ADHD 患者

第一類係注意力缺陷多動症（ADHD）患者，呢個係時盲症既「重災區」，差唔多 90% 既 ADHD 患者都有呢個問題。因為佢地個腦負責規劃同感知時間既部位發育得慢，仲唔夠一種叫「多巴胺」既物質，導致好難將注意力擺係「時間」上面，玩起上黎就忘記晒啲野，做野亦都冇辦法按時完成。

自閉症或學習障礙

第二類係自閉症、有學習障礙既人，有自閉症既人士會對時間既規律性唔敏感，例如記唔住「每日7點食晚飯」呢種固定節奏。如果有學習障礙既小朋友，佢地成日都會低估寫功課既時間，最後就會拖到瞓覺前先黎趕工。

精神或腦部問題

第三類係有精神問題或者腦部受過損既人。如果有抑鬱症既人，佢地一係覺得時間過得超慢，捱一日就好似捱左成個禮拜咁，一係就渾渾噩噩，一日過去咩都冇做。或者係腦部有受過撞擊，又或者曾經中過風既人，如果係傷到負責感知時間既腦區，亦都會變得「冇時間觀念」。

暫時性因素

仲有一類係壓力大、瞓唔好，又或者係鍾意沉迷野既人。例如返工一族趕項目既時候成日熬夜，個腦轉唔過黎，就好容易忘記時間。例如學生哥沉迷打機，一打就係半日，呢啲都屬於暫時性既時盲。呢種情況只要調整下作息、減減壓，大多數都可以緩解。

有時盲症既人，係真係估錯咗時間。例如以為執屋淨係要半個鐘，點知執個衣櫃就用咗兩個鐘，最後遲到仲好懵：「點解要咁耐？」佢地面對後果既反應係「困惑」，完全唔知問題出係邊。

有拖延症既人，心入面清楚如鏡。例如知論文聽日要交，亦都知要完成都要用3個鐘，但係就係唔想郁，然後走去睇片、打機黎逃避現實，最後趕完論文滿心愧疚，怪自己浪費太多時間去玩。