特色及功能，分別係普通載客電車、綠色古典派對電車、紅色古典派對電車、「電車全景遊」派對電車及Tram No.18，每一款背後都有不同故事，絕對係最能夠代表香港嘅交通工具！

介紹俾外國人之選：普通載客電車

能容納40人，車內陳設跟一般電車無異，純粹係遊下電車河，沒有到會美食服務，亦沒有360度開篷景觀，比較適合電車愛好者作拍攝場地。

婚紗攝影之選：綠色古典派對電車

能容納30人，車內會提供熱盤、音響、保冷箱（需自備冰），陳設跟一般電車唔同，坐椅列排兩邊，活動空間即時大左，而且上層設有開篷露台，睇景一流。

開生日Party之選：紅色古典派對電車

同樣可容納30人，車內陳設及設施跟綠色古典電車差唔多，但上層嘅開篷露台同上層車廂有一門之隔，上層車廂密封設計係為咗提供冷氣空調，咁夏天開Party吹冷氣又得，出露台吹風又得啦。

公司Team Building之選：「電車全景遊」派對電車

「電車全景遊」派對電車能容納36人，座椅陳設跟返一般載客電車，但車內有很多關於香港電車嘅發展歷史、模型及擺設，上層仍設有開篷露台但沒有空調設備，電車內部以桃木色為主調，相當高雅，但開電車派對要食嘢嘅話，綠色及紅色古典派對列車比較適合。

Farewell歡送派對之選：Tram No.18

Tram No.18能容納36人，外型極具特色，電車內設計同一般電車截然不同，車廂上下層都密封式提供空調，更設3間主題派對房間，燈光、音響、雪櫃、洗手盤甚至洗手間都一應俱全，試想像電車空間有限，三個主題動係咩玩法呢？淨係呢樣嘢都好值得體驗一下，加上房間都設有飯枱，飲飲食食人有三急仲有洗手間，簡直係電車派對首選，當然，佢都係最難Book嘅派對列車。