玫瑰係情人節經典花材，最為人熟悉的當然係火紅嘅玫瑰，花語象徵熱情嘅愛及浪漫，而玫瑰嘅多種顏色，亦代表著唔同嘅情感，試想像如果初戀就送紅玫瑰會太進取，可能會嚇親人。

情人節花語介紹 – 百合

百合姿態優雅並且香氣迷人，花語係純潔及高貴的愛，雖然情人節能見度唔算高，但非常適合送俾老婆，尤其已經結咗婚一段時間，所謂百合百合，百年好合，亦係對未來嘅美好祝願。

情人節花語介紹 – 康乃馨

康乃馨花瓣層層疊疊，形狀獨特，雖然係母親節嘅代表，但亦係情人節花材選擇之一，康乃馨花語象徵迷人、優雅與愛，層層花瓣就如母親對子女嘅保護，特別適合送俾已為人母嘅伴侶，表達愛與感謝。

情人節花語介紹 – 向日葵

向日葵以其明亮嘅黃色及向陽而生嘅特性，俾人一種溫暖、愉悅嘅感覺，作為畢業花材代表，原來亦適用於情人節，向日葵花語中有仰慕、愛慕嘅意思，有如太陽在向日葵嘅世界，永遠只向著你。

桔梗外觀與玫瑰相似，但花語就冇玫瑰咁進取，桔梗花語係不變的愛，特別適合送俾剛剛訂婚或結婚嘅妻子，表達眼前人係唯一選擇，而且唔會改變，一心一意。

紫羅蘭嘅花語係浪漫與優雅，情人節嘅能見度唔高，雖然紫羅蘭唔算情人節熱門花材，不過花語好適合送俾已婚多年嘅妻子，祝願婚姻一直走到永遠。