❶ 驚人尺寸：火龍長度

長度有 5.5 架雙層巴士首尾相連既長度，近 67 米，整條龍由龍頭、龍尾及 32 節龍身組成。而龍頭同龍尾既骨架由有彈性既籐枝構成，而龍身既脊骨就係一根粗兩厘米，長六十七米既繩纜。籐枝同繩纜上會鋪上「米仔草」或「珍珠草」既乾草，咁就可以安插燃燒緊既「長壽香」，呢D香枝就每枝長 45 厘米。龍頭重約 48 公斤，上面有約 12,000 根燃燒的既線香，需要由約 300 名男性共同舞動嫁。

❷ 精湛陣法：舞火龍招式

其實舞者並唔係只按路線舞完火龍就當完成，當中有多種儀式表演，只係聽個名就知夠哂霸氣，例如：

• 起結龍團（又稱為打龍餅）
• 火龍過橋
• 火龍過龍尾
• 火龍纏雙柱

❸ 賦予靈魂：點睛儀式

農曆八月十四日會係蓮花宮舉行龍眼點睛開光儀式，為火龍眼部繪上最後一筆，象徵為火龍注入生命。

❹ 獨特走位：舞龍珠者全程倒行

拎住舞龍珠既表演者需要時刻面朝龍頭，引領火龍動向，所以佢地需要倒後行。

➎ 結緣祈福：派龍香傳遞祝福

按照歷年傳統，火龍身上燃燒後既香枝都會派發俾在場既觀眾，呢啲用黎祈福既香枝，據講拎返屋企或者係舖頭擺好，可以保佑黎緊一年平平安安、大吉大利、事事順景。

➏ 圓滿落幕：送龍

農曆八月十六日會進行送龍，又稱「遊大運」，火龍會循反時針方向巡遊大坑一周，然後由貨車將火龍運到去維園道附近既銅鑼灣海濱，然後再卸下頭牌、火龍同鼓車，進行送龍儀式，感謝上天庇佑大坑舞火龍可以順利舉行。隨後，將火龍同頭牌拋入海，稱為「龍歸天」，象徵火龍將區內既衰運送入海裡，最後會由工作人員撈起火龍搬返上岸。