【8件養哥基狗你要知道的事】

【8件養哥基狗你要知道的事】​

哥基狗全名「威爾斯柯基犬」（Corgi)，屬於牧羊犬品種，主要分成「卡狄肯威爾斯柯基犬」和「潘布魯克威爾斯柯基犬」；雖然佢個樣生得Cutie腳又短，但佢的確同邊境牧羊犬，甚至作為警犬嘅德國牧羊犬屬同一犬種，飼養智商排名高居第11嘅哥基狗，訓練起嚟都冇咁吃力，但當然你要夠耐性，由於哥基狗對唔同事物有極大好奇心，而且膽大包天，如果你唔響屋企，返到去見到滿目瘡痍，唔好奇怪，訓練不足雙方都有責任，唔好一味話佢過動活躍，養狗仔唔單單係娛樂解悶工具，同小朋友一樣需要嘅係耐心教育、循循善誘，唔係高壓呵責就用嘅！

「不棄養，不傷害」係對寵物嘅基本尊重，可惜結果事與願違，越受歡迎嘅狗種如哥基犬，棄養趨勢上升，更有一隻哥基犬被棄養三次嘅情況，幼年哥基BB因為體型細小，屋企範圍唔駛好大，而且樣貌可愛，容易令人一見鍾情，所以深受都市人喜愛，但因為養之前冇了解哥基狗有咩特點或者需要注意咩事項，一覺得麻煩就棄養或者送俾人，極不負責任，所以希望大家養任何竉物前，了解下自己適唔適合養寵物先，尤其是如果你有意養哥基狗仔，你睇哂成篇文章再決定，三思而行，犬隻被棄養後會對人類有所防備，接二連三嘅棄養可能會演變成敵意造成極大陰影，直接影響寵物遇上好主人嘅機會。

新手主人面對狗狗疾病都會大亂陣腳，所以小編建議大家除左確保毛孩有需要時可以得到適當治療，大家都明白竉物睇醫生隨時貴過人睇，所以可以考慮將醫療開支轉嫁保險公司，咁就唔洗擔心狗狗突如其來嘅醫療開支而束手無策。

OneDegree 毛價保首年保費75折優惠

哥基狗8大飼養要點

1. 腳短易污糟，要常注意清潔

哥基狗天生腳短，人稱矮狗，底盤都低，肚仔毛容易污糟，尤其落街放電，污水、泥濘等會黏住毛髮，藏污納垢，易引起皮膚病，所以每次落街後都必須徹底清潔，如果你嫌麻煩嘅話，請你諗清楚，但如果你已經養緊，請你堅持做好護理喇！

2. 為食易肥，要注意狗狗飲食

哥基狗非常為食，見到狗仔賣萌一刻，有好多主人都抵受唔住誘惑，因為太過溺愛，咩都俾狗狗食，令狗狗容易癡肥，影響內臟及骨骼健康，每餐份量必須適中，營養要均勻，加上唔好懶，哥基犬作為畜牧犬，需要嘅運動量極大，定時運動亦有助哥基犬減重，癡肥會狗重哥基犬嘅行動負擔。

3. 叫聲洪亮，咩都吠一餐

好奇心重嘅哥基狗，叫聲非常洪亮，屋仔細細隨時聽到餘音，隔離屋亦會受到哥基犬叫聲所波及，無論係有人開門、電話響、多士機果下叮一聲會隨便引發哥基犬一輪偉論發表，而且屋企有細路、老人家亦容易俾突如其來嘅叫聲嚇親，所以養之前除左自己嘅問題，都要考慮埋屋企適唔適合。

4. 毛量大，換毛期長

哥基犬對比邊境牧羊犬嚟講，望落去好似毛量唔係大，咁你就大錯特錯，哥基犬毛量絕對唔細，足夠包覆你間屋每個角落，換毛一年兩次，三月到六月及九到十一月，換毛期可持續幾個月至半年，呢樣野係比較煩心，但主人們請多包容，唔好因為哥基犬換毛感到煩厭，因為換毛期間，更加要多啲梳毛，好好適心護理。

5. 時刻關注哥基狗脊椎健康

天生腳短，要負荷體重本身已經難，上面講過哥基犬仲要容易肥，成犬10公斤至20公斤係唔出奇，長年依賴4隻短腿支撐唔容易，所以為左哥基犬脊椎健康，除左上落樓梯最好抱住之外，控制體重亦係不二法門，養哥基犬，可以美臀，但必須健美。

6. 運動量大，需要放電

香港地小人多，寸金尺土，哥基狗偏偏好動活躍，對運動量需求大，除非你屋企好大夠佢跑，否則主人最好每日可以帶毛孩放電兩次，Weekend去下公園放電順便野餐chill下，運動量唔夠，屋企又冇地方活動，狗狗容易抑鬱成病，每次放狗最好15-30分鐘，亦有助狗狗伸展筋骨，精神爽利！

7. 腸胃差，易肚屙

哥基犬身為咁為食嘅狗狗，但好唔好彩地擁有一副比較差嘅腸胃系統，一食錯野隨時上吐下瀉，建議採用含益生菌嘅狗糧，有助提高狗狗免疫力，同時保護腸道健康，除左保健，當然不忘預防，哥基狗好為食亦唔挑食，但有啲野無論佢點嗲你賣萌，你都要堅持護食，護住唔好俾佢食呀！

8. 哥基狗忌食清單

【生肉】生肉細菌含量極高，以哥基犬咁弱嘅腸胃盞又痾又嘔，肉類必須高溫煮熟，再待冷卻才可作用狗食。

【高鹽食品】上文提過哥基犬本身已經是脫毛高手，過量攝取鹽分會令毛孩脫毛加劇，絕對要注意。

【易碎、尖銳骨頭】雞、鵝、鴨的骨頭易碎，邊位銳利，對哥基狗本身已經弱的腸胃可謂落并下石，會令毛孩腸胃出血、便秘等，應以牛、羊大骨頭取代，唔易碎仲磨埋牙添。

【油膩食物及甜食】哥基犬屬易胖體質，油膩食物及甜食容易令毛孩肥胖，加重脊椎負擔之餘，亦會誘發一系列疾病如糖尿病、心臟病、腎病等。