寵物絕育手術會嬲你一世？【一文打破貓狗絕育迷思】

寵物絕育手術對於小動物健康非常重要，可大幅減低貓狗罹患生殖系統疾病嘅機會，但仍有不少剷屎官因為對毛孩絕育手術存在謬誤與迷思，卻止步為毛孩安排手術，根據統計數字，香港住戶養貓及養狗合共超過40萬隻，趨勢仍然向上升，更有不少家庭住戶養超過一隻寵物，絕育手術除咗有助貓狗健康成長之外，亦有其他益處，作為主人或準備做主人都必須對寵物絕育手術有更深了解，本文更會分享絕育前要點準備、手術後護理及注意事項，獸醫診所手術收費等資訊。

寵物絕育手術的目的是令毛孩失去繁殖能力，透過將雄性貓狗睪丸切除及將雌性貓狗嘅子宮及卵巢取出，達到避免不必要嘅繁殖行為，同時有以下好處：

寵物絕育好處 1. 減少繁殖器官病變機率

包括大幅降低雄性（貓狗）罹患睾丸癌機會，同時會減低罹患前列腺疾病嘅機會；大幅降低雌性（貓狗）罹患乳腺腫瘤、卵巢癌、子宮癌及子宮發炎嘅發病機率。

寵物絕育好處 2. 改善不當行為

貓狗在絕育前會經歷發情期，伴隨一系列不當行為，例如叫春（一般夜晚叫）、胡亂噴尿、故意破壞及攻擊性等行為，對主人或寵物本身亦是一場惡夢。

寵物絕育好處 3. 減少棄養數量

貓狗一胎多隻，如涉及轉贈或出售的話，幼犬幼貓將要面對有機會被棄養或其他風險，如主人決定俾寵物做咗父母先絕育，必須計劃好點樣安排幼犬幼貓嘅歸宿，同時補充母貓母狗嘅營養，再安排毛孩做絕育手術。

貓狗合適絕育年紀

當狗狗半歲大已經有繁殖能力，一般發過情就可以安排進行絕育手術；而貓咪在5個月大就有繁殖能力，8-10個月大會開始發情，不過安排寵物絕育手術前最好先問問獸醫意見，因為每隻寵物有機會因為身體狀況或先天性因素引致風險。

寵物絕育後會嬲主人一世？

貓狗做絕育手術需要全身麻醉，老實講佢唔會知道做緊乜，一般擔心呢個問題嘅主人都係養貓，因為貓比較記仇，因為主人放低佢響診所後離開，有被遺棄嘅感覺，之後由於手術後傷口不適導致不當行為未能得到主人諒解，取而代之嘅係責罵，咁嬲你一世可以講係咎由自取，而所謂絕育手術後導致寵物性情大變係誇張說法，由於激素分泌減少雄性貓狗會變得比較文靜，所以有主人認為佢係自卑唔開心係一個謬誤，絕育手術後主人應該花更多耐性及時間陪伴寵物，令佢哋感受主人關懷，唔單止唔會嬲，仲會更加溫柔，所以絕育手術後護理得當，可以減低寵物術後不適，加速傷口康復。

寵物絕育手術前後需留意事項

寵物進行絕育前一晚8：00後唔可以食任何嘢，手術當天早上前4-6小時最好唔好飲水，絕育手術後寵物必須佩戴頭罩以至少14日（視乎診所建議），避免舔到傷口，並依時服用獸醫開出嘅處方藥物，避免傷口沾水，手術後一至兩日，毛孩最好放喺籠入面休息，避免大幅度運動導致爆線、傷口裂開，而一般術後十日可以拆線。

毛孩絕育手術幾錢？

寵物絕育手術費一般唔算貴，坊間寵物獸醫診所收費介乎HKD$1,200至HKD$1,400，不過手術前涉及身體指數檢查、心臟檢查等收費約總數可達HKD$3,500-至HKD$5,000，是否做術前檢查由主人自行決定，不過為規避手術風險建議先檢查，如果財政能力有壓力的話，愛護動物協會有推出「動物絕育資助計劃」，幫助有需要人士以較低價錢為寵物安排絕育手術，詳情按此了解更多。