【認識3種香港常見過敏症狀】

根據香港哮喘會（Hong Kong Asthma Society）香港人最常見既長期疾病係過敏症（英：Allergy），包括鼻敏感、哮喘、食物敏感、皮膚敏感、濕疹及藥物過敏症狀等。其實過敏症係指人體既免疫系統對於外來原本係無害既物質所產生既發炎反應，呢D無害既物質就係我地所講既致敏原（英：Allergen），會引致敏感，可能係食物，或者環境，甚至係空氣。

🔼 鼻敏感係最常見既季節性過敏 🔼

一般嚟講，季節性過敏（英：Seasonal Allergies）通常會係一年內某一D時間發作，例如春天，植物開始傳播花粉既時候，所以成日聽到人講花粉症(英：Pollinosis 或 Hay Fever) 發作，或者鼻敏感，有時候，因為唔同既植物傳播花粉時間唔同，令到過敏症人士可能一年大部分時間都處於過敏狀態。除左鼻敏感（又稱過敏性鼻炎，英：Allergic Rhinitis）外，轉季亦有可能會引起皮膚過敏既情況發生，因為轉季時天氣變化，出現過分既乾燥或潮濕既氣溫，從而會誘發到皮膚過敏紅癢等症狀。

🔼 生理同心理層面都可導致皮膚過敏 🔼

對於皮膚過敏（英：Skin Allergies），會有唔同既情況出現，例如，出現紅疹（英：Erythematous Rash），濕疹（英：Eczema），蕁痲疹（又稱風癩 或 風疹，英：Hives或Urticaria），或者皮膚表面泛紅、發熱及灼痛等問題。除左會因為天氣影響外，仲會有機會因為飲食習慣而影響，壓力大同先天性體質等因素。飲食習慣方面，偏好食辣野煎炸野，或者有人係對食物敏感，例如海鮮、蛋、奶類、花生、豆類等產生過敏反應。另外，都市人生活上都好太壓力，來自工作、生活環境、家庭問題等，令到心理健康出現問題，亦會有機會導致皮膚過敏。或者本身先天性體質比較虛弱，氣血不足，亦有機會出現血虛生風，令皮膚乾燥面痕癢。

🔼 定期清潔床單等地方，有助減少塵蟎既出現 🔼

另外，塵蟎亦係最常見既空氣致敏原，塵蟎會係偏多塵埃，潮濕，暖既地方出現，例如床、被、沙發、地氈、衣服等，塵蟎通過食用死皮細胞需維持生命，而塵蟎既排泄物就係引發起過敏同哮喘病發，所以保持個人衛生習慣，勤力更換床單被單，有時候都可以曬一下被單，可以殺塵蟎，或者，市面上亦推出可以吸塵蟎功能既吸塵機，大家如果屋企有人有過敏，不妨考慮一下。另外，動物既毛都有機會引發過敏，例如鼻敏感，皮膚過敏，所以多加清潔打掃屋企。

🔼 透過皮膚點刺測試，可以更加了解自身致敏原 🔼

而過敏既情況好多都有唔同症狀，程度亦會因人而異，所以大家要多加留意，特別係小朋友，如果發現可能對食物，或者藥物敏感，要盡早去檢查。或突然間出現面部或喉嚨腫脹、皮膚發紅、瘙癢、出疹等，要即刻帶小朋友去睇醫生。另外，亦可以去做皮膚點刺測試 或IgE血液測試，檢查對咩食物或藥物會敏感，提早了解同留意，避免接觸到致敏原，甚至可以預早治療，減少出現過敏。