天葬係咩？

進行天葬儀式方式

當藏人過身後，在生者會用白布將遺體包裹好，再用土坯（即泥土做既，又未燒過既磚塊）做墊，將遺體係屋企放置3-5日，請喇嘛由朝到晚唸經超渡，一般唸經49日，同擇定日期送葬，期間逝者既屋企門口會懸掛一個紅陶罐，罐口用白羊毛或白哈達（即白色絲巾）圍上，土罐內放進食物，包括三葷同三素，供逝者靈魂使用。另外，為左可以俾逝者既靈魂安靜上天堂，逝者既家人係一律唔梳洗，唔唱歌，唔跳舞等，而鄰近既鄰居都唔辦喜事，唔歌舞娛樂嫁。

出殯當日，先從遺體擺放處到家門口用白糌粑劃一條線，然後由逝者後代沿住白線將遺體孭到門口，以盡孝心。到門口之後，就由天葬師（熱甲巴）用床單或者大口袋將遺體孭走。當逝者俾背屍人孭起時，後面會有一個同死者同齡既族人，一手拎住掃把，一用拎住竹方筐，目的係掃走D糌粑白線，同埋將糌粑、掃把、墊屍體既土坯，統統放進竹方筐入面，然後緊跟住背屍人後面，直到走到十字路口既時候，再將所有丟係路口度，表示係送走D鬼。

同時，家屬親友手持香，送遺體前往天葬台，但只會送到十字路口，家人係唔可以跟到天葬台，只可安排1-2位逝者既好友前往天葬台見證。另外，背屍人同送葬者唔可以回頭望，據說係為左避免被逝者知道返屋企既路，並且係送往天葬台途中將紅陶罐摔破，則表示送逝者既靈魂升天。

進行天葬儀式既時候，遺體通常會被放置係特定既開放場所，例如，天葬台或山丘上，司葬者燒起松柏香火堆，再係火堆上面撒上三葷三素既糌粑（一種由米大麥製成既食物），令到遠處既禿鷹見到「桑」煙（即薰香），就會飛過來，聚集於附近山巒，等待啄食。而天葬師會將遺體骨肉剝離，用石頭砸碎骨頭，將遺體切成小塊，並同糌粑同時俾禿鷹（禿鷲）啄食，屍骨以食盡為吉祥，說明逝者無罪孽，靈魂已安然升天。若有殘餘，要將剩餘部分揀起焚化，同時念經超渡，藉此方式去完成遺體既最終安置。

有一點都值得同大家分享嫁，西藏既生死觀念入面，藏人會抹去逝者一切痕跡既習俗，無論係逝者本人既照片，連文字、生前物品、衣物等等，全都會送人或丟掉，可以話係將「斷捨離」實踐得極為徹底，如果係合照既話，就只係將逝者既臉部用剪刀剪走，逝者不單單係遺體，就連他係呢個地球存在過既痕跡都全部被消除。

如果去計劃去西藏既人，記住唔好去睇天葬啦，一係尊重逝者同逝者既家人，二係會觸犯法律嫁，因為2005年西藏自治區人民政府為左保護同尊重西藏天葬，而發佈左關於《天葬管理暫行規定》既通知。所以，記住唔好去睇啦。

第四條天葬受法律保護。任何組織和個人禁止從事下列活動：
（三）對天葬活動現場進行圍觀、拍照、攝影、錄影；
（四）通過報紙、雜誌、圖書、廣播、影視、網路等媒體刊登、播放、燒錄、轉載渲染天葬活動有關的文字、圖片、報導等；
（五）將天葬台作為旅遊景點組織中外遊客遊覽參觀。

其實「天葬」係西藏地區被視為一種崇高既行為，符合佛教對生死輪迴既理解。話雖如此，天葬係其他文化或宗教中，可能被視為不尋常或具有爭議性。但每個文化同宗教對死亡葬禮都有其獨特既觀點同傳統，所以，尊重唔同既習俗。

今次小編分享左呢一個喪葬習俗，大家又可以係聚會時多一個話題啦，雖然我地對於死亡既話題好多時都會避之則吉，但如果係當一個討論或者一個話題去思考，亦係不失一個啟發大家對於死亡既另一新睇法呢。如果想對身後事流程了解多啲，可以參考我地以下既文章：