尿液顏色【你唔能夠唔識】

尿液顏色【你唔能夠唔識】

排尿係身體其中一個生理需要，尿液顏色可以反映身體狀況，雖然最常見係透明或者黃黃地，但其實尿液顏色高達9種，好多人掉以輕心，通常中醫上身判定自己係熱氣，夜瞓之類，但好可能身體已經暗地裡出現狀況，而未被察覺到，有好多隱疾都冇咩明顯病徵，所以你有機會真係熱氣，但唔代表淨係熱氣。排尿嘅作用係排走身體多餘水份，尿液顏色可以反映內臟健康，最準確嘅係晨早第一泡尿，如果你認為晨早第一泡尿係你瞓醒覺排嘅尿，咁你就太年輕了，瞓醒覺第一泡尿響膀胱成晚，會滋生細菌，尿液顏色形態會有所改變，所謂嘅晨尿，係排走響膀胱溫存左一晚嘅尿後隔一兩個鐘再排嘅尿，係新鮮嘅尿，所以更可以有效反映身體狀況，但當然其間冇食早餐亦冇做運動，先最有參考價值。

尿液顏色 – 反映身體狀況

透明，尿液顏色同水一樣

如水一般嘅尿液顏色屬於正常，有機會係飲水過量，導致尿液被稀釋，但如果你並唔係成日飲水，透明嘅尿液顏色亦有可能係身體糖分指數高，係糖尿病嘅前兆，透明尿液如果持續一段長時建議檢查血糖，及早控制。

透明，帶淡黃色

淡黃透明嘅尿液顏色先係屬於正常，反映攝水量剛剛好，應繼續保持良好生活習慣。

深黃色尿液

深黃色尿液顏色非常常見，都市人一般攝水量不足，所以攝水係指飲水，唔係飲茶飲汽水代表攝水，攝水量不足唯一可以做係飲返多啲水，雖然深黃色尿液唔係咩大件事，但身體持續攝取水份不足，對腎臟嘅健康有莫大影響。

如蜜糖般嘅尿液顏色

呢個尿液顏色同深黃色嘅尿液顏色近似，但蜜糖尿色代表缺水情況較嚴重，建議立即補充水份。

紅色或粉紅色嘅尿液顏色

主因係食左色素重嘅嘢，例如紅菜頭，如果冇食用過有可能係泌尿系統疾病，如前列腺癌、腎病等引發嘅血尿，紅色嘅尿液顏色必須提高警覺，血尿反映嘅通常都唔係小病痛，應該及早檢查身體。

藍色或綠色嘅尿液顏色

呢種尿液顏色源自兩個原因，一係細菌感染尿道、一係亦因為食左色素重嘅野，好似露筍、菠菜、甘藍等，食用含高維生素B群嘅食物亦會令尿液顏色變藍綠色，如果唔係食物影響，藥物或細菌感染都會令尿液顏色突變。

黑色尿液顏色

相信大家睇到呢度，幻想尿色變黑，都知係好唔常見，亦唔慌係小事，尿液顏色變成黑色，雖然有機會因為黑色素食物，但機會率不高，最有可能嘅反而係黑尿症，黑尿症一般係遺傳，發病率約百萬分之一，黑尿酸會攻擊人體骨骼，內臟等，有患者四十多歲，因為黑尿症喪失站立及坐嘅能力，尿液顏色實在不容忽視。

仲有一樣雖然同尿液顏色冇咩關係，但都需要留意嘅係尿泡，一般尿液響馬桶產生嘅泡泡會響幾分鐘消失，因為衝擊力氣泡就一定有，但如果好多氣泡，但久久不散，就有可能係尿液中蛋白質、糖分、或其他物質增加，情況嚴重的話對腎臟負擔加劇，有機會形成蛋白尿，持續尿蛋白會導致腎功能衰退，所以當發現情況沒有改善，應立即求醫。