2023年青衣戲棚你要知【美食+歷史】

2023年青衣戲棚你要知【美食+歷史】

之前因為疫情既關係，事隔3年，今年青衣戲棚終於係5月回歸啦，舉辦地址依舊都係青衣市政大廈旁既青衣體育會球場進行。今次同以往一樣，都係一棚慶兩寶誕，就係慶祝「真君大帝寶誕」同「天后聖母寶誕」，「真君大帝寶誕」係5月1日至5日舉行，而「天后聖母寶誕」就會係5月19日至23日舉行，大家係咪好期待呢？

青衣戲棚（英文:Tsing Yi Bamboo Theatre）其實由1961年起開始舉行，係2個寶誕舉行期間，會提供唔同既活動俾大家參與之外，例如，神功戲、舞龍舞獅、抽花炮及問杯儀式等，仲會擺小食檔攤，俾大家盡情地食返餐，感受一下氣氛。

青衣戲棚慶祝真君帝同天后既寶誕，尤其真君廟，係唯一一個係青衣存在既，而天后反而好多地方都有，大家不妨了解一下真君帝，小編略略講解下真君帝俾大家知道，根據陳天權所著既《香港節慶風俗》記載，真君古廟係大約一百年前，由海陸豐移民係青衣墟所興建既，面向舊青衣碼頭，1980年代因為填海和同區內重建，所以1986年搬遷到楓樹窩路。

「真君」係咩人？相傳南宋宋理宗年間，廣東沿海一帶經常受到海賊既騷擾，而道士吳剛厚因為協助朝廷對抗廣東一帶既海賊有功，死左之後被追封為真君大帝，並下詔各鄉建廟雕像以事供奉，至今香火不斷。

係真君誕同天后誕期間，當然唔少得上演「神功戲」，以酬謝神恩，祈求風調雨順，娛神娛人既表演。對於後生既大家，可能比較少接觸「神功戲」，其實係由「鳴芝聲劇團」同「鴻嘉寶粵戲團」2大粵劇表演戲班演出，如果大家有興趣，不妨早啲買定門票啦。

青衣戲棚有咩野食？根據以往既小食檔，通常都會出現一啲傳統既小食，例如，吹波糖、砵仔糕、菠蘿冰、大菜糕、炸蠔餅、麥芽糖、臭豆腐等；當然亦會有新興既小食進場啦，似一個小夜市咁，2019年既小食，有傳統既小食之外，仲有新興既韓式芝士拉絲腸、流水麵、玉子燒、梳乎厘班戟等。而今年有50檔小食檔，唔知會有咩小食呢？相信亦會出現懷舊小食俾大家懷緬一番。

如果大家未去過，可以睇下2018年青衣戲棚既小食檔有咩食，作個參考。