【養金毛尋回犬的8大黃金須知】

金毛尋回犬又名黃金獵犬（英文名：Golden Retriever），18世紀響英國穌格蘭開始繁殖，用於狩獵後將獵物帶回，所以有尋回犬之意思，一般帶返嚟嘅獵物或物品，尋回犬都唔會加以破壞，保持完整性，而金毛尋回犬善於游泳，所以當時英國人狩獵水鳥亦靠金毛尋回犬將水鳥尋回。當然，時至今日，養金毛尋回犬係香港已成為最受歡迎家犬之一，作為獵犬嘅一員，金毛尋回犬有三高，高智商、高服從性、高領悟能力，雖然金毛尋回犬係幾好養，而且性格溫馴、對主人又忠誠，但亦有而要注意嘅地方，即刻同你一齊揭開養黃金獵犬嘅8個黃金須知。

金毛尋回犬屬中型犬，但由幼犬到成年後嘅黃金獵犬體重有機會達30-40公斤，身高亦可達60-70厘米，中型犬需要更大活動空間，加上金毛尋回犬本身係獵犬，都係活潑好動，如果屋企比較納米而沒有足夠活動空間，金毛尋回犬容易會感到壓力，怕自己會掃跌家中物品，變得鬱鬱寡歡，而就算空間足夠，亦需要帶佢出去落街放電，最好一日兩次，每次半個鐘至一個鐘，運動亦有助金毛尋回犬保持身心健康，要支撐中型犬沉重嘅身驅當然要多啲鍛鍊啦！

好多人以為金毛尋回犬係大型犬就食量驚人，其實佢係只屬於中型犬，但實在太為食，所以好多人養嘅金毛尋回犬無論身型、食量及體重都不比大型犬小，加上唔知飽嘅特性，基本上你俾幾多佢都照單全收，所以容易出現過重嘅情況，養金毛尋回犬響餵食上必須堅守4個字，定時定量，慎選食物及狗糧，維持健康體重最重要！

金毛尋回犬禦寒能力高，如果響香港嘅天氣去講，響金毛尋回犬眼中香港根本就冇冬天，本身毛量多就會連帶甩金嘅問題，雖然甩毛嘅情況響狗身上好常見，但黃金獵犬甩毛情況都幾嚴重，特別係換毛嘅季節，幾乎所到之處都會留下金髮，甩毛甚至成為金毛尋回犬被棄養嘅原因之一，如果想改善的話，金毛尋回犬需要每星期兩次全身刷毛所以請你有足夠嘅心理準備同耐性先好養，時常幫佢打理毛髮避免打結同皮膚問題喔。

何謂晚熟？雖然金毛尋回犬有三高，但三歲前嘅小金毛仍然係搗蛋調皮，有主人因為金毛嘅溫馴聽話，易教聰明而飼養，但礙於冇咩耐性又唔識馴狗，單單以狗種性格、外表去選狗，最後又覺得自己選錯，無論係邊種狗都好，其實同教育小朋友一樣，奴才們都必須耐心管教開導，如果從幼犬開始馴狗得宜，長大後嘅金毛尋回犬會非常暖心，甚至會幫忙湊細路，所以唔好輕言放棄，無耐性的話你咩狗都唔適合養！

金毛尋回犬係實實在在嘅狗皮膏藥，唔係話佢會呃你，而係佢非常黏人，金毛尋回犬亦非常護主，而且需要感受主人嘅關愛，要你時時刻刻都咁在乎佢，所以有機會你想打下機、睇下電視、玩下電話嘅時間，佢就會嚟親近你，直到你放低手上嘅嘢，佢先安樂返，有人會覺得煩，但你要記著養狗唔係俾你呼之即來揮之即去，你養得你就有責任陪佢，係會冇咗自己嘅快活時光，但咁又點？你揀架嘛偶像！當毛孩認定左主人後，一生中就只有你一個，所以切記要好好愛護佢地呀！

作為工作犬嘅金毛尋回犬，體格強健、環境適應力強，厚重嘅黃金外衣禦寒力高，只要運動量足夠，飲食均衡，護理得宜的話，金毛尋回犬鮮有生病嘅情況，唔會為主人帶來太大嘅負擔，一般金毛尋回犬嘅壽命10-12歲，如果飼養得好可達15-16歲，相信大家都想佢陪伴你耐啲。

金毛尋回犬對人友善，脾氣好都出哂名，作為世界眾多犬種智商排行第4位，對於小朋友唔單止無敵意，而且幫主人照顧小朋友或者保護小主人嘅情況屢見不鮮，作為中型犬對小朋友或同類無敵意可規避出街會引起衝突，亦因為金毛尋回犬天生溫馴嘅緣故，好少聽到佢地會亂咁攻擊任何目標，所以你完全唔駛擔心養金毛尋回犬會影響生育BB嘅計劃。