【2023九宮飛星圖佈局】一文助你兔年催吉避凶

【2023九宮飛星圖佈局】一文助你兔年催吉避凶

2023癸卯兔年風水位佈局點好？九宮飛星大家都成日聽，但係都唔知係咩，九宮飛星格局係將室內空間以方位分成9格，而呢9格分別代表病位、財位、事業及愛情位等等，而每年各星都會飛進唔同方位，而踏入2023流年九宮飛星格局係點？ 如何化解厄運？了解哂兔年吉凶位，趨吉避凶自然得心應手啲，當然，堪輿及玄學之說只作參考，信則有，不信則無，玄學只輔助，成功雙手創。

天有九星、地有九宮，九宮飛星實現所謂風水輪流轉的真正意義，根據九宮飛星由中心點中宮既飛移，合組成一個九宮格，分別代表九個方位；東、南、西、北、東南、西南、西北、東北同中宮；去年虎年係吉位，兔年可能已成凶位，唔講咁多，即時睇下2023年兔年吉位及凶位分怖。

由九宮飛星既中宮（九格中心位置）講起，2023年中宮位由四綠文昌星進註，「四綠」屬木、飛入中土之宮，土木相洩相刑，所以今年中宮只係小吉之位；文昌位主事業及學業，即官位、學業成績、功名文貴，在職者想升官發財、在學者想金榜題名就要催旺文昌位，可以在中宮位置以水養四枝富貴竹或常綠植物，玄學上有所謂一四同宮，所謂一四同宮科名大顯，一代表白（水），四支富貴竹代表四綠，亦可形成巒頭之勢，讓你催旺文昌星氣場，流年切忌於中宮位擺放流水、魚缸等物件，除了有機會招惹偏桃心花外，更會對思緒造成負面效果，尤其以已婚者的朋友更應加倍提防，否則恐防有小三介入、破壞婚姻感情！

九紫右弼星於2023年飛進正北，即喜神位，九紫吉慶之星為上吉之位，有利貴人財運，流年大吉大利之位，此星主姻緣嫁娶、感情，亦代表所有喜事，訂婚、結婚、添丁等，紅事能沖喜，「九紫」星五行屬火，催旺之法係保持正北方日光充足、空氣流通，再者可以加設紅物擺放，如紅地毯或紅色或者顏色鮮豔嘅擺設，有助加強人緣、招財生運，2023兔年實行大紅大紫旺足一年！

六白武曲星於2023年進註正西方，即所謂偏財位，主橫財、貴人，西方屬金，能帶動金氣，催旺偏財位可以提高投資回報率，偏財位最忌兔雜物、混亂，另外垃圾桶、清潔用品能遠離西方，避免破壞風水招破財，如果催旺六白武曲星，偏財位可以放置貔貅、麒麟或招財貓吉祥物，旺偏財位亦具有鎮宅化煞之效，有助化解消除邪氣保平安，招財納福，但擺好左就唔好隨意移動免有反效果。

講完偏財講正財，八白左輔星於2023年進註正南方，正財位主財運、財富及商機嘅元運主管星，財位都係果句，想討好財星最忌雜亂，能保持明亮通爽。南方屬火，忌黑色、灰色，白色可有助催旺財位，如白色傢具、牆身顏色等，經商嘅朋友可以擺放葫蘆或搖錢樹等物品有助招財開運的，增強吉氣，有助生意蒸蒸日上，讓旺星發揮更顯著的效果，提升財運，避開小人官非、破財之禍。

輪到最後一個吉星位，一白貪狼星，癸卯兔年飛進西南方，為兔年桃花位，主感情、人緣、拍拖，桃花位最忌擺大型傢具，尤其衣櫃、鞋櫃等，會抑壓氣場及個人魅力，單身人士可以將睡床對正西南有助脫單，而催旺桃花位可做用粉晶、鮮花（如桃花、牡丹等）或其他成雙成對嘅擺設，佈局得宜，有助夫妻感情提升，如果廁所響西南方，對已婚人士容易招惹爛桃花，想討好桃花星可增設鏡子將爛桃花氣場折射出去，避免影響夫妻感情。

講完吉位點催旺，就講下凶星，災煞之星中最惡嘅五黃廉貞星，主災害、禍患、受傷、死亡等凶事，2023兔年進註西北方位，如果門窗位、廚房位坐落西北容易出意外，要特別小心留意，可以避免的情況下，五黃位最好唔好動土，因為飛沙走石嘅混亂會增強凶星氣場，避免擺放暖爐、風扇、抽濕機，如要化解此災星最好以白色或灰色物品取代所有紅色及黃色物品，再以最傳統嘅五帝錢勊制凶星氣燄，更可納福增運。

破財位新一年坐落東北方，七赤破軍星進註主破財、漏財，八運期間喺一個災星， 容易帶來官非、小三、小人等傷害，要化解此星應避免於家中東北方存放刀具、金屬器皿、水晶等能加強破軍星嘅物件，避免引致血光之災，東北方需保持整潔，混亂之氣會導致思緒混亂，做錯決定而破財，以萌蘆及鹿嘅擺設有助以福祿相全之氣破煞。

健康好緊要，病符位兔年於正東方肆虐，二黑巨門星進註主疾病、傷害等凶事，容易影響健康，如果廚房居於正東容易病從口入，會引起腸胃不適，要飲意飲食安全以免病從口入。另外，如果冷氣及風扇置於正東會吹入病氣，破煞可以用六帝錢或音樂盒，銅屬金，可泄去二黑及五黃之土氣，但要還擇以銅片發出聲音嘅音樂盒先有效。

最後講埋三碧存祿星，唔好睇個名存祿以為好嘢，三碧存祿星主是非官災，癸卯兔年兔年坐落東南方，如果家人經常於東南方相聚，如飯桌、梳化位置於東南方，容易發生口角，不過此星對於須辯論嘅行業如律師、法官、議員等有利。是非之地最忌混亂，忌綠色及藍色，如果工作方位於東南，想化解三碧兇星要小心處理文件，或者先往政府機構走一轉，降低惹上官非的機會。