「離線權」係咩？【打工仔有無收工時間】

根據政府合署2024年3月25日出版既「收入及工時按年統計調查報告」中既數據，以2023年既全職打工仔每星期工作時數中位數係44.3小時為例，對比法例所規定一日工作時間為8小時，平均每周工時不超過40小時，雖然並未規定上限，但亦係超過左法例規定既時數，目前更未有法律嚴格規定每週工作時數上限而不屬違法嫁。

香港大部分既寫字樓工作都係會返朝9晚6，放銀行假期，而除左D服務性行業，或者需要非固定工作時間之外既工作，好多都需要加班，工作時數都會偏長，但係係咪有真正既放工時間呢？

相信有唔少既打工仔都會係非工作時間內收到公司上司或同事既信息、電話或電郵等，又或者係客人既查詢等，以出左名「我既訴求就係想返工」同「好鍾意返工」既香港人黎講，係非工作時間內收到信息或電郵等，都會不自覺地回覆信息同處理，有時覆遲左，Miss左信息，都會擔心同緊張，真係「你有壓力，我都有壓力」，係咪真係做唔到Work-Life-Balance？

其實係2024年8月，澳洲實施左一條新例「離線權」，就係保障僱員係收工之後同放假既時候，係可以拒覆工作電話同電郵嫁，即係代表係澳洲工作既人，「真」工作時間以外，佢地係有權選擇唔睇、唔覆工作信息、唔聽公司電話，而僱主亦唔可以因為員工唔覆而作出任何懲罰或處分員工既行為，如果出現爭論，就會交俾澳州公平就業委員會（Fair Work Commission，FWC）按雙方理據作判斷同裁定，例如員工角色、公司聯絡員工既理由等。

當然，呢條例亦有例外既，如果從事緊急服務業，或無固定上班時間既工作，法例下，員工既理由係唔合理，委員會係需要員工回覆工作信息。相反地，如果僱員既理由係合理，委員會係可以勒令僱主停止工作時間以外聯絡員工嫁。

當然類似既法例，唔止澳洲啦，目前全球有大約20個國家實施緊，而大部分國家都係位於歐洲同埋拉丁美洲，例如西班牙、意大利、希臘、葡萄牙同比利時等。最早率先引入有關法例「離線權」（The Right to Disconnect）既係法國，2017年，法例規定企業人數達50人以上，僱主係需要同員工商討，工作時間以外收發工作訊息既安排，雙方共同達成協議，避免員工在工作時間以外都要無償工作，同時保障員工既休息時間。就算雙方達成唔到協議，僱主係有責任為僱員既工作時間定立準則，列明工作時間以外享有D咩權利。

就連我地香港人較喜愛既台灣係2023年亦都開始推動「離線權」，臺北市政府勞動局2023年訂定左「臺北市事業單位實施居家工作勞動條件保障指導原則」，其中一項係「尊重勞工離線權益」，意味臺灣都推行「離線權」，員工係工作時間以外，有權唔接收、唔回覆任何同工作上相關既郵件、電話或訊息，僱主唔可以因此而當成員工違規，或施予任何不對等待遇。

當中亦有例明，如果僱主／上司係員工收工之後傳信息俾員工／下屬，例如用Line通知員工／下屬有緊急突發事務必須要即刻處理，呢個情況已經構成加班，公司必須依勞基法相關規定俾返加班費或補假俾員工。當然，「中華民國勞資關係協進會」都有指出，如果僱主/上司只係分享資訊、提早交辦工作內容，並非要求員工即時／非工作時間外提供工作，例如報告、處理同跟進非緊急工作事宜，按定義上就唔屬於工作時間。

其實香港係2018年既時候，亦有進行過「無限工時問卷調查」，調查顯示近9成受訪者平時都會用WhatsApp同同事溝通，68.7%主要討論工作、68.1%處理公事突發事情，61.3%解答同事同客戶查詢。而且，9成幾受訪者表示工餘時間都會收到同事或上司既工作訊息。咁到底香港會唔會參考外國既「離線權」，保障返打工仔呢？

雖然好多打工仔都非常熱愛工作，或者因為生活壓力而默默工作賺錢既大有人在，但時代唔代，以前60-80年代，經濟開始起飛，好多打工仔都好捱得，只要肯搏肯捱，努力工作，就可以改善生活，反而而家既Z世代好多已經唔係呢D心態，會更加著重Work-Life-Balance，所以，「離線權」會唔會有一日都會係香港推行呢？