1. 黑風洞
(Batu Caves)

黑風洞 (Batu Caves) 係吉隆坡郊區，好多旅客因為黑風洞既特殊地理風貌同宗教景觀，慕名而來。黑風洞以前係一個遠離城市既小村落，亦係印度教聖地，被稱「峇都喼」，同時係馬來西亞大寶森節慶典既重要地方。黑風洞最大特色係一座於半山腰中既巨大石灰岩洞窟，為左可以連接洞窟，打造左272級樓梯，遠睇似天梯連接洞窟，畫面壯觀。而以前入口原本素色既樓梯而家變成色彩繽紛既彩虹樓梯，吸引唔少人去打卡嫁。

黑風洞係印度教聖地，大家衣著方面都要留意，基本上唔可以露腿，當然黑風洞入口處有提供長裙俾旅客購買既服務。值得一提大家，黑風洞除左獼猴之外，鴿都係數量多到驚人，所以大家去到既時候，提防扒手之外，仲要小心獼猴同鴿。

2. 中央市場
(Central Market)

中央市場位於吉隆坡中心地帶，於1888年建成既一個菜市場，之後就轉型做馬來西亞文化、藝術同手工藝既中心，所以又稱「中央藝術坊」，係一座具有重要歷史價值既建築之一，入面有各種唔同風格既藝術畫廊，包括Illusion 3D Art Museum、Art House Gallery等。大家可以去完鬼仔巷，不妨黎中央市場行下，仲可以係度買D獨特既手工製作做手信。中央市場仲分為室內市場同戶外市場，仲設有一個露天舞台，定期舉辦當代舞蹈同音樂表演。

3. 鬼仔巷
(Kwai Chai Hong)

鬼仔巷位於戲院巷 (Lorong Panggung) 同茨廠街 (Jalan Petaling) 之間，同時都係蘇丹街 (Jalan Sultan) 同茨廠街 (Jalan Petaling) 匯聚處既一條小巷，充滿豐富既文化同歷史，巷內出名特色壁畫，展現當地風情，更表達出1960年代華人移民既生活點滴。無論係D舊房屋既磚牆上，亦或係巷子既拐角處，都有驚喜等住你去發現同打卡嫁。

鬼仔巷有間超過50年以上歷史既食店非常出名嫁，大家去到當然要去潮聖一下啦，「何九海南茶店」 (Ho Kow Hainam Kopitiam)，但佢營業時間星期二至日，早上7點半至下午3點，所以大家有興趣既話，記得提早安排啦。

4. 茨廠街
(Flea Market Petaling Street)

茨廠街 (Petaling Street / Jalan Petaling) 另稱「中國城」或「唐人街」，係一條擁有140年歷史既街道，主要賣華人美食為主，而且好多攤位或小店面都營業超過50年以上嫁。小編綜合左多人推薦既8間食店或者攤位俾大家參考：

5. 雙子塔
(Petronas Twin Towers)

雙子塔係兩棟摩天大樓連接一齊既，有452米高，保持著世界最高雙棟大樓紀錄，另外，雙子塔又被稱「Kuala Lumpur City Centre」，縮寫「KLCC」，由於雙子塔係馬來西亞國營石油公司投資興建，所以雙子塔又叫做「國家石油大廈」、「國油雙塔」，亦有人叫佢做「雙峰塔」或「佩重納斯大廈」，總之有好多唔同既叫法。

雙子星塔底部係一個叫「SURIA KLCC」（陽光廣場）既購物中心，擁有150萬平方呎、六層樓高既商場，大家有興趣可以去Shopping下。

6. 獨立廣場
(Merdeka Square / Dataran Merdeka)

獨立廣場又稱「雪蘭莪」、「莫迪卡」或「人民廣場」，在1957年8月31日，馬來西亞脫離左英國殖民獨立，但仲保留左獨特既英式建築風格，佔地8.2公頃，係世界上最大既廣場之一。

8月31日係馬來西亞國慶日，呢日會舉行盛大國慶典禮及閱兵儀式，仲會放煙花慶祝。而且每逢星期一上午10點都會進行升旗儀式，仲會有馬隊丶銅樂隊表演嫁。

另外，周邊有國家紡織博物館、皇家雪蘭莪俱樂部 (Selangor Club Padang)、吉隆坡城市劇院、民族音樂博物館、蘇丹阿都沙大廈 (Bangunan Sultan Abdul Samad)等建築，大家有興趣都可以去行下。

7. 占美清真寺
(Jamek Mosque / Masjid Jamek)

占美清真寺，另稱「佳密清真寺」、「占美回教堂」或「嘉美回教堂」，座落於巴生河 (Klang River) 同鵝麥河 (Gombak River) 交匯處，於1909年完工，係馬來西亞歷史最悠久同最大既回教清真寺。占美清真寺融合左三種建築風格，包括印度撒拉遜復興建築 (Indo-Saracenic Architecture) 、摩爾式建築 (Moorish Architecture) 同蒙兀兒建築 (Mughal Architecture)，係殖民時期常見既建築特色。

占美清真寺亦俗稱「週五清真寺」，Jamek在馬來語和阿拉伯文意思一樣，指穆斯林聚集進行膜拜既地方，而每逢星期五就係穆斯林教徒既祈禱日，所以大家要留意星期五穆斯林教徒祈禱時間內，禁止遊客進入清真寺參觀嫁。另一方面，如果要進入參觀，一定遵守服裝上既規範，占美清真寺都有租借用長袍同頭巾既服務，所以大家唔使擔心。

8. 國家清真寺
(National Mosque Malaysia / Masjid Negara)

去完占美清真寺，再步行20分鐘就到左國家清真寺，國家清真寺建於1965年，原址原本係一座基督教教堂，佔地5.5公頃，可容納15,000人。國家清真寺既設計唔同其他清真寺，

國家清真寺係採用現代化設計，融合伊斯蘭藝術之美，有48個小圓頂，大廳16角星形既藍綠色屋頂，再加上旁邊73米高既宣禮堂，兩棟建築分別象徵打開同閉合既雨傘設計，代表馬來西亞獲得獨立自主既標誌建築，同時顯示出伊斯蘭教既重要地位。

附近有個吉隆坡舊火車站同鐵道大廈，大家都可以去行下打個卡。

9. 吉隆坡舊火車站寺
(Kuala Lumpur Railway Station / Stesen Keretapi)

吉隆坡火車站建於1910年，1986年裝修改建，直到2001年被吉隆坡中央車站 (Kuala Lumpur Sentral) 取代，雖然車站仲運作中，但而家主要以旅遊景點俾遊客參觀。

吉隆坡舊火車站曾經被稱為全世界最靚既火車站，設計係摩爾式建築風格同印度撒拉遜復興建築風格，具濃厚回教色彩，成個車站設計似一個四方城堡，中間係火車道，兩邊既馬蹄形拱門俾火車進出既。

另外，吉隆坡舊火車站對面既馬來亞鐵道公司 (Keretapi Tanah Melayu Berhad, 簡稱 KTMB)，另稱鐵路局大樓，都係一棟有歷史既古老建築，同火車站建築設計風格類似，大家不妨去參觀下。

10. 武吉免登
(Jalan Bukit Bintang)

武吉免登係吉隆坡最熱鬧同繁華既購物中心、百貨公司同娛樂場所集中地，亦有好多小店，被稱作「星光大道」 (Jalan Bukit Bintang)、「金三角」，感覺上有D似台灣早年既西門町同香港早期既油尖旺區。

如果大家想買手信，可以去武吉免登廣場 (Bukit Bintang Plaza，簡稱BB Plaza) ，已經有30幾年歷史，算係歷史最悠久既購物商場之一，加上走平民路線為主，十分值得一去嫁。武吉免登購物中心附近除左相連既金河廣場 (Sungei Wang Plaza) 外，仲有樂天廣場 (Lot 10)、成功時代廣場 (Berjaya Times Square)、劉蝶廣場 (Low Yat Plaza)、升禧廣場 (Starhill Gallery)、飛輪海88商場 (另稱華氏88廣場，Fahrenheit 88)、柏威年廣場 (Pavillion) 等，大家如果鐘意Shopping，相信呢度足夠大家行1日，行到肚餓，不妨去樂天廣場 (Lot 10) 既美食街「十號胡同」，入面有超過30間馬來西亞老字號食店或檔口俾大家選擇。

另外，柏威年廣場有個地方必去既，就係「Mercato Pavilion」超市，目前「Mercato」係吉隆坡有3家分店，產品夠多元化，同時係可以買到馬來西亞必買既手信。

11. 亞羅街
(Jalan Alor)

行左一日武吉免登，最後一站當然要去亞羅街，亞羅街係吉隆坡最有名既觀光夜市，擁有20多家間餐廳及同200家間以上既路邊攤檔，多元化既馬來西亞同廣東美食，去到必食既食物， 包含炒粿條、沙爹、福建麵、燒雞翼、貓山王榴槤、魔鬼魚等。除左美食之外，小編建議大家都可以去「亞羅後巷 Alor Backspace」欣賞壁畫嫁。