【準新娘必睇】出嫁酒店揀選全攻略！避開10大伏位，順利度過Big Day

出嫁日係女人一生最靚、最緊要既時刻，而間出嫁酒店就好似個「開場舞台」，搞唔好隨時「甩碌」，例如接親塞車趕唔切吉時、房間太細玩遊戲逼到爆、燈光差化妝整成「大花面」等等既情況，相反揀啱酒店，唔單止可以令到流程順順利利，仲可以影到一輯靚到出晒圈既出嫁相。所以唔好以為揀酒店淨係睇靚唔靚、平唔平，其實有好多「執生位」同「避坑位」，等小編同大家逐樣了解。

1. 揀酒店先鎖定3大核心

好多姊妹揀酒店鐘意上網睇網圖靚唔靚，結果到現場先發覺貨不對牌，可能個廳細到轉個身都難，或者距離婚禮場地遠到塞車塞到喊。其實揀出嫁酒店，最緊要係要「實用」。

揀酒店3大核心—交通

出嫁日最驚就係「趕唔切」，所以交通一定要「走得通」。首先，優先要揀「雙近」位置，即係距離新郎屋企同婚禮主場，車程最好都唔好超過30-45分鐘，仲要避開早高峰塞車黑點。其次，一定要諗埋親友既「落腳位」，酒店周圍有冇免費停車位，或者近唔近地鐵站或者有無巴士可到。仲有個「執生位」，預先提前用導航App查好「常規路線」同「備用路線」，至少可以保證接親隊伍唔會卡係半路。

揀酒店3大核心—空間

出嫁日間房要做好多事情，要化妝、換衫、玩接親遊戲、同姊妹影相，或者有攝影師拍出嫁片段，如果間房太細，分分鐘化妝師坐係床邊，姊妹們企係走廊，玩遊戲時既位都冇，所以揀房一定要睇下面2點。

面積要夠

如果人唔多，可以考慮最少30至40㎡以上既房，如果人多，就考慮揀50至60㎡以上既房，如果臥室同客廳分開就最好啦，客廳至少要容納8-10人企喺度玩遊戲，唔好逼到大家貼埋身。

布局要啱

第一，要揀有大窗既房，最好朝南，自然光充足，化妝時可以睇清膚色，影相唔使靠後期P光，個面色先自然。第二，門口同走廊要闊，尤其係著拖尾婚紗既姊妹，門寬最少要80cm，先唔會卡喺度「扯衫尾」。第三，要有「儲物位」，嫁妆箱、新被褥呢啲嘢，唔好堆喺廳中間阻住晒，有個衣櫃或者角落擺就最理想。

仲有個細節大家一定要留意，床品既顏色，千祈唔好揀深色床品，例如深灰、墨綠，否則影相時會顯得好沉，最好揀白色、米色呢D淺色系，襯埋婚紗同紅色喜字，個畫面先夠靚，出片率先高。

揀酒店3大核心—環境

間酒店房既環境唔單止影響心情，仲會直接影響「出片效果」同「流程體驗」，以下兩點一定要留意。

隔音要夠

接親時玩遊戲，姊妹們鬧鬧哄哄好正常，但如果隔音差，隔離房隨時投訴，搞到大家玩得唔放開，如果有車聲、電梯聲嘈住，化妝師同你都難專心。所以預訂時一定要同酒店講明，最好安排要高樓層（10樓以上）、非臨街、唔好靠電梯，有條件既最好提前上房試下，關晒門窗，聽下有冇雜音，先至安心。

另外，同一日如果有其他新娘出嫁，會唔會安排同一層？或者樓上樓下？避免到時太吵，而且最重要係避免接錯新娘。

燈光要正

化妝最驚燈光唔啱，冷白光會令你化得太淡，出門見光先發覺「冇血色」；暖黃光又會令你化得太濃，影相變成「大花面」。最理想既係「暖白光」，同自然光最接近，所以揀房時要睇下梳妝檯既燈係咩色，仲有燈光夠唔夠亮，如果個鏡周圍冇燈，化眼線、畫眉時分分鐘畫到歪。如果燈光唔夠，記得問酒店可唔可以提供補光燈，或者自己帶個小型補光燈過去，甘就萬無一失。

另外，酒店既周邊配套其實都好重要嫁，如果朝早化妝餓到暈，酒店有冇早餐供應？或者package有無得選擇早餐既選項，最好可以早D食，或者可以送到酒店房，唔使姊妹走出去買。如果臨時需要買嘢，附近有冇24小時便利店，呢啲都要諗埋。

出嫁到會小食盒