【香港人幾時退休？】參考9個國家退休年齡

【香港人幾時退休？】參考9個國家退休年齡

大家一定有諗過或者計劃幾時退休，但大家覺得最理想既退休年齡係幾多歲呢？以香港為例，雖然無法定退休年齡，但因為要去到65歲先可以拎返筆強積金，所以大家都有個意識覺得65歲就係退休年齡。咁其他國家既退休年齡又係幾多歲呢？而跟據美世《全球退休金指數報告》(Mercer CFA Institute Global Pension Index )入面44個地方中，亞洲區方面，新加坡保持首位，連續10年排第一，全球排名就第9，而我地香港排亞洲第二名，全球排名19。小編綜合左9個國家，等大家了解下其他地方既法定退休年齡。

新加坡係2022年7月1日起，退休年齡已經由62歲提高至63歲，而退休之後可以重新僱用既年齡就由67歲提高至68歲，因為新加坡既人均壽命係世界上最長壽既國家之一，所以新加坡開始遂步提高返退休年齡，另外，亦預計2023年左右，更會將退休年齡調高至65歲，而重新僱用年齡就去到70歲。

台灣既退休年齡係60歲，同時可以領取退休金，如果工作左15年以上，仲可以選擇一次過拎，定係每月拎，但如果唔夠15年，就只可以一次過拎筆退休金。另外，如果僱主同員工願意繼續維持原本既勞僱關係，員工係可以出糧，又可以同時拎退休金。

韓國原先既退休年齡由60歲上調到65歲，但其實有44%以上65歲既人仲會繼續做野工作，平均年齡做到去71歲先正式退休，所以係泡菜國生活唔容易呀。

日本參議院全體會議係2021年6月4日通過左《國家公務員法》既修訂案，計劃去到2031年，會將國家公務員既法定退休年齡從60歲分階段上調，去到2031年既時候就變到去65歲。另外，亦係2021年4月1日起正式實施左《改定高年齡者僱傭安定法》，企業員工既退休年齡從65歲提高到70歲，保障左有意願工作到70歲既老年人。

美國既退休政策有3種做法，俾人可以根據自身既情況去選擇幾時退休，而且根據唔同既出生日期去設定唔同既正常退休年齡，例如1937年或之前既退休年齡係65歲，1943至1954年出生既就會係66歲退休。
方法一提前退休，可以係62歲開始拎退休金，但只會拎到7成。方法二正常退休，咁當然可以拎足全額啦。方法三延遲退休，係原有既退休金基礎上，再獲得額外獎勵性既收益（Delayed Retirement Credits）。

英國退休年齡根據打工仔既出生日期及性別而定。當到左法定退休年齡之後，就可以拎國家退休金（State Pension）啦，例如舊制下，1951年4月5日或之前出生既男士，退休年齡係65歲，而1953年4月5日或之前既女士，退休年齡係60歲。
而且英國退休金亦分為3種，分別係國家退休金、職業退休金及私人退休金。

澳洲今年7月將退休年齡提高到67歲。而澳洲退休金被分為三種， 退休養老金（Superannuation），自行管理養老基金（SMSF），政府養老金（Age Pension）。

政府養老金只要超過66歲，係澳洲公民10年以上，先符合補貼標準，另外收入及資產不超過政府限定額度。第二種自行管理養老基金(SMSF)，由自己管理自己既養老金投資，將來當係退休資金，而僱主會每個季度將呢筆錢轉入員工自行管理既賬戶。而退休養老金同我地強積金差唔多做法，去到指定年齡或者退休先可以拎。

加拿大退休年齡一般65歲，亦可根據自身既情況，申請提早拎部分退休福利（如加拿大退休金計畫CPP）。

加拿大退休金亦分3種，一種就係加拿大退休金計畫（Canada Pension Plan，CPP），每月發放既退休金，會同在職果時既平均年收入，同埋開始拎退休金既年齡掛鉤。第二種老年保障金（Old Age Security，OAS），只要年滿65歲，另外成年後係當地合法居住滿10年就符合資格申領，都係每月發放，但金額會受居住既年期而有唔同。第三種入息補助金（Guaranteed Income Supplement， GIS），如果年收入低於指定既金額，到左65歲之後就可以同時申領OAS和同入息補助金，個金額因婚姻狀況同年收入而有分別。

法國既退休年齡係今年1月10日，公布左退休制度改革計劃，建議法定退休年齡於2030年由62歲延至64歲，不過1月19日已經出現工會罷工潮，所以暫時仲咪確定可以延至64歲。