【Black Friday迷思】中港有冇黑色星期五？

【Black Friday迷思】中港有冇黑色星期五？

Black Friday黑色星期五，大家都可能聽過下，講起Black Friday黑色星期五第一印象就係恐怖驚慄電影【黑色星期五】，電影中恐怖、血腥嘅場面、緊湊嘅情節，再加上黑色俾人感覺上神秘而缺乏歡欣色彩，令人覺得黑色星期五有負面貶義嘅意味，但事實上剛剛相反，Black Friday黑色星期五源自美國，屬於商業消費節日，概念上同大陸嘅雙十一相似，咁點解叫黑色星期五？指嘅又係邊一個星期五？

Black Friday黑色星期五係緊接美國嘅感恩節之後嘅星期五，感恩節訂於11月第四個星期嘅星期四，感恩節翌日就係所謂Black Friday，黑色星期五由美國網站Shop.org創造出嚟嘅購物節，由於是感恩節假日段嘅首個工作天，商家都期望呢一日嘅生意進帳，美國商家以前記帳以紅色代表虧欠、黑色代表盈利，加上踏入11月尾，顧客們都開始為聖誕節入貨做準備，買禮物、消費旺季，配合商家的減價推銷，一般Black Friday黑色星期五都可以創造銷售高峰，而員工嘅眼中由於一定忙到甩轆，黑色亦是佢地對繁忙工作嘅一種自嘲，亦有商家會以綠色星期五作為購物節招徠，一黑色唔吉利、二綠色亦代表美金鈔票嘅顏色。

好多美國商家、零售商都會選擇提早開門做生意應接Black Firday，甚至早到凌晨時分，因為商家嘅貨物減價清單唔會提早預告，所以以前一般都會有民眾於百貨公司、商店外等待搶現金折扣劵，或者早啲入場買嘢以免心儀貨品被搶購一空，不過時至今日網絡科技發達，戰場轉移至網絡市場，尋寶搶購就去Amazon、Walmart、Best Buy呢啲大型購物網站，於2014年美國四大百貨公司宣布支持支付寶外海直郵，令Black Friday衝出美國，將呢個獨特商業文化繼續喺亞洲發熱發亮。

反而中國、香港響Black Friday好少大型宣傳活動，大型品牌會就黑色星期五推出折扣優惠，但減價幅度、參與商戶都唔算多，因為響黑色星期五前，有11月11號光棍節，單計天貓一個網購平台，銷售額已經超過二千億人民幣，足足係黑色星期五兩倍有多，仲未計其他購物平台，所以中港網民既然11月11號已經大出血，11月尾當然要回回氣，因為12月仲有聖誕節要食聖誕大餐、買禮物，少啲元氣（指港元）都攪唔掂，大家都知道緊接住聖誕節之後就係農曆新年，大家都要留返啲子彈辦年貨。