【DSE、大學生暑期工】Part Time招聘攻略2021

【DSE、大學生暑期工】Part Time招聘攻略2021|Kama Delivery到會外賣專家

【DSE、大學生暑期工Part Time招聘攻略2021】

話咁快6月都過左一半,意味長達兩個月嘅暑假即將來臨,中學生好大學生好,都會趁暑假呢兩個月時間搵兼職暑期工做,陀飛輪都咁唱,你獻出了十吋時和分,可有換到十吋金?唔駛返學嘅時間,虛度光陰不如趁暑假賺下零用錢,可以賺錢又可以賺工作經驗,最緊要嘅當然係暑期工對於面試者嘅要求唔高,基本上一見就有咁滯,做得好隨時變成一份固定Part Time;踏入今年暑假,暑期工嘅種類依然係五花八門,DSE、大學生應該搵咩暑期工做好?搵暑期工又要留意啲咩?對於未踏足社會嘅一班莘莘學子,睇完呢篇文章,希望你可以避免墜入陷阱,搵到適合自己嘅暑期工,充實自己之餘,亦充實荷包,咁先可以Work Life Balance!

搵Part Time、暑期工招聘好地方推介

科技年代,搵暑期工梗係上網搵啦,下面求職網站對暑期工都有獨立分類,無論僱主資料、工作職務、返工地點、預期人工等都有刊列,慳返好多問野時間,當然,你亦可以透過篩選,直接搜尋自己心儀嘅行業、地點、招聘形式等,一矢中的,雖然暑假工嘅工種比較少,但對於無任何工作經驗嘅學生哥嚟講,都足夠有突啦!

1. 兼職網

2. Indeed

3. JobsDB

4. 香港好工網

暑期工四大長青行業

暑期工嘅工種選擇確係比較少,但每個暑期總有啲工種會大量請人招聘,而且唔需要工作經驗,要求亦唔高,基本上滿足僱傭條例年滿15歲已經可以求職,可能中四學生哥已經可以體驗下職場生活,因為某啲行業響暑假可以話係當時得令,求才若渴,連帶週邊行業對人手上亦需求大增,暑假做咩好?不妨參考下以下四大暑期工長青行業,睇下啱唔啱自己心水。

1. 飲食業

飲食業|暑期工四大長青行業|Kama Delivery到會外賣服務

暑假一定多左人出街食飯,一日三餐日日煮,想攰死你老媽子咩?平時仔女要返學,星期六、日都可能忙做功課溫書,所以暑假期間一家大細出街食飯嘅意欲一定大咗,學生哥唔駛返學,又多左同朋友行街食飯,餐廳當然需要更多人手應付生意,無論餐廳樓面服務員或廚房學徒等,基本都有在職培訓,邊做邊學,有冇工作經驗唔重要,而且通常至少包一餐,慳左都算賺左啦。

歡迎加入我們的團隊|Kama Delivery到會外賣服務

賣下廣告,Kama Delivery都歡迎對飲食行業有興趣嘅你加入我地嘅大家庭,工作經驗多少不拘,暑期工實習、兼職或長工我地都無任歡迎。不論係文職定係廚房職位,我地都有空缺。歡迎大家電話查詢或者WhatsApp聯絡我地,期望充滿活力嘅你加入我地嘅團隊。

Kama Delivery招聘熱線:6570 0439

即時WhatsApp:http://wa.me/85265700439

2. 售貨員

售貨員|暑期工四大長青行業|Kama Delivery到會外賣服務

全職Sales通常都需要一定工作經驗,因為除左賣野,你亦需要應付客戶咨詢同具備良好溝通技巧,滿足客戶要求甚至處理客戶投訴,但暑期工一般請售貨員主要係理貨同做分流,又或者一啲比較簡單行業如百貨公司,當然,你有成功銷售最好,做銷售可以增加同唔同嘅人相處嘅機會,亦係提升待人接物、應變能力同口才嘅好機會,外向嘅你不妨可以一試,話唔定有驚喜嘅收獲。

3. 倉務員

倉務員|暑期工四大長青行業|Kama Delivery到會外賣服務

暑假多咗人行街買嘢,帶動零售業之餘,倉務、理貨嘅相關工作量當然亦隨之上升,從事倉務工作最重要嘅係體力勞動,學歷、經驗都係次要,主要職責係包裝同搬運,絕對需要任勞任怨,暑假期間通常都會大量請兼職,不過主要請男仔多,另外因為18歲以下人士從事體力勞動工作會有相關限制,所以倉務工作一般會請「夠枰」嘅男同學。

4. 問卷專員

問卷專員|暑期工四大長青行業|Kama Delivery到會外賣服務

好多企業會透過客戶問卷了解客戶嘅諗法,制定未來推廣及銷售方針之餘,順便留低潛在客戶嘅電郵或電話方便日後跟進。暑假條街比平日多人,所以問卷調查專員亦係暑期工嘅招聘常客,雖然亦算體力勞動,暑假天氣炎熱,企喺條街同人做問卷,都辛苦嘅,但同倉務相反,一般請女仔多,原因好簡單,女生訪問員被拒絕嘅機會比男生低很多,而且面對女嘅訪問專員,受訪者會比較願意留低聯絡方法,尤其係受訪者係男性,你懂的,今次女學生就有優勢喇。

【新興暑期工】Blogger/產品評級專員

Blogger/產品評級專員|新興暑期工|Kama Delivery到會外賣服務

好多學生年紀輕輕但才華洋溢,能夠寫出吸晴嘅文章,字字珠璣,而且具備專業攝影執圖技巧,依加呢個年代,執靚相已經係年輕一代本能,唔想埋沒才華,可以趁暑假寫Blog投稿又或者建立個人專頁、頻道,可能係寫關於DSE、遊記、手遊、桌遊、運動、美食等等,好多公司都會透過Blog提高網站能見度,如果你寫得一手好文章,又想賺錢又想舒舒服服,不妨當暑期工咁做,寫得好隨時會邀請你幫公司寫產品用後感,長寫長有,過左暑假都有份固定Part Time收入啦!

【老生常談】暑期工5大求職陷阱

年青人剛剛踏足社會,經驗不足又心急嘅情況之下,容易被不法之徒有機可乘,暑期工陷阱一睇再睇,騙徒手法層出不窮,五條中一條你都唔好做,荀工真係咁多咩!隨時浪費時間,賺唔到錢仲要倒輸就唔好啦。

1. 無任何學歷或經驗要求,但人工極高

人工極高|【老生常談】暑期工5大求職陷阱|Kama Delivery到會外賣服務

常見於社交平台分享,標題極具吸引,咩在家工作日均4位數收入、可以去旅行兼賺錢諸如此類;因為大型招聘網站需要僱主披露公司資料,但因為呢類型公司招聘嘅職位同職能比特殊,所以唔會作出披露,學生搵暑期工容易被人工高吸引,作出錯誤決定,隨時係從事非法工作,無要求,人工高,佢成家去哂做啦,做咩要出Post請你?

2. 未開工先俾錢

未開工先俾錢|【老生常談】暑期工5大求職陷阱|Kama Delivery到會外賣服務

常見於模特兒或演藝工作,例如好多自稱星探嘅人會花言巧語話要捧你做林志玲、下一個姜濤,但你必須要俾錢上堂,學唱歌、做戲、模特兒訓練等,上哂堂就安排你出Show、簽經理人合約,暑假好多商演活動叫你盡快報名,最後可能做咗次「臨記」就冇哂聲氣,唔係話呢啲就一定假,但決定前必須調查對方身份來歷、公司背景、公司資料或者有咩藝人,最好問下爸爸媽媽意見先做決定。

3. 騙取個人資料

騙取個人資料|【老生常談】暑期工5大求職陷阱|Kama Delivery到會外賣服務

有啲公司會先WhatsApp你,同你講完一大輪就問你WhatsApp身分證、銀行卡同地址證明俾佢話幫你預約見工,你唔好急,預約見工通常有你個姓同電話號碼就夠,其他嘢大可正式簽約先提供,好多同學仔少見工,以為係既定程序,又心急搵暑期工就掉以輕心,最後無端端洩露個人資料,惹上一身錢債,所以對於個人資料必須加倍小心提防。

4. 層壓式推銷騙局(傳銷/直銷)

層壓式推銷騙局|【老生常談】暑期工5大求職陷阱|Kama Delivery到會外賣服務

層壓式推銷屢見不鮮,到今時今日仲係好多人中招,點解你會中招?因為你朋友中左招,你以為你朋友有好野益你,帶你聽講座,講台上有個自稱藍寶石伯爵嘅人好似鬼上身咁,話自己年薪千萬,下線數千,你嘅美好人生,由呢個暑假開始,只需要入貨搵下線,抽佣之類,之後你就同你朋友入貨,幫佢脫離險境,自己就萬劫不復,都係果句,唔好即時做決定,問多幾個人先,暑期工搵下零用錢賺下旅行洗費,唔駛做伯爵嘅。

5. 暑期工都要簽約及留意細則

暑期工都要簽約及留意細則|【老生常談】暑期工5大求職陷阱|Kama Delivery到會外賣服務

有一句名言叫魔鬼在細節,要防範好簡單,你可以聽左佢講咩先,錄埋音都怕,然後咩都唔好簽,成份合約帶走俾父母睇下先,真係冇問題先簽名帶返去,了解合約先簽名係權利,簽左名就代表你同意,所以奉勸各位記住「唔好急,慢慢嚟」。

專享全港九新界免運費優惠|Kama Delivery美食到會外賣服務
最後講多樣野,香港合法工作年齡雖然係13歲,但非常多限制,僱主一般唔會考慮,所以搵暑期工,15歲以上會比較適合,15歲以下建議你暑假搵啲興趣班學下野,充實自己,機會從來只係留俾有準備嘅人,趁暑假期間,不論DSE、大學生,一齊搵份Part Time,賺下錢之餘,又可以開拓人脈、擴闊視野!
以上資訊係由Kama Delivery提供,我地致力為全港各區炮製同送遞西式到會美食,為大家嘅聚會同派對增添一份「滋味」!
點我查看滋味到會外賣餐單

聯絡我們

WhatsApp 查詢/訂購熱線:5188 0757 / 6599 9941

Email:[email protected]

追蹤我們

FacebookInstagramYoutube

延伸閱讀

【飲品到會重新定義】

野餐食物外賣推薦【懶人包系列】

【11款開Party大食會餐單ideas】

謝師宴籌辦攻略2021 【一文睇清場地選擇及慶祝方式】

【學校到會美食外賣推介2021】

部份圖片出處

https://www.pexels.com

*未經許可,以上文章不得轉載或引用*

*以上資料只供參考,如有變動或錯誤,恕未能立即更新*

發佈回覆

你的電郵地址並不會被公開。 必要欄位標記為 *