5個方法改善小朋友偏食【幼兒健康你要知】

小朋友揀飲擇食點算好？特別對於新手爸爸媽媽照顧幼兒，小朋友唔肯食野，又或者偏食，而擔心小朋友營養不良而過瘦，又或者營養過剩而肥胖，十分唔健康，甚至會引發好多疾病或者容易抵抗力差易病，咁有無咩方法係可以改善小朋友既偏食壞習慣？

小朋友唔食某類食物既主要原因，通常可以睇2方面，偏食既第一個原因係因為父母自己本身有偏食既習慣而影響到，第二個原因係子女對某一類食物既接受度比較低。普遍D講，孩子既口味喜好會同父母既接近相似，由於爸爸媽媽既食物偏食，令到小朋友都唔容易食到，變相子女就無咩機會嘗試到，以致於對呢D食物會產生抗拒感。

小朋友大約會係2歲左右開始，容易出現偏食狀況，因為1歲既時候，可以食既食物種類好少，之後2歲開始食到同接觸到既食物種類多左好多，就會發生偏食既問題，所以，要避免幼兒偏食，各位爸爸媽媽就要由BB係6個月大既時候嘗試副食品階段開始，就要安排提供俾BB各種食物，等小朋友都有機會慢慢地可以嘗試到各種食物既味道。

改善小朋友唔肯食野或偏食既5個方法

各位爸爸媽媽可以嘗試係進食前同小朋友溝通好，要求一個指定既食飯時間內完成，例如45分鐘，如果過左45分鐘都未食完，都會將食物同餐具收起。一開始時，小朋友可能未完全明白或者習慣，甚至會出現扭計，所以家長需要逐步實踐。

小朋友2歲左右會開始想咩都自己郁手做，例如會拒絕大人餵食，所以呢個時候，家長可以嘗試放手俾子女自己進食，同時，可以俾多D鼓勵同認同，令到小朋友有更多自信。但唯一既問題就係，家長要有心理準備小朋友食到污糟蹋塌，千奇唔好怪責小朋友，避免佢地抗拒。

家長盡量同小朋友一齊進食，俾小朋友一個用餐既氣氛，當然，好多家長日頭要返工，放工返到屋企都比較夜，未必可以一齊食晚餐，但有可能既話，都可以嘗試同小朋友一齊食，等子女可以感受到用餐既氣氛，爸爸媽媽不妨趁放假時增加一同坐埋一齊用餐既機會，有時小朋友見到大人食得開心，亦容易接受唔同種類既食物或食物味道。

好多父母都會俾小朋友選擇食唔食，或想食咩既選擇自由，爸爸媽媽不妨係問問題上改變策略，例如由以前既：「要食咩」，改為二選一既問題「要食菜心定係白菜」，令到小朋友有個清晰既範圍，等佢地選擇邊款自己比較願意接受既，另外，父母可以經常轉換唔同既食物，唔好只偏向小朋友鍾意既食物，等小朋友接觸更多既食物，加大佢地對唔同食物既接受程度。

有時小朋友唔鍾意某樣食物，可能係因為食物既外觀﹑顏色﹑味道或者質感，家長不妨透過外觀﹑顏色﹑味道或者質感去落手，例如食物外觀，可以利用餅乾模具將食物製成卡通形狀，再合併成唔同既圖案吸引小朋友進食。又或者係因為食物軟﹑硬﹑乾或濕等既原因而唔食，家長亦可以考慮嘗試採用唔同既方法去烹調同一種食材。