購物車內無任何商品
posts
【DSE、大學生暑期工】Part Time招聘攻略2026
DSE、大學生暑期工 Part Time 招聘攻略 2026
長達兩個月嘅暑假好快就到，無論係中學生定大學生，好多人都會趁呢段時間搵份兼職暑期工。正如歌詞都有唱，時間就係金錢，與其放假喺屋企虛度光陰，不如踏實啲搵錢充實下自己，既可以賺到零用錢，又可以累積到寶貴嘅社會經驗。最正嘅係，暑期工多數對工作經驗要求唔高，好多職位基本上一見即合，表現好嘅話，分分鐘過完暑假仲可以繼續做，變成一份長做長有嘅固定 Part Time！
今年暑假嘅工種依然係五花八門，各位 DSE 畢業生同大學生，究竟應該點揀好？搵工嘅時候又有啲咩陷阱要提防？對於未正式踏足社會嘅一班同學仔，睇完呢篇精心準備嘅招聘攻略，希望可以幫你帶眼識人、避開求職騙局，搵到份啱自己嘅好工。一邊充實荷包，一邊自我增值，咁先至係真正嘅 Work Life Balance！
搵Part Time、暑期工招聘好地方推介
科技年代，搵暑期工梗係上網搵啦，下面求職網站對暑期工都有獨立分類，無論僱主資料、工作職務、返工地點、預期人工等都有刊列，慳返好多問野時間，當然，你亦可以透過篩選，直接搜尋自己心儀嘅行業、地點、招聘形式等，一矢中的，雖然暑假工嘅工種比較少，但對於無任何工作經驗嘅學生哥嚟講，都足夠有突啦！
暑期工四大長青行業
暑期工嘅工種選擇確係比較少，但每個暑期總有啲工種會大量請人招聘，而且唔需要工作經驗，要求亦唔高，基本上滿足僱傭條例年滿 15 歲已經可以求職，可能中四學生哥已經可以體驗下職場生活，因為某啲行業響暑假可以話係當時得令，求才若渴，連帶週邊行業對人手上亦需求大增，暑假做咩好？不妨參考下以下四大暑期工長青行業，睇下啱唔啱自己心水。
包伙食搵銀：飲食業
暑假一定多左人出街食飯，一日三餐日日煮，想攰死你老媽子咩？平時仔女要返學，星期六、日都可能忙做功課溫書，所以暑假期間一家大細出街食飯嘅意欲一定大咗，學生哥唔駛返學，又多左同朋友行街食飯，餐廳當然需要更多人手應付生意，無論餐廳樓面服務員或廚房學徒等，基本都有在職培訓，邊做邊學，有冇工作經驗唔重要，而且通常至少包一餐，慳左都算賺左啦。
挑戰外向極限：售貨員
全職 Sales 通常都需要一定工作經驗，因為除左賣野，你亦需要應付客戶咨詢同具備良好溝通技巧，滿足客戶要求甚至處理客戶投訴，但暑期工一般請售貨員主要係理貨同做分流，又或者一啲比較簡單行業如百貨公司，當然，你有成功銷售最好，做銷售可以增加同唔同嘅人相處嘅機會，亦係提升待人接物、應變能力同口才嘅好機會，外向嘅你不妨可以一試，話唔定有驚喜嘅收獲。
暑假體力活：倉務員
暑假多咗人行街買嘢，帶動零售業之餘，倉務、理貨嘅相關工作量當然亦隨之上升，從事倉務工作最重要嘅係體力勞動，學歷、經驗都係次要，主要職責係包裝同搬運，絕對需要任勞任怨，暑假期間通常都會大量請兼職，不過主要請男仔多，另外因為 18 歲以下人士從事體力勞動工作會有相關限制，所以倉務工作一般會請「夠枰」嘅男同學。
絲打限定優勢：問卷專員
好多企業會透過客戶問卷了解客戶嘅諗法，制定未來推廣及銷售方針之餘，順便留低潛在客戶嘅電郵或電話方便日後跟進。暑假條街比平日多人，所以問卷調查專員亦係暑期工嘅招聘常客，雖然亦算體力勞動，暑假天氣炎熱，企喺條街同人做問卷，都辛苦嘅，但同倉務相反，一般請女仔多，原因好簡單，女生訪問員被拒絕嘅機會比男生低很多，而且面對女嘅訪問專員，受訪者會比較願意留低聯絡方法，尤其係受訪者係男性，你懂的，今次女學生就有優勢喇。
暑假 Re-U 套餐
【新興暑期工】Blogger／產品評級專員
好多學生年紀輕輕但才華洋溢，能夠寫出吸晴嘅文章，字字珠璣，而且具備專業攝影執圖技巧，依加呢個年代，執靚相已經係年輕一代本能，唔想埋沒才華，可以趁暑假寫 Blog 投稿又或者建立個人專頁、頻道，可能係寫關於 DSE、遊記、手遊、桌遊、運動、美食等等，好多公司都會透過 Blog 提高網站能見度，如果你寫得一手好文章，又想賺錢又想舒舒服服，不妨當暑期工咁做，寫得好隨時會邀請你幫公司寫產品用後感，長寫長有，過左暑假都有份固定 Part Time 收入啦！
【老生常談】暑期工 5 大求職陷阱
年青人剛剛踏足社會，經驗不足又心急嘅情況之下，容易被不法之徒有機可乘，暑期工陷阱一睇再睇，騙徒手法層出不窮，五條中一條你都唔好做，荀工真係咁多咩！隨時浪費時間，賺唔到錢仲要倒輸就唔好啦。
無任何學歷或經驗要求，但人工極高
常見於社交平台分享，標題極具吸引，咩在家工作日均四位數收入、可以去旅行兼賺錢諸如此類；因為大型招聘網站需要僱主披露公司資料，但因為呢類型公司招聘嘅職位同職能比特殊，所以唔會作出披露，學生搵暑期工容易被人工高吸引，作出錯誤決定，隨時係從事非法工作，無要求，人工高，佢成家去哂做啦，做咩要出 Post 請你？
未開工先俾錢
常見於模特兒或演藝工作，例如好多自稱星探嘅人會花言巧語話要捧你做林志玲、下一個姜濤，但你必須要俾錢上堂，學唱歌、做戲、模特兒訓練等，上哂堂就安排你出 Show、簽經理人合約，暑假好多商演活動叫你盡快報名，最後可能做咗次「臨記」就冇哂聲氣，唔係話呢啲就一定假，但決定前必須調查對方身份來歷、公司背景、公司資料或者有咩藝人，最好問下爸爸媽媽意見先做決定。
騙取個人資料
有啲公司會先 WhatsApp 你，同你講完一大輪就問你 WhatsApp 身分證、銀行卡同地址證明俾佢話幫你預約見工，你唔好急，預約見工通常有你個姓同電話號碼就夠，其他嘢大可正式簽約先提供，好多同學仔少見工，以為係既定程序，又心急搵暑期工就掉以輕心，最後無端端洩露個人資料，惹上一身錢債，所以對於個人資料必須加倍小心提防。
層壓式推銷騙局（傳銷／直銷）
層壓式推銷屢見不鮮，到今時今日仲係好多人中招，點解你會中招？因為你朋友中左招，你以為你朋友有好野益你，帶你聽講座，講台上有個自稱藍寶石伯爵嘅人好似鬼上身咁，話自己年薪千萬，下線數千，你嘅美好人生，由呢個暑假開始，只需要入貨搵下線，抽佣之類，之後你就同你朋友入貨，幫佢脫離險境，自己就萬劫不復，都係果句，唔好即時做決定，問多幾個人先，暑期工搵下零用錢賺下旅行洗費，唔駛做伯爵嘅。
暑期工都要簽約及留意細則
有一句名言叫魔鬼在細節，要防範好簡單，你可以聽左佢講咩先，錄埋音都怕，然後咩都唔好簽，成份合約帶走俾父母睇下先，真係冇問題先簽名帶返去，了解合約先簽名係權利，簽左名就代表你同意，所以奉勸各位記住「唔好急，慢慢嚟」。
最後同大家講多樣野，雖然香港嘅合法工作年齡係 13 歲，但因為條例限制太多，大部分僱主一般都唔會考慮。所以想搵暑期工嘅話，滿 15 歲以上會比較合適；至於 15 歲以下嘅同學仔，建議你暑假報讀一啲興趣班，好好裝備同充實自己。機會從來都係留俾有準備嘅人，趁住呢個暑假，不論係 DSE 畢業生定大學生，一齊搵份 Part Time 挑戰下，賺零用錢之餘，仲可以開拓人脈、擴闊眼界！
以上資訊由 Kama Delivery 貼心提供。我哋一直致力為全港各區炮製平靚正嘅到會美食，希望為大家嘅各式聚會同派對，增添多一份幸福嘅「滋味」！
聯絡我們
追蹤我們延伸閱讀
部份圖片出處｜Pexels
＊未經許可，以上文章不得轉載或引用＊
最新優惠
多人到會套餐
一人自選餐盒
單點到會美食
中秋節到會
小朋友到會
BBQ燒烤到會
素食到會
獲取專屬報價
KAMA BLOG
語言
