10大實用iPhone功能揭秘

10大實用iPhone功能揭秘 – 你真係識用蘋果嗎？

10大實用iPhone功能揭秘 | iPhone於香港市佔率超過40%，雖然咁多人用，但iPhone隱藏功能始終係唔講唔知，本文講嘅iPhone十大實用功能，助你更加方便同有效地用iPhone方便日常生活，根據統計，iPhone用家大概知道iPhone 40%嘅功能，咁樣實在太㩄料，都市人雖然手機不離手，行路食飯臨瞓都自帶光芒，但往往唔係碌Facebook或者IG，就係低頭打機或者網購，一部iPhone挽下手成皮嘢，唔用到盡就好唔抵，第一個iPhone實用功能已經考起好多人，iPhone鏡頭像素高夾清，甚至有啲Youtuber只係用iPhone拍嘢，當然相又好影片又好，假以時日一定一大堆，點樣快捷清除大量相片呢？

1. 如何一次過刪除iPhone內大量照片

當你打開相冊，會見到㩒左選擇後，iPhone 會俾你揀要處理邊張相，每張相都有個圓圈，你要處理邊張就㩒下個圓圈，就會出現一個剔，但如果要刪除成個相冊或者大量相片應該點做？先㩒選擇，然後輕輕打橫掃，手指唔好離開屏幕，橫掃後直掃，可以大量抓取相冊中嘅相片，否則逐張㩒㩒到你灰。

2. 上網睇文章成日彈廣告，可善用Safari嘅閱讀模式

上網睇文有時會偶爾彈出煩厭嘅廣告，影響刨文體驗，你可以善用Safari嘅閱讀模式，呢個iPhone功能可以令人睇文嘅時間唔會彈廣告，你更可能選擇字型、字體大細等，尤其係睇長篇故事，用適合自己嘅方式就睇得舒服啲啦，你可點選網址輸入欄最左邊，一㩒就會出現選擇，你就可以響入面揀閱讀模式。

3. 一次過關閉所有分頁

相信好多iPhone用家打開Safari都一定有一大堆分頁響入面，因為好多人嘅工作，甚至學生嘅功課，響做資料蒐集嘅時間，都會集各家之大成，但做完又懶得關閉，因為iPhone太方便，開個新分頁太簡單，但太多分頁會影響iPhone正常運作，部機會跑得慢、唔夠快同無速度，加上分頁太多睇到眼都花，一次過全速關閉，乾手淨腳，只需長按右下角果兩個正方形，工作列就會彈出嚟，到時你可選取一次過關閉N個分頁。

4. 邊拍片邊影相

呢個並唔係咩特別iPhone隱藏功能，有好多人拍拍下片，發現其他嘢想影相，會暫停拍片，影完相再拍片，然後剪接返，但其實唔需要，當你開始拍片，開始按鈕右邊會出現一個白色按鈕，即係相機影相制，咁就唔會影響拍片嘅流暢度，呢個就係傳說中嘅我明明就在你身邊，但你卻不知道我是相機。

5. 錄低電話內容

呢個iPhone功能取代咗舊有要靠Apps先做到嘅效果，而且用法比用Apps更加方便，通話後，從iPhone右上角拉下工具列，㩒屏幕錄影Icon，跟手打開擴音，就可以錄低成段電話嘅談話內容。

6. 快速整理應用程式

以前要歸納應用程式，需要一個一個拉入去相同嘅資料夾，實在太費時失事，對於有少少強迫症同完美主義嘅小編嚟講，寧願忍受煎熬都唔想花時間歸納，如果你同我一樣，呢個iPhone功能你一定要知，例如有十款遊戲而家Hea哂響桌面，你只需要㩒實一個唔放，待Icon出現震動，依然要㩒實，另一隻手手指可以點選相同類別嘅程式，唔改拉嚟拉去，係咪好正先？

7. 半屏單手模式

iPhone隨住時代巨輪前進愈出愈大，尤其係Pro同Pro Max，滿足一眾男士單手都不能掌握嘅要求，隨時為咗強行點擊某個地方失敗，揸唔緊連電話都跌埋，有見及此，iPhone提供半屏模式，將屏幕高度縮減一半，就算你單手揸手機，都可以點擊任何一個地方，呢個iPhone功能最啱搭車或人多嘅時候用，俾人撞一下都不至於跌機，但必須先響輔助功能入面嘅觸控先開啓單手模式，開咗之後，將屏幕下方粗黑線 (Home) 往下拉即可進入單手模式，往上即可退出。

8. 一鍵跳出付款碼

手機支付愈來愈大勢所趨，但每次要㩒左㩒右㩒付款碼就比較麻煩，為咗省卻多餘嘅動作，以支付寶及PayMe為例，而家長按會彈出工作列，裡面可以直接選支付碼，支付碼就會自動彈出，非常方便，響呢個咩都要快嘅年代，用家人數亦取決於支付工具嘅便利程度。

9. 機身背面輕點功能

呢個iPhone功能係可以透過輕點手機背面兩下或三下，實現半屏模式、截圖、較大細聲、呼叫Siri等功能，唔多人知，知都唔多人用，因為用親iPhone都好少唔用手機殼，如果太厚或太硬都會有所影響，不過呢個功能的確係唔錯，用嚟截圖夠哂方便。

10. 快速搵到重要相片

手機相片過千過萬絕不稀奇，但到要搵返某張相果時你就好痛苦，iOS14嘅相冊中指住一張往上滑，會彈出說明欄，你可以為相片加入關鍵字，到搵果時直接搜尋果個關鍵字就得，有該關鍵字嘅相片都會出現，到時就一目了然。

　新推出　