日本年號小知識【昭和、平成、令和係乜野？】

成日睇日劇都會聽到或者睇到日本人講年份既叫法，例如昭和、平成或者令和既年份，到底日本既年份點解會有呢D稱呼？呢D叫法又係根據咩而去定義呢？一齊了解下日本曆法。

日本其實係同我地古代一樣，會因為唔同朝代，唔同既皇帝，即係日本人所講既天皇，而更改年號（日語：元號／げんごう）既，指「年代稱號」。曾經日本都出現幾次2個年號並存既，例如日本既南北朝時代，大覺寺統既南朝同持明院統既北朝兩個政府各自有自己年號，直到後來統一之後，年號先再次綜合一齊。以前日本曆法係採用中國既傳統曆法，稱「和曆」（音：Wareki），一直去到日本進行維新改革，當時廢除左傳統曆法，從而改用西方既公曆。

日本最初無明文規定話更換年號只可以係更替君主既時候換，有時係因為有天災人禍或者人事異動都會更改年號。直到1868年明治天皇登基果陣頒布左《明治改元之詔》後，改為一個天皇固定用一個年號，故此先確立左「一世一元」既制度，所以之後d天皇都只有一個年號，亦即係話，近現代既年號使用年限，等於同天皇在位有關啦。係1872年(即舊曆明治五年)11月宣佈詔書，明治五年12月3日正式改為新曆明治六年1月1日，至此就開始完全使用新曆（陽曆）。

直到20世紀以後，中國、朝鮮、越南等國家先後廢除君主制，同時廢止年號紀年，而家得返日本仲用年號既國家。

日本年號點樣篩選出黎？其實篩選元號案時，要留意元號案必須根據以下6點去篩選：

根據日本法律規定「新天皇登基時，更換新年號」，明仁天皇於2019年4月30日退位，德仁皇太子係2019年5月1日登位，所以日本於4月1 日就公佈左由5月1日開始，年號由「平成」改為「令和」，正式進入「令和」時代。而「令和」出處係日本古典和歌文集《萬葉集》卷5〈梅花之歌〉：「初春令月、氣淑風和、梅披鏡前之粉、蘭薫珮後之香。」(原文:「初春の令月にして、気淑く風和ぎ、梅は鏡前の粉を披き、蘭は珮後の香を薫す。」) 而當中既「令」為美好，「和」則溫和，即代表美好溫和之意，更含有「beautiful harmony」既解釋。

不得不提既係，「令和」既更改，其實亦係一個新改革同創新，第一係年號由明治維新後第一次改名係天皇仲在世，因為退位而更換新年號，非因離逝原因而改朝換代;第二係第一次採用日本文學，同以往唔一樣，以前係參考古代中國既歷史書籍而制定; 第三係經歷左30年平成時代，已進入一個全面數位化媒體技術成熟時代既第一次更改年號，避免左好多因為年號既變改而出現既問題，例如減少電腦系統出錯。另外，微軟同蘋果公司亦有支援令和年號既系統。

講左咁多，唔知大家又知唔知自己屬於咩年號出生呢？熱愛日本文化既大家，等小編考下大家先，如果係1989年1月出生，係咩年號？答案要睇係1月幾日啦，如果係1月7日，仲係昭和64年，如果係1月8日或之後，就變成平成1年啦。如果係2010年5月出生呢？答案係平成22年。如果係2023年出生就係令和5年啦，後面數字代表換年號後既第幾年，例如令和1年（西曆2019年）即係令和既第一年，如此類推啦。