【如何激勵員工士氣？】10個方法讓你的千里馬變萬里馬

所謂員工好，生意自然好，作為管理層學識如何激勵員工士氣好緊要，生意難搵，人才更加難搵，三國時期劉備三顧茅廬都要搵諸葛亮出山做軍師，可見人才嘅重要性係古往今來，搵到千里馬之後，更重要嘅係留住佢嘅心，打工仔有句名言，東家唔打打西家，亦有一句做生不如做熟，你團隊屬於前者定後者，取決於響東家嘅際遇、報酬外，亦包括成就感、人事關係、歸屬感等，所以激勵員工有助提高團隊士氣外，亦會帶來其他正面效益，包括團隊向心力、團結精神、正向思維等，以下10個激勵團隊方法，令你嘅千里馬變萬里馬，伴隨公司走得更遠更強大！

作為管理層要有自信，但切忌自大、目中無人，要學識聆聽，唔係左耳入右耳出，聽咗就算，最好可以定期同每個員工交流閒談，關心下佢地有冇工作上或者情緒上難題，以至員工個人及家庭生活，建議高級員工一對一定期交流，其他員工可以定期開團隊交流會議，員工會感受到公司嘅關愛，提高歸屬感。

要激勵團隊的話，最緊要團隊知道如何達成目標，循邊個方向行動，一步一個腳印地參與其中，唔係叫佢哋自己諗辦法，當然，整個過程進度管理層必須瞭如指掌，久唔久問下跟進下狀況，Deadline前驗收，可能你係信任團隊，但容易俾員工覺得管理層都唔識緊張，團隊亦無必要同你著緊啦。

唔理黑貓白貓，捉到老鼠就係好貓，賞罰分明嘅制度下，外國企業係呢方面就做得特別出色，唔會出現某個員工出錯唔駛負責任，或者某個員工表現理想就特別多獎勵，管理層必理訂立完善嘅賞罰制度平衡團隊利益，能激勵團隊工作動力同士氣，同時減少出錯，公平制度亦能造就良性競爭，讓同事們更有上進心。

物質或金錢獎勵固然重要，但對某啲員工嚟講，特別現今Z世代開始踏入職場，心靈激勵更加能打動人心，舉個例子，賞罰制度公平，而且人人有份，但老闆嘅嘉許唔係成日有機會，老闆基本上唔係話見就見，尤其是大公司，可能由入職到離職你都未必見過佢，一隊寂寂無名嘅Team收到嚟自大老闆嘅嘉許郵件、或者親自頌獎，會令員工成就感大增、士氣激昂，當然，如果老闆安排唔到時間，搵區域總監等高管代表亦係可行的，今時今日要做個貼地管理層先至得！

作為管理層，與下屬發展地下情絕對係職場大忌，腦細最緊要辦事公平、光明磊落，辦公室戀情一定要堅持唔好發生，就算你唔打算偏袒，都唔會有同事信你，最後只會眾叛親離，人非草木，如果你係一名受薪管理層更有可能烏紗不保，因為唔止你，你嘅對象都一樣會俾人閒言閒語，所以拍拖行遠啲，團隊走遠啲，正所謂喺度食唔好喺度屙丫嘛。

「出事走左佬，領功實見到」係一個不受擁戴嘅管理層必定有嘅特質，帶領嘅團隊亦只會各自為政，有損士氣，團隊出錯失策嘅時候用嚟鼓勵團隊士氣就最好不過，解決問題帶領團隊由低谷反彈，會令團隊成員心存感激，亦顯示左自己嘅能力，當然，上面都提及過﹐自己作為管理層都要跟緊啲，始終有啲錯係難以彌補。

有好多工作狂管理層就算收工都仍然心繫工作，無論幾點只要一諗到有野Update就即刻Send落Group度，懶理下屬已經收咗工嘅心情，有啲仲過分到睇完要應睇完，否則第二朝又秋後算賬，唔通打份工要On Call 24小時咩？團隊仲邊有精精做嘢呢？科技發達唔係俾你更容易剝削員工嘅利益，合理嘅休息係為咗團隊走更遠嘅路，有開工冇收工只會激勵團隊成隊一齊走。

所謂一人計短、二人計長，開會度橋大家都應該經歷過，但有啲管理層一聽到少少唔對路，就成條橋Ban左，叫你重新諗過，再諗再Ban不斷輪迴，Ban橋唔係唔得，但如果你可以從下屬嘅建議中取長棄短，具體啲講邊啲好邊度要改，佢再諗嘅時間可以優化好嘅部分，比起講親都Ban，不如求其交啲嘢，橫豎都Ban，不如慳返啲精神時間，連自信都冇埋，咁成個團隊就死氣沈沈員工仲邊有士氣呢？