3大香港棺材種類【從歷史、材質說起】

3大香港棺材種類【從歷史、材質說起】

提起棺材，大家可能都會避諱一下，因為始終涉及到死亡，而且係人離開左之後先會用到既物品，通常會由屋企人處理，變相好少人會提早安排定或對棺材既了解唔多，但一旦唔好彩要處理身後事，就點都要面對，究竟棺材有咩種類？小編今日總結左少少關於棺材既資料俾大家，希望大家對棺材有多啲認識。

棺材(英文: Coffin 或 Casket)，又叫棺木、壽棺、棺槨、棺柩、壽木、四塊半；非常多種叫法，如果裝左遺體既棺材，通常叫做靈柩。棺材既來源有好多，小編搵到既資料，其中一個說法就係同孫臏同龐涓有關，當年佢地兩個人拜鬼谷子為師，之後龐涓做左魏國大將軍，但佢深知自己能力唔夠孫臏勁，所以出於妒忌而要殺死孫臏，後來孫臏知道就計劃逃走，當佢去到齊國既時候，係一個木匠屋企躲避追殺，後來木匠就叫孫臏訓係木箱入面扮死人，再送佢出關，於是慢慢演變成呢個用途，亦都衍生出「送殯」、「出殯」既說法。

另一個說法就係古代既時候，啲人希望過世既親人保佑後代可以「升官發財」，但由於叫「官才」係唔得，咁就諗到棺材係木製品，於是就由「官才」變化成
棺材啦。而且係古代，棺和材其實係兩種器具，亦代表身份既象徵，特別係做官或者有錢人家，佢地對棺材非常講究同有要求，可以透過棺材去區分身份象徵。

香港人用既棺材主要中式或西式棺材居多，中式方面，就係四塊半，即係四邊木材各一塊，頭尾木材加埋大概有半塊，所以就叫四塊半，另外，仲有分棺同槨，棺係裝載遺體既器具，槨就係棺材外石製既套棺。中式種類分別有八底、蓮花明屏、行台、抖板等等。西式棺材通常以雜木、柚木或橡木製成，也有銅製既。

而家亦多左一種叫環保棺材，即係紙棺材，係呢幾年興起既，由瓦楞紙板製成，比起傳統既棺木所燃燒既時間同所產生既廢氣短同少，減少大量木材既消耗。另外，亦比起傳統棺木輕，傳統棺木重50公斤，而環保棺木只係重大約12公斤，而且環保棺木可以負重225公斤。有研究者用左15年時間去研究環保棺材，利用“保密配方”控制棺材內部空間既酸水平，防止屍體係腐爛過程中既任何物質對土地造成污染，環保棺材用左可回收既紙板製成，7年內就可以完成降解，另外亦方便安放同運輸。

中式棺材方面，通常有唔同既木材去製造，分為楠木、桐木、松木、柏木、椿木、柳木、衫木、花梨木等。柳木又叫柳州木，十分出名，正所謂，食在廣州，死在柳州，因為柳州棺材名滿天下，柳州出產好木材，可以打造到副好棺材，就連作家金庸先生都對柳州棺材也讚不絕口，佢既作品《鹿鼎記》第三十三回中亦提到「柳州盛產木材，柳州棺材，天下馳名」，可想而知柳州棺材有幾出名啦。

如果係永久性土葬，可考慮用衫木、楠木、柏木或者花梨木，因為防腐能力好強。非永久性土葬，即係6至10年左右之後要續約，或執骨，或要移遷另一個葬地既話，可以考慮衫木或柚木。火葬既話，就選擇一些木質較薄，又易於燃燒既材質，例如夾板木，或者環保木。

政府火葬爐火化，要求尺寸唔可以超出食物環境衛生署限制既入爐規格，高71厘米、闊76厘米、長198厘米，棺木表面不要鑲金屬飾物或塑膠物料。如果係選擇私人火葬，咁就要留意返爐場火葬爐既呎吋或者限制，到時不妨向相關機構查詢。

棺材既價錢需要睇用咩木材，咩款式，如果以中式棺材為例，由幾千到百幾萬不等，西式棺材就大約由六千到幾萬不等，環保棺材價值就最實惠，只需六千至兩萬左右，詳情可以向棺材店或者殯儀公司查詢。